Kututika 39
39
Kutunga bivwalo bya bakankombela
(Kututika 28:1-14)
1Niho batungile bivwalo bya manono ebye bavwalilenga bakankombela, ha kutenda mulimo mu mwanya washizila. Batungile ha wutonge wawuhombo na wakufumbuluka nawa kufubila. Batungile bivwalo bya Aloni bya Mukankombela ngonehe Nyambi ya Ngula atongwezele Moshesha.
2Pe kami batungile kakobelo kashizila na likwiza lyaliwahe lya kulelema hamo na wutonge wawuhombo na wakufumbuluka na wakufubila na wutonge wa ngolinde. 3Niho bafulile mapapi amahehu a ngolinde na shikoma, pe bawatabwezele ngayi enge nyimbwa za kupohela za kutungila hamo na likwiza lyaliwahe lya kulelema na wutonge wa wuhombo na wakufumbuluka na wakufubila. 4Batungile tundombe tubili twaha bifuzi bya kakobelo ka shizila, otwe twanungiwilile kukwata ku zinkumo zato ngayi mwanga tukamangiwileko. 5Pe mukunzi wakupohela shiwahe wengile wakulifweka na kakobelo kashizila, wa kutungila hamo nako kwinga shuma shimo. Ngonehe Nyambi ya Ngula atongwezele Moshesha. 6Balembulwile tumamanya twa Onikishi, pe twayakiwile mu tukunzu twa ngolinde. Tumanya tuya twamanguliwile na manono hamo na mamango a mazina a bana ba Ishalela likumi na babili. 7Niho batutungilile ha tundombe tubili, twaha bifuzi twa kakobelo kashizila kwimanina mishobo likumi na yibili ya Ishalela, ngonehe Nyambi ya Ngula atongwezele Moshesha.
Kutunga kakwiza kaha kapumpo
(Kututika 28:15-30)
8Batungile kambandingwa kakutanga shiwahe, ngonehe mulimo wa kakobelo kashizila. 9Bakatungile kakwezekela hamo, pe bakavungile kabili, kengile wunene wa shikanzi sha liboko mu wutali na muwipi. 10Niho batungilileho mizila yinaa ya tumanya twatuwahe. Mu muzila wakutatika mwekalile kamanya ka lumbi na naka ka topazi na naka kangineta. 11Pe mu muzila wawubili mwekalile kamanya ka emelalundi na naka kashafwila na naka kandayimondi, 12pe mu muzila wawuhatu mwekalile kamanya ka yashinte na naka ka angate na naka ka amezeshiti, 13kami mu muzila wawunaa mwekalile kamanya ka mbeliyola na naka ka onikishi na naka ka yashipa. Twayakiwile mu tukunzu twa ngolinde, 14ha kamanya na kamanya ha tumanya likumi na tubili hamanguliwile mazina kwimanina mishobo likumi na yibili ya Ishalela. 15Pe kambandingwa kaha kapumpo bafulilileho zinketwana za ngolinde yayiwahe ya kutwesha kupohela ngonehe nyimbwa. 16Niho bafulile tukunzu tubili twa ngolinde na mahuzi abili a ngolinde, pe bakwatishile mahuzi abili kuyilu ya zinkomi zaha kambandingwa ka ha kapumpo. 17Niho bakwatishile zinketwana zibili za ngolinde ku mahuzi abili, 18kami bakwatishile zinkumo zibili zamina za zinketwana, ku tukunzu tubili kami mu nzila eye bazikwatishile kumbili ya tukobelo tubili twaha bifuzi ka shizila. 19Niho bafulile mahuzi abili a ngolinde naku wakwatisha ku zinkomi zibili, ku nceto ya kambandingwa kaha kapumpo kunkumo mukati kakobelo kashizila. 20Niho bafulile mahuzi abili kami a ngolinde, pe bawakwatishile ku nceto kumbili ya tundombe tubili twaha bifuzi twa kakobelo kashizila, hahepi na mungundo hayilu ya mukunzi wa kupohela shiwahe. 21Pe bakwatishile mahuzi a kambandingwa kaha kapumpo ku mahuzi a kakobelo kashizila na lunyimbwa lwa wuhombo. Nohobene ngayi kambandingwa kaha kapumpo mwanga kekale hayilu ya kapumpo ngayi mwanga kabule kushoboka ngonehe shiya Nyambi ya Ngula atongwezele Moshesha.
