Shitatiko 40
40
Yoshefwa ukutontolola milo ya batuyili
1Oho kwapitile shikati, kawaba ka mwene wa Engepita na kankemba wendi wa mukulwane babipishilile mwene. 2Niho Fwalo apilamine nanaba babilolo babili, 3kami wabayakile mu tolongo yamu litala lya mukulwane waku musheke, omu bashinkililile Yoshefwa. 4Bekalile shikati shashitali mu tolongo, mukulwane waku musheke wabayakile ku maboko a Yoshefwa ngayi abalamenga.
5Wushiku umo, muyo mu tolongo, wubili wabo bakawaba na kankemba bamwene wa Engepita balotele milo. Muntu na muntu walotele mulo wendi na mulo nimwawo wekalile na kutontoloka kwawo. 6Oho Yoshefwa ezile kukwabo ku lumenemene, wamonene ngayi banahombo. 7Pe wabepwile babilolo ba Fwalo ngayi, “Shumangani mu ku moneka kulikekula?”
8Bakumbwile ngayi, “Etu nimwetu tunaloto milo pe kowa umo kuno wakututongweza kutontoloka kwa yino milo.”
Yoshefwa wambile kukwabo ngayi, “Unengi Nyambi ou wapananga ngana za kutontolola milo.” Pe niho ambile ngayi, “Haya ntongwezenu tuyuvwe milo yenu.” 9Nohobene kawaba wambile kuli Yoshefwa ngayi, “Mu mulo wami namona mukolobozi wa shinyanca kumbili yami, 10wekala na myahi yihatu. Mabizi oho aku zobela tuhu, ntemo zatutika na mikabo ya shinyanca ya hoka. 11Ami na kwata nkomoki ya Fwalo, kami nabuya mikabo ya shinyanca na kuyizongela mu nkomoki, pe nayipana kukwendi.”
12Yoshefwa wambile kukwendi ngayi, “Niwo ukutontoloka nehe, myahi yihatu yinengi matena ahatu. 13Kwapita matena ahatu Fwalo ukakututwisha mu tolongo, kami ukakuyatila na kukubwesha mu mwanya wobe. Ukapanikanga mwene nkomoki yendi ngonehe watendelenga mwaka, oho wengilenga mwaka kawaba kendi. 14Haya ukekale na nceshe shikuma na kuntoya kuli Fwalo na kunyavwa kufuma muno mu tolongo. 15Ndaba nayibiwile ku litunga lya Bahebelu, kami hinge kuno kaliha natende shuma shimo eshe bananyakili mu tolongo.”
16Oho kankemba wa mukulwane amonene ngayi kutontoloka kwa mulo wa kawaba ku nawaha naye kami niho ambile kuli Yoshefwa ngayi, “Nami kami naloto nashimbi zintumba zihatu za mankende ha mutwe wami. 17Mu ntumba ya hayilu mwekala byakulya bya kuhoka bya Fwalo, ngoboni tuyoni twapupula na kubilya.”
18Yoshefwa wakumbwile ngayi, “Oku niko kutontoloka kwawo. Zintumba zihatu zinengi matena ahatu. 19Kwapita matena ahatu Fwalo ukakututwisha na kuketula mutwe wobe. Niho ukapatika lutu lwobe ha shitondo, pe tuyoni tukalya lutu lwobe.”
20Oho kwapitile matena ahatu, ha mutena wakwanuka kuhemuwa kwendi, Fwalo wapingile shimbo ku babilolo bendi nimwabo. Watutwishile kawaba wendi na kankemba wendi wa mukulwane kumbili ya babilolo bendi. 21Niho abweshele kawaba wendi mu mwanya wendi, 22ngoboni kankemba wamukulwane wayatiwilile kufwa. Nisho shengile ngonehe atontwelele milo yabo Yoshefwa. 23Ngoboni Kawaba kaliha wahanganikile Yoshefwa, wamuvulamine.
Currently Selected:
Shitatiko 40: LLK
Highlight
Share
Compare
Copy
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
