Kututika 38
38
Kutenda Kaala ka kuhokeshela Zinkombela
(Kututika 27:1-8)
1Wabazile kaala kakuhokeshela zinkombela ha mutondo wa mumbambangoma. Niko kengile shakwezekela hamo, mu wutali wako mashentimita 229 na mashentimita 229 muwipi wako na mashentimita 137 mu mwimo. 2Wabazile ncengo zinaa ku zinkomi zinaa ngayi mwanga enge shuma shimo na kaala. Pe wakafwikile nimwako na lubemba. 3Niho kami afulile byuma nimwabyo bya kaala, binzoyo na mafwosholo na zindonga za kukunama na tuhanto na binzoyo bya kukalila mundilo. Watendele byuma nimwabyo na lubemba. 4Pe niho afulile luhalo lwaha kaala ka lubemba na kukayaka mu nceto ya mubalo ngayi mwanga lukumine hakatikati ka kaala. 5Wafulile mahuzi anaa aku kulikila na kuwayaka ku zinkomi zinaa za kaala. 6Wabazile mibanda ya ku kulikila ya mutondo wa mumbambangoma, pe wayifwikile na lubemba, 7niho ayingizile mu mahuzi aku mbalila na mbalila ya kaala. Kaala kabaziwile ha maleenge, kami kengile ka mpako.
Kutenda Lizawo lya Lulonga lwa Lubemba
(Kututika 30:18)
8 #
Kut 30:18. Watendele lizawo lya lubemba na kapona kalyo ka lubemba ha bimoneno bya bambuyama aba bekalile ha milimo ku shipana sha Ntanda ya Shikungulukilo.
Kutenda Shipango sha Ntanda ya Shikungulukilo
(Kututika 27:9-19)
9Watendele shipango sha miwumbo ya makwiza amawahe a kulelema ku Ntanda ya shikungulukilo. Kumbalila yaku mabukubuku engile mamita 46 mu wutali. 10Shemanine ha zimpangwa makumi abili, za lubemba na tupona makumi abili twa lubemba, hamo na tuhanto na mbangilo byafuliwile ha shiliva. 11Pe kami kumbalila yaku ncelele shengile mamita makumi anaa na anaa, shemanine ha zimpangwa makumi abili za lubemba na tupona makumi abili twa lubemba, hamo na tuhanto na mbangilo byafuliwile ha shiliva. 12Pe kumbalila yaku mponci kwekalile makwiza a miwumbo engile mamita 23 mu wutali hamo na zimpangwa likumi na tupona likumi, hamo na tuhanto na mbangilo byafuliwile ha shiliva. 13Pe kumbalila yaku mushamuko oku kwekalile menginino, shipango shengile kami mamita 23. 14Pe ku mbalila yimo yaku menginino kwekalile mu wumbo wa mamita mutanu na yimo na zimpangwa zihatu na tupona tuhatu. 15Pe ku mbalila yamina kami kwekalile mu wumbo wa mamita mutanu na mita imo na shitika na zimpangwa zihatu na tupona tuhatu. 16Makwiza a miwumbo nimwawo akuzingwilisha shipango atungiwile ha makwiza amawahe a kulelema. 17Tupona twa zimpangwa twafuliwile ha lubemba na tuhanto na mbangilo na bya kufwika hayilu ya zimpangwa byafuliwile ha shiliva. Zimpangwa nimwazo za ku shipango zangungikiwile na mbangilo za shiliva. 18Mu wumbo waku menginino a shipango watungiwile ha makwiza a kulelema akutungila hamo na wutonge wa wuhombo na wakufumbuluka na wakufubila, atowanishiwile mabalamabala. Wengile mashentimita 229 muwipi, wengile ngonehe miwumbo nimwayo yaku shipango. 19Pe wemaninine ku zimpangwa zinaa na tupona tunaa twa lubemba. Tuhanto twazo na bya kufwika hayilu yazo na mbangilo zazo byafuliwile ha shiliva. 20Pe zimpimpi nimwazo za ntanda na shipango zafuliwile ha lubemba.
Byondo batendeshele ku Ntanda ya shikungulukilo
21Ou niwo wingi wa byondo batendeshele ku ntanda ya wupaki. Moshesha niye wabatongwezele kubilaba, pe Balevi babilabile na kufundiziziwa kwa Itama mwana mukankombela Aloni.
22Mbezalela mwana Uli, muzukulya Hula waku mushobo wa Yunda, watendele byuma nimwabyo biya atoyele Nyambi ya Ngula kuli Moshesha. 23Pe mukakumuyavwa wengile Oholiyaba mwana Ahishamaki waku mushobo wa Ndani, wengile wamanono mu kumangula na mu ku fundika na mu kushinta makwiza amawahe a kulelema hamo na wutonge wawuhombo na wa kufumbuluka na wakufubila.
24Ngolinde nimwayo eye bafungwilile kuli Nyambi yaku Ntanda ya Shizila yengile makilo 1,000 kufwanikiza na wulemu watoyiwanga waku Ntanda ya Shizila. 25Shiliva yafumine kubaya balabiwile ku shikungulukilo yengile makilo 3,430 kufwanikiza na wulemu watoyiwanga yaku Ntanda ya Shizila, 26pe wingi owe wakumine ha wingi wa balume nimwabo behaniwile mu kulabiwa, muntu na muntu wapanine ebye byashingiwilenga. Byafwanikiziwile ku wulemu watoyiwanga ku Ntanda ya Shizila. Bekalile kukulabiwa obo ba myaka yabo yabalikilile ha makumi abili na kupitakana bengile balume 603,550. 27Shiliva ya makilo 3,400 niyo batendeshele tupona twa mwanda twa ku Ntanda ya Shikungulukilo na shibaamba, pe wulemu wakukuma ku makilo 34 kapona na kapona. 28Shiliva washalileko wawulemu wa makilo 30, Mbezalela wafulileho mbangilo na tuhanto twa ku zimpangwa na bya kufwika hayilu yazo. 29Lubemba olu bafungwilile kuli Nyambi ya Ngula, lwa kumine ku makilo 2,425. 30Pe watendeshele tupona twa ku menginino a ntanda ya shikungulukilo na nolu lubemba na kaala ka lubemba na luhalo lwako lwa lubemba na byuma nimwabyo bya ku kaala, 31na tupona twa shipango na twa ku menginino a shipango na zimpimpi nimwazo, za ntanda na za shipango za kuzingwilishako.
Currently Selected:
Kututika 38: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
