Ezekiyele 3
3
1Nyambi wambile kukwami ngayi, “Mwana muntu ulye elye libuka lya kuzenga, niho uye na kwamba ku baka Ishalela.”
2Nohobene ami nayahamine, pe wandishile liya libuka lya kuzenga. 3Niye wambile ngayi, “Mwana muntu ulye elye libuka nikukupanika, wikute mu livumo lyobe.” Ami nalilelyo, kami lyayuvwanikile wutobe ngonehe wushi.
4Niho Nyambi ambile kukwami ngayi, “Mwana muntu, yanga ku Baishalela pe ukambe kukwabo ebye nikukutongweza. 5Kaliha nili na kukutuma ku mukoka uya wambanga lulimi lwalukalu hinge lwashenge, ngoboni ku Baishalela. 6Shinga ndi nakutumine ku mikoka yayinene iya yambilenga mushobo wawukalu uya wabulile kuyuvwa, nibo shinga bayuvwilililenga kukwobe. 7Ngoboni Baishalela bafwako kuka kuyuvwilila hinge ku kwombatala, ndaba bafwako kunyuvwilila nimwabo banengi babakalu mitima kami banguma. 8Haya Ami nika kutenda kwinga wamukalu mutima na washilala ngonehe nibo. 9Ami nika kukaluhisha shikuma kupitakana limanya nimwalyo, hinge kwinga wakushuma ngonehe ndayimondi, hinga ubatina aba bankani.”
10Nyambi wambile kami ngayi, “Mwana muntu yuvwilila shiwahe kuneshe nikukutongweza na kwanuka shuma nimwasho. 11Niho yanga ku bantu bamu litunga lyobe aba batandiwi na kubatongweza ebye nili na kwamba kukwobe. Amba kukwabo ngayi, ‘Eshe nisho anamba Nyambi ya Ngula,’ hinge ndi bakakuyuvwilila hinge bafwako.”
12Niho moyo wa Nyambi wankatwile, pe nayuvwile kunyima yami lizu lya miyoyo ngonehe kunyenkana kwa kaye, libilikiza ngayi, “Yemeza wuwahe wa Nyambi ya Ngula uli muyilu.” 13Ami nayuvwile mbando za bibumbwabumbwa zilikamakama hamo mu mbimbayilu na miyoyo ya mawili yivuma ngonehe kunyenkana kwa kaye. 14Moyo wa Nyambi wancimbile kumfumishaho naliyuvwile kuyanda na kupilama, ngoboni ngovu za Nyambi ya Ngula zekalile hahami. 15Nayile oku bantapwa bekalilenga na kwikala ku Tela Ambimbi, kunkumo ya mushinzi wa Kemba, pe ha matena mutanu na abili nekalile kuyo, nakomokele nanebye nakamonene kuyo.
Nyambi ya Ngula ukwimika Ezekiyele kwinga Mukakulama
16Kunyima ya matena mutanu na abili apitile, Nyambi ya Ngula wambile kukwami ngayi, 17“Mwana muntu nili na kukwingisha mukakulama mukoka wa Ishalela. Obe ukanyambileko kukwabo nimwabyo ebye nikukutongweza. 18Oho nikwamba ngayi wakuluwa ukafwa ndaba ya kuluwa kwendi, uku fwanina kumwambila uya muntu ngayi atenguluke ku zinzila zendi za kuluwa ngayi enge wami. Ndi ukukana ukafwa, ngoboni mukeza wendi nikawushingila hahobe. 19Ndi ukambila mukawubi, kami niye wufwako kutenguluka ku kuluwa kwendi, niye ukafwa ndaba ya kuluwa kwendi, ngoboni obe unapulwishi wumi wobe.
20“Muntu wakulunga ha kutatika kutenda byabibi, pe nikumuyaka munyinkalo ya malamo niye ukafwa, ndi kumwambila wufwako. Niye ukafwa ndaba ya wubi wendi, pe ami nifwako kukanuka bya kulunga biya atendelenga, ngoboni mulandu walufu lwendi nikawushingila hahobe. 21Ndi ukwambila muntu wakulunga ngayi hinga utenda wubi, kami niye ukekala na kuyuvwilila kukwobe na kubula kutenda wubi, niye ukekala wamumi ngoboni obe unapulwishi wumi wobe.”
Ezekiyele ukakwanga kwamba
22Ami nayuvwile ngovu za Nyambi ya Ngula pe nayuvwile hamba kukwami ngayi, “Pinduka uye mu mukulo. Ami nikamba kukwobe kuyo.”
23Nohobene ami nayile mu mukulo muyo nakamonene wuwahe wa Nyambi ya Ngula, ngonehe eshe namonene ku nkumo ya mushinzi wa Kemba. Nawile kukinka lupala hanci. 24Ngoboni moyo wa Nyambi wekalile hahami niho nawanine ngovu. Niho Nyambi ya Ngula ambile kukwami ngayi, “Boka ku munzi ukalishinkilile mu litala. 25Ngoboni obe mwana muntu bakakumanga nyimbwa, kami wufwako kukatwesha kututikila ku bantu. 26Nikayaka kalaka ku lulimi lwobe ngayi ukabule kwamba kunaba bantu banamfutulukili. 27Hantu noho nikamba kukwobe na kukubweshela ngovu za kwamba, pe ukamba kukwabo ngayi, ‘Eshe nisho akwamba Nyambi ya Ngula.’ Bamo hakati kabo bakakuyuvwilila bamina baka kana, ndaba nibo banengi litala lya kumfutulukila.”
Currently Selected:
Ezekiyele 3: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
