Ezekiyele 4
4
Kuyata kwa Nyambi ha Yelushalema na Litala lyendi
4:1—24:27
Ezekiyele ukulubulula bya nzita yaku Yelushalema
1Nyambi wambile ngayi, “Mwana muntu, shimba shintina uliyake kumbili yobe, pe fundaho shifwekesha sha lukena lwa Yelushalema. 2Niho utendeko mateke na twimbi twa ndoba na ntanda na byuma bimo bya kuliyavwisha kuwisha kembi ka Yelushalema. 3Shimba shondo sha kupapalala na kushiyimika ngonehe kembi mukati kobe na lukena. Tilamina ku lukena. Lukena bali na kululwisha, kami obe uli na kululwisha. Eshe shikenga shilimukisho ku bantu ba Ishalela.
4“Lala hanci ku liboko lyobe lya shimoho, pe Ami nika kutwika mulandu wa bantu Baishalela. Pe ukalala kuyo ngo muntu ukushimba kushushula 5kwa mulandu wa Ishalela matena akulingana 390, kuya na palo ya myaka ya kubashushula, mutena umo ha mwaka umo kutwala noho kushushula kukamana. 6Niho wakamanisha kulanganina ku shimoho, pe futulukila ku liboko lya shilyo na kushimba kami mulandu wa Yunda wa matena makumi anaa, mutena umo ha mwaka umo na umo wa kubashushula.
7“Penza ku Yelushalema banazinguluku, vunga liboko lya shikobelo shobe pe lubulula ku lukena olu bya kululwisha. 8Nikakumanga ngayi ukabule kufutulukila ku nciza yamina hantu unamanishi matena a kulwisha Yelushalema.
9“Shimba loto na luku na manyanta na manyanta a mpeka zazishe, mahangu na loto lwa mpeka lwalushe, fungilabyo nimwabyo hamo uvube linkende. Biya nibyo ukalyanga ku matena 390 awa ukalanganina kumbalila yimo. 10Ha mutena na mutena obe uketabilishiwa kulya linkende lya lingana tuhu mangilamu 230 hantu ku mutena waku lundamina. 11Obe ukekala kami na mema akwezekela akunwa, zinkomoki zibili ha mutena. 12Obe ukebike mundilo ha tuzi twa bantu twa kuyuma, ukayohe linkende na kulyalyo oku muntu nimwendi akutwesha kuku mona.”
13Nyambi ya Ngula wambile ngayi, “Oho nikupanzanishila baka Ishalela mu matunga ashenge nehe bene nisho bakalyenga byakulya biya zikukanisha ndayano.”
14Niho na kumbwile ngayi, “Byo, Mwene Nyambi ya Ngula ami shilolo nilibipishe na byakulya, kufuma kuwanuke wami hinga natanga kulya nyama ya kayamana wakulifwila, hinge wakukwatiwa ku tunzama. Ami nifwako kukalya nyama ya mazilo.”
15Nohobene Nyambi wambile ngayi, “Shashiwahe, ngoboni ami nikukuleha ngayi ukaliyavwishe tuzi twa zingombe kupitakana tuzi twa bantu ngayi ukayoheho linkende lyobe.”
16Niho kami ambile ngayi, “Mwana muntu, nikashepesha kupanika mankende bantu ba ku Yelushalema. Bantu kuyo bakekala na shitima ha kupima byakulya biya bakalya na mema akunwa. 17Bakabula mankende na mema, bakekala na mutentu, kami bakaloba ndaba ya milandu yabo.”
Currently Selected:
Ezekiyele 4: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
