Ezekiyele 32
32
Fwalo ukufwanikiziwa na Ngandu
1Ha mutena wakutatika ku ngonda ya wulikumi na zibili mu mwaka wawulikumi na yibili, Nyambi ya Ngula wambile kukwami ngayi, 2“Mwana muntu, ambila mwene Fwalo waku Engepita ngayi,
‘Obe ukutenda ngonehe shimbwi ha mikoka nimwayo,
obe ukulyezeka na ngandu wamu mushinzi, wazubilanga mu mushinzi.
Obe wafundulanga mema na mawulu wobe,
na kufundula mishinzi.
3Nyambi ya Ngula ukwamba ngayi,
nika kukwatila mu kanyanzi kami,
oho mikoka yayingi yakakunguluka,
pe bakakokela kanyanzi ha lukandwa.
4Pe nikakukokela ha lukandwa, na kukuyumbila hanci na kuleta tuyoni nimwato,
na tuyamana nimwato mukaye mukuhanda hahobe.
5Nikayanika nyama yobe ha mapili,
nikafwika mikulo na bifupa byobe.
6Nikazabisha limvu na mukeza wobe,
niwo ukafwika mapili na kwinzalisha mishinzi.
7Nakakulobesha, nikafwika liyilu, na kufumishako nyenye.
Nikafwika mutena na makumbi, na ngonda wufwako kukamonesha wezi.
8Nikazima mimuni nimwayo ya muyilu
na kuyaka litunga lyenu mu mincimpwe.”
Eshe nisho na kwamba Ami Nyambi ya Ngula.
9“Mikoka bakekala mu wukalu nakakwayanisha bya kuloba kwobe hakati ka matunga ashenge na mu matunga wabula kulimuka. 10Osho nikatenda ha kuwa kwobe shika kankisha bantu babengi, oho nikazingwilisha mukwale wami, bamyene bakakanka na kutina ha myoyo yabo.”
11“Nyambi ya Ngula ukwamba ngayi,
‘Mukwale wa mwene wa Mbambiloni ukakukumina.
12Bakanzita banguma shikuma ba ku matunga ashenge,
bakahomona mikwale yabo na kuziha likunge lya Baengepita.
Bantu bobe na byuma nimwabyo biya waliyemezanga nabyo bikaloba.
13Nikaziha bimuna nimwabyo,
ku mwanya nimwawo wamanwino a mema.
Kuyo ku mema mwanza wa muntu hinge wakayamana ufwako kukamoneka,
ou ukawafundula kami.
14Nikaleha mema a Engepita akalolobele na kuyeluluka,
na kuleha mishinzi yenu kukuka shiwahe ngonehe mazi.
Eshe nisho ninamba Ami Nyambi ya Ngula.
15Oho nikafutula litunga lya Engepita kwinga lipembe,
litunga nimwalyo nikalilobesha, nakuziha nimwabo bekalamo,
niho bakalimuka ngayi Ami nili Nyambi ya Ngula.
16“‘Mazu ami akwambila akafutuka kwinga nyimbo za malila,
bakazi ba mikoka yashiyeni bakayimbila ha kulila Engepita na bantu bendi nimwabo.”
Eshe nisho akwamba Nyambi ya Ngula.
Kalunga kabafu
17Ha mutena wawulikumi na mutanu mu ngonda ya wulikumi na zibili mu mwaka wawulikumi na yibili, Nyambi ya Ngula wambile kukwami ngayi, 18“Mwana muntu, lila na kukwizoka ha bantu nimwabo bamu Engepita, batandile hanci na baminabo matunga a ngovu ku kalunga kabafu.
19Amba kukwabo ngayi,
‘Kati enu muli babawahe kupitakana baminenu ndi?
Mukaya ku kalunga kabafu,
na kulangana mukati ka bakubula wunyambi.’
20“Bantu Baengepita bakawa hakati ka bantu bafwile mu nzita, mukwale unaliwahishili kuziha muntu nimwendi mu Engepita. 21Banzita babakulwane ba kukanca nanobo babayavwile bakatambula Baengepita ku kalunga kabafu bakamba ngayi, ‘Bakubula wunyambi aba baziwihile mu nzita banezi na kukunkulukila kuno banalangana kuno.’
22“Ashiliya uli kuyo na banzita bendi nimwabo bali mu binzimbi banamuzinguluku, nimwabo aba bafwile mu nzita. 23Binzimbi byabo bili kumbalila ya kunonka ya mukalunga kabafu, nimwabo banzita bendi bawile mu nzita na binzimbi byabo binazinguluku shinzimbi shendi. Obo batinishile bantu mu litunga lya babomi.
24“Elamu uli kuyo na banzita bendi nimwabo bali mu binzimbi banamuzinguluku, nimwabo aba bazihiwile mu nzita, pe bayile hanci nimwabo bakubula wunyambi ku kalunga ka bafu. Oho bekalile na kuyoya batinishile bantu, ngoboni hano banalangana ba kufwa na kuyena. 25Elamu banamutendele wulili wakulanganaho hakati ka bantu ba kufwa, hamo na binzimbi bya banzita bendi binamuzinguluku, nimwabo aba bakubula wunyambi, nimwabo aba bafwile mu nzita. Oho bashili na kuyoya batinishile bantu, wuluno bali na kuyuvwa lisheni hamo na baya bali mu kalunga kabafu, banalangana hakati kabafu bafwile mu nzita.
26“Mesheki na Tumbalu bali kuyo na banzita babo nimwabo mu binzimbi banamuzinguluku. Nimwabo bakubula wunyambi bafwile mu nzita, ngoboni shikati shimina batinishile babomi. 27Nibo kaliha bapanikiwile binzimbi bya maleema ngonehe bakakukanca banzita ba mwaka, obo bayile hinga balibalakanya nzita mu kalunga kabafu, mikwale yabo yayakiwile ku nceto ya mitwe yabo, makebo abo bawafwikile bifupa byabo, aba ba kukanca hamo bengile bangovu shikuma na kutinisha babomi.
28“Obe Fwalo, eshe nisho bakalangana Baengepita hinga bacancoliwa mukati ka bakakubula wunyambi aba bazihiwile mu nzita.
29“Endoma uli kuyo na bamyene bendi na batulela, bengile banzita bangovu shikuma, ngoboni hano banalangana mu kalunga ka bafu hamo na bantu bakubula wunyambi aba bafwile mu nzita.
30“Nimwabo bana ba bamyene ba ku ncelele bali kuyo, pe na Bashindoni. Ngovu zabo shikati shamina zaletele bowa, ngoboni hano bakuya hanci na lisheni hamo nanobo bazihiwile mu nzita. Banalangana mu kukatala, bakubula wunyambi, nibo ba kulitapila lisheni hamo nanobo bakuya ku kalunga ka bafu.
31“Oho Fwalo hamo na bakanzita bendi bakamona bantu aba, pe bakababengezeka ha lufu lwa bakanzita bayo nimwabo bafwilile mu nzita.” Eshe nisho anamba Nyambi ya Ngula.
32“Ami naleteshele Fwalo waku Engepita kuyuvwisha bowa bantu mu litunga lya babomi, ngoboni Fwalo waku Engepita na banzita bendi bakalangana hamo na bakakubula wunyambi aba bafwililile mu nzita.” Eshe nisho anamba Nyambi ya Ngula.
Currently Selected:
Ezekiyele 32: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
