Ezekiyele 30
30
Nyambi ya Ngula ukashushula Engepita
1Nyambi ya Ngula wambile kukwami ngayi, 2“Mwana muntu, lubulula na kubilika ebye nikwamba Ami Nyambi ya Ngula.
Kaloka, mutena wa makando uli hahepi.
3Mutena uli hahepi,
mutena oho Nyambi ya Ngula akatendasho,
ukenga mutena wa makumbi,
ukenga mutena wa makando ha matunga.
4Kukekala nzita mu Engepita,
na makando akekala mu Etopya,
oho babengi mu Engepita bakazihiwa,
wuheti wendi ukapukuliwa na mwimbi wendi ukashiwuka.
5“Nzita yiyo yikaziha na banzita ba kunyepa kufuminina ku Etopya naku Puti naku Lundi naku Alembiya nimwayo na Limbiya, kami hinge hakati ka bantu bami na limamine nabo bakazihiwa.”
6Nyambi ya Ngula ukwamba ngayi,
“Nimwabo ba kuyavwa Engepita bakazihiwa,
kami aha anayendamini kuliyemeza kukamana.
Kufuma ku Mingindo kukuma ku Shiyene
bantu bendi bakafwa ku nzita.” Eshe nisho ali na kwamba Nyambi ya Ngula.
7Litunga likaloba shikuma mukati ka matunga amina,
kami zinkena zalyo zikashala mu mapembe.
8Oho nikahokesha Engepita,
na bakakumuyavwa nimwabo bakazihiwa.
Niho bakalimuke ngayi Ami nili Nyambi ya Ngula.
9“Oho mutena uya wakakuma na Engepita walobakale, nikatuma miluwe mu mato mu kupindwisha baka Etopya bali mu wulube, pe bakakanka ha mutena uya uli na kwiza.”
10Nyambi ya Ngula ukwamba ngayi,
“Nikaliyavwisha mwene Nembukandineza wamu Mbambiloni,
mu kumanisha wuheti wa Engepita.
11Niye na bantu bendi, bakuluwa shikuma,
bakeza na kulobesha liya litunga.
Bakalwisha Engepita na mikwale,
kami litunga likenzala na mituntu ya bantu.
12Nikayumisha mushinzi wa Nayilo,
pe Engepita nikamuyaka mu maboko a bantu bababi.
Bayeni bakalobesha litunga nimwalyo.”
Eshe nisho ninamba Ami Nyambi ya Ngula.
13“Nikalobesha tunankishi,
nikalobesha bifwekesha biya mwalemeshanga mu Memfwishi.
Mu litunga lya Engepita mufwako kukekala mwene.
Nikabakankisha aba bekala munelye litunga.
14Nikafutula litunga lya Patiloshi kwinga lipembe,
Nikahokesha munzi wa Zowani,
Nikashushula munzi wawunene wa Tembeshi.
15Litunga lya Peluziyamu,
shipata sha ku shuma sha Engepita,
bakayuvwa wukali wami, nikalobesha makunge aku Tembeshi.
16Nikahokesha Engepita, na Peluziyamu ukekala mu makando,
Twimbi twa Tembeshi tukabunkuliwa.
Memfwishi ukekala mu bowa.
17Bandumbana ba ku Oni na ba ku Pimbesheti bakazihiwa mu nzita,
pe bambuyama bakatwaliwa mu wuntapwa.
18Ku Tahipaneshi kukekala mincimpwe,
oho nikaketula ngovu za Engepita na kumanisha nyala eze aliyemezelanga nazo.
Likumbi likafwika Engepita,
na bantu ba zinkena nimwazo bakatwaliwa mu wuntapwa.
19Oho nikashushula Engepita,
niho bakalimuke ngayi Ami nili Nyambi ya Ngula.”
Kumanisha ngovu za mwene wamu Engepita
20Ha mutena wa mutanu na abili ku ngonda wakutatika mu mwaka wa likumi na wumo, Nyambi ya Ngula wambile kukwami ngayi, 21“Mwana muntu, ninapokolo liboko lya Fwalo, mwene waku Engepita. Kowa muntu unapambalyo hinge kuyakalyo mukakola ngayi litweshe kupola mwanga lishume na kutwesha kukwata mukwale kami. 22Haya Ami Nyambi ya Ngula nikwamba ngayi, ‘Nili kamalamo wa Fwalo mwene waku Engepita, nikapokola maboko wendi nimwawo lilishiwahe na lyamina liya lyapokoka mwaka, pe mukwale ukawa kufuma mu liboko lyendi. 23Pe nikapanzanishila ba Engepita mu kaye nimwamo. 24Nikashumisha maboko a mwene waku Mbambiloni na kuyaka mukwale mu liboko lyendi. Ngoboni nikapokola maboko a Fwalo, pe niye ukashunga na kufwila hambili ya kamalamo kendi. 25Nikashumisha maboko a mwene waku Mbambiloni, ngoboni maboko a Fwalo akapopa. Oho nikamupanika mukwale wami, pe niye ukawinika ku Engepita, muntu nimwendi ukalimuka ngayi Ami nili Nyambi ya Ngula. 26Nikapanzanishila ba Engepita mu kaye nimwamo, niho bakalimuke ngayi Ami nili Nyambi ya Ngula.”
Currently Selected:
Ezekiyele 30: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
