Ezekiyele 31
31
Engepita ukufwanikiziwa na mutondo wa Shenda
1Ha mutena wakutatika mu ngonda ya wuhatu mu mwaka wa likumi na umo Nyambi ya Ngula wambile kukwami ngayi, 2“Mwana muntu amba kuli Fwalo mwene wa Engepita na ku bantu bendi ngayi,
‘Yani ukulifwanikiza nobe ku wunene?
3Mona, Ashiliya wengile mutondo wa Shinda waku Lembanoni.
Myahi ya mubombola wawuwahe,
mutondo wawutali shikuma, niwo wakuma naku makumbi.
4Kwekalile mema akushikulisha, na mema a kaheloke,
ayitililenga mwanya oku kwamenene mutondo,
na tushinzi twakupukishile, mitondo nimwayo ya mu lishaka.
5Nohobene mutondo wekalile na mema amengi,
Mutondo ou wakulile kwinga wawutali shikuma,
kupitakana mitondo nimwayo, myahi yakulile kwinga yayinene na wutali.
6Tuyoni nimwato twa kulishiyashiya twatendeleleko mahwa,
na tuyamana twahemenenenga bana batwo mu mubombola washo.
Na matunga nimwao a mukaye,
akatulilenga mu mubombola washo.
7Ou mutondo wengile wawuwahe shikuma,
wengile wawutali shikuma, na myahi yayitali.
Mipishi yasho ya kumine ku nceto shikuma oku kwekalile mema amengi.
8Kowa mutondo wa Shinda mu Endeni mu mfuba ya Nyambi wakulifwanikiza nawo,
kowa mupulanga wekalile na myahi ngonehe ou mutondo.
Kami kowa mutondo wamu mbuwa wekalile na myahi ngonehe ou.
Kowa mutondo mu mfuba ya Nyambi wakulyezeka ku wuwahe na uyo.
9Nawutendele kwinga wawuwahe, na myahi ya ku tandabala.
Mitondo nimwayo yamu Endeni mu mfuba ya Nyambi ya wuyuvwililenga mwili.’
10“Nohobene, wuluno Ami Nyambi ya Ngula, nikamitongweza byatendiwile ku nou mutondo ou watalihile shikuma hantu wakumine ku makumbi, ngoboni oho wakulilenga na kutaliha niwo wakulilenga na kuliyemeza. 11Nohobene ou mutondo nawukanine, pe nawupanikile ku maboko antwamina wa matunga kwinga wendi. Niye wawuyandishile mu nzila omu washingilenga kuluwa kwawo. 12Bayeni babakalu mitima bawutemene na ku shiyawo. Myahi yawo yawililile ha mapili namu mikulo na lishina lyawo lyawililile hanci hinga lyapokoka mu mikulo ya mu litunga, pe mikoka nimwayo iya yekalilenga mu mubombola wawo yayile kwashenge. 13Batuyoni nimwabo batulililenga ha mutondo wakuwa, kami tuyamana nimwato twendelenga ha myahi yawo. 14Pe nimwabyo ebye byatendiwile ngayi hinga kukekala mutondo uli kunkumo ya mushinzi ukataliha hantu naha makumbi, kami ngayi hinga kukekala mitondo yamina yikatambula shiwahe mema, hinge myahi yawo yikakuma ku makumbi, ndaba nimwabyo binayatiwili kufwa ngonehe muntu wamubi, ou nayatiwi kuya mu kuliwana nanobo baya ku nceto ya kaye ka bafu.”
15Eshe nisho akwamba Nyambi ya Ngula ngayi, “Ha mutena uya mutondo wayile ku kalunga ka bafu nawukupwile na mema aku nceto kwinga shilimukisho sha malila. Nemikile mishinzi na kukanisha mishinzi yayingi kukuka. Mutondo wafwile, naletele mincimpwe ha mapili a Lembanoni nayumishile mitondo nimwayo yamu lishaka. 16Nakankishile matunga nimwawo ha kuyuvwa miyoyo ya kuwa kwa mutondo, oho nawuyumbilile mu kalunga ka bafu hamo nabayo bayileko. Mitondo nimwayo yamu Endeni, nimwabyo byabiwahe na mitondo ya kuyitilila shiwahe yamu Lembanoni, yabengezekiwile ku kalunga ka bafu. 17Nibo bayile nawo ou mutondo mu kalunga ka bafu mu kulifungila nanobo bafwile mwaka na mukwale, pe nimwabo aba bekalilenga mu nceto ya mubombola wanou mutondo balobele.
18“Fwalo mwene waku Engepita, niye mutondo na bantu bendi nimwabo. Kowa hinge niho mitondo yamu Endeni byengile byabitali shikuma na wuwahe. Ngoboni nobe kami ukalifungila na mitondo ya mu Endeni yikaya mu kalunga ka bafu na bakakubula wunyambi nanobo bafwile mwaka mu nzita. Nisho nikwamba Ami Nyambi ya Ngula.”
Currently Selected:
Ezekiyele 31: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
