Ezekiyele 6
6
Nyambi ya Ngula ukunyanca kulemesha tunankishi
1Nyambi ya Ngula wambile kukwami ngayi, 2“Mwana muntu, tilamina ku mapili a Ishalela pe lubulula kukwabo lizu lyami, 3utongweze mapili a Ishalela, kuyuvwa lizu lya Nyambi ya Ngula, kuyuvwa ebye ni ku shimikila Ami Nyambi ya Ngula, ami nili na ku shimikila ku mapili na ku binkanda na ku tungulungwa na ku mikulo. Ami nikatuma mukwale na kulobesha myanya eye bantu balemeshelanga tunankishi. 4Tuula tukahandoka na tulonga twa kuhokeshela incence tukapaboliwa, niho bantu nimwabo kuyo bakazihiwila kumbili ya tunankishi twabo. 5Nikapanzanisha mituntu ya bantu ba Ishalela na kupanzanishila bifupa byabo nimwabyo kuzingwilisha tuula twabo. 6Zinkena nimwazo za Ishalela zikaloba, nohobene tuula twabo nimwato na tunankishi twabo bikacancoliwa, na tuula twa incence bikashiwuliwa, shuma nimwasho shiya batendele shikabundala. 7Bantu bakazihiwila nimwako mwako, pe bakalimuka ngayi Ami nili Nyambi ya Ngula.
8“Ngoboni nikaleha bamina bakenga babomi, bakapuluka ku nzita pe nikabapanzanishila ku matunga amina, hakati ka bantu ba mishobo yashenge. 9Oku bakekala mu wuntapwa, bakanyanuka na kulimuka ngayi Ami na ba shushulu ha kunyuvwisha lisheni, ndaba ya mitima yabo ya kubula kukulupila yanciyile kami nibo bamfwekeshele na tunankishi. Pe nibo bakayuvwa wunyengwe nibo bamwine ndaba ya wubi na byuma bya lihandu ebye banatende. 10Nibo bakalimuka ngayi Ami nili Nyambi ya Ngula kami pe kwambila kwami kaliha kwengile kwowa.”
11Nyambi ya Ngula wambile ngayi, “Kambilila mu maboko, lyata na mishindo, pe bilikiza ngayi, ‘Makando wetu!’ Ndaba ya wubi wawunyengwe banatende Baishalela. Bakafwila mu nzita na kapande na malweli. 12Obo balikwakutali bakafwa ku malweli, obo bali hahepi bakafwa ku nzita pe aba bakashalaho bakafwa ku nzala. Bakayuvwa wulemu nimwawo wakupilama kwami. 13#Nday 12:2-7. Niho bakalimuka ngayi Ami nili Nyambi ya Ngula, oho bakamona mituntu yinapanzanishiwi mukati ka tunankishi na kuzinguluka tuula twabo, hayilu ya binkanda na hayilu ya mapili na mu nceto ya mimvulu ya mitondo nimwayo ya Telimbini omu bahokeshelelenga zinkombela kutunankishi twabo. 14Nikolola liboko lyami na kulobesha litunga lyabo. Nikafutula litunga lyabo kwinga lyalibi kufuma ku libelelengwa lya ku mabukubuku kukuma ku lukena lwa Limbula ku ncelele, kowa kuyuvwila nceshe mwanya nimwawo oku bakwikala baka Ishalela. Niho bantu nimwabo bakalimuka ngayi Ami nili Nyambi ya Ngula.”
Currently Selected:
Ezekiyele 6: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
