Ezekiyele 5
5
Ezekiyele ukusheha huki kwinga shilimukisho sha ku shushuliwa
1Nyambi ya Ngula wambile ngayi, “Mwana muntu, shimba mukwale wawutwe uliyavwishe ha ku sheha mulevu wobe na huki zobe nimwazo. Niho ufwanikize huki zobe na shipimisho pe utapezo mu zimbalila zihatu. 2Uhokeshe shiketu sha wuhatu shazo mu lukena oho nzita yakamana. Ukashimbeho zimina pe ukaziketozole na mukwale wobe, oho ukazingulukanga lukena. Ukayumbile zinashalaho ku nozo muyilu pe ami nikazilwisha na mukwale wami. 3Ukatenteke zihuki zazishe pe ukalivungilezo mukati ka mungundo wa bivwalo byobe. 4Pe ukatutwisheko zazishe kukwazo kami, ukaziyumbile mu mundilo pe ukazilehe zikahokenga. Mundilo ukafumaho ukapanzanina ku mukoka nimwawo wa Ishalela.”
5Nyambi Mpandashilanga wambile ngayi, “Mona, Yelushalema namuyaka hakati ka kaye na matunga amina hinga amuzinguluka. 6Ngoboni Yelushalema wakananganine ndayano zami na kufutuka kwinga wamubi shikuma kupitakana mikoka yamina, wakubula kwombatala shikuma kupitakana matunga anamuzinguluku. Yelushalema wakanine ndayano zami na kubula kuzombatala. 7Haya yuvwilila obe Yelushalema kunebye nili na kwamba, Ami Nyambi ya Ngula, ha kubula kwombatala hinge kukonka ndayano zami, munaliletelele ukalu kupitakana matunga anamizinguluku. Enu munakonko ndayano za matunga amina. 8Nohobene Ami Nyambi ya Ngula, nili na kumitongweza ngayi, Ami nili kamalamo wenu. Nikamiyata oku matunga nimwawo amimona. 9Mukutendanga byuma bya wunyengwe, nohebene Ami nikashushula Yelushalema nehe nabulile kutenda pe nifwako kukashitenda kami. 10Nohobene, bahemi ba mu Yelushalema bakalya banababo na banababo kami bakalya bahemizabo. Nikamishushula pe aba bakashalaho babomi bakapanzanina mu zimbalila nimwazo.
11“Nohobene, nehe nenga Nyambi wakuyoya, elye nilyo lizu lya Nyambi ya Ngula ndaba mwazilwile Litala lyami na wubi nimwawo, byuma nimwabyo bya wunyengwe mwatendelenga, Ami nikamiketwila hanci kwakubula nceshe. 12Bantu ba shitika sha wuhatu bakafwa ku malweli a kubula kupangiwa na kukapande, bamina bakaketuliwa na mikwale ha munkanda wa lukena. Nikapanzanishila bamamaninino mu zimbalila nimwazo na kubakonka na mukwale.
13“Mukayuvwa wukali na kupilama kwami, hantu noho nikalibela. Oho nimwabyo byakamoneka enu mukalimuka ngayi Ami Nyambi ya Ngula ukumilwisha ndaba ya kubula kupwisha kwenu. 14Muntu nimwendi wakufuma ku matunga aya anamizinguluku ou ukupita kwakwipi nanenu ukamihepa na kumyongoloka kupitila kwakutali.
15“Oho nikapilama na kukaliha nanenu na kumishushula, matunga nimwao anamizinguluku akakanka. Akatilamina kukwenu na nkole na kumi hengamina. Eshe nisho akwamba Nyambi ya Ngula. 16Nikashepesha ku byakulya byenu na kumi lehela ngayi mufwe ku nzala. Mukayuvwa eshe yakolanga nzala ngonehe munayahiwi mivwi yayitwe ya kumilobesha. 17Nikatuma nzala na tuyamana ba lishaka mu kuziha banabenu, nikatuma malweli a kubula kupangiwa na mishunga na nzita mu kumiziha.” Eshe nisho ninamba Ami Nyambi ya Ngula.
Currently Selected:
Ezekiyele 5: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