Kutunga bivwalo byamina bya bakankombela
(Kututika 28:31-43)
22Lyambangubo liya lya kuvwala ku nceto ya kakobelo kashizila, lyatungiwile nimwalyo na wutonge wawuhombo. 23Pe nibyo byekalile na litubwa lya kwingizamo mutwe. Litubwa elye lyekalile na mungundo waku shinta, wakuzingwilisha ku ncingo ngayi mwanga shikobelo shikabule kutabuka. 24Kami ku nceto ya mufumo ya lyambangubo bayakileko manzenze akutunga na likwiza lyaliwahe lya kulelema na wutonge wawuhombo na wakufumbuluka nawa kufubila. 25Batendele kami zingenjo ha ngolinde yayiwahe, pe bayakile zingenjo mukati ka manzenze kuzingwilisha mufumo wa lyambangubo. 26Batowanishile kami zingenjo na manzenze kuzingwilisha ku nceto ya mufumo wa lyambangubo, ngonehe Nyambi ya Ngula atongwezele Moshesha.
27Batungile kami bikobelo bya Aloni na bana bendi, 28hamo na kahoshi ka likwiza lyaliwahe lya kulelema lya kuzenga ku mutwe na tuhoshi twa likwiza lyaliwahe lya kulelema na tuputula twa kutungiwa ha likwiza lyaliwahe lya kulelema, 29hamo na kaponda ka likwiza lyaliwahe lya kulelema lya kupohela na wutonge wa wuhombo na wakufumbuluka na wakufubila na wakutanga mabalamabala ngonehe Nyambi ya Ngula atongwezele Moshesha. 30Niho bafulile kami kance ka munana wakuzila wa ngolinde yayiwahe shikuma na ku mangulaho ngayi “Kuyeleshiwa kuli Nyambi ya Ngula.” 31Pe bakamangilile kumbili ya kahoshi ka likwiza lya kuzenga ku mutwe na lunyimbwa lwa wuhombo, ngonehe Nyambi ya Ngula atongwezele Moshesha.
Kumaninina kwa mulimo
(Kututika 35:10-19)
32Eshe nisho yamanine milimo nimwayo ya Ntanda ya Shikungulukilo. Baishalela batendele byuma nimwabyo ngonehe eshe Nyambi ya Ngula atongwezele Moshesha. 33Niho baletele ntanda kuli Moshesha na byuma byayo nimwabyo na tuhanto twayo na maleenge wayo na mikambo yayo na zimpangwa zayo na tupona twayo. 34Baletele kami bya kufwikaho bya bitembe bya bikungwe ba bambelele bya kunyuka, bya kulomba kufubila na bitembe bya bitutunga bya kunyuka shiwahe na shibaamba sha kulama Likwati, 35na Likwati lya Kulimama Likwati lya Kulimama lya wupaki omu mwekalile matapa abili a limanya na mibanda yalyo na muhuko wa nceshe. 36Baletele kami na tebulu kami na byuma byayo nimwabyo na mankende akutupula kuli Nyambi, 37na lyeyeko lya mimuni lya ngolinde yayiwahe na mimuni yalyo na byuma byalyo nimwabyo na mazi akumunikisha, 38na kaala ka ngolinde na mazi akuwaba na incence ya livumba lyaliwahe na mu wumbo waku menginino a ntanda, 39na kaala ka lubemba na luhalo lwasho lwa lubemba na mibanda yasho na byuma byasho nimwabyo na lizawo na kapona kalyo, 40na miwumbo ya makwiza yaku shipango na zimpangwa na tupona na mu wumbo waku menginino na nyimbwa za kupohela na zimpimpi za ntanda na byuma nimwabyo bya mulimo wa muntanda. 41Baletele kami bivwalo bya kutunga na manono byabiwahe bakavwalenga bakankombela oho bakatenda mulimo mu mwanya wa shizila. Ebye binengi bivwalo bya shizila bya mukankombela Aloni na bana bendi. 42Baishalela batendele milimo nimwayo ngonehe eshe Nyambi ya Ngula atongwezele Moshesha. 43Pe Moshesha wahengwele byuma biya batendele, wamonene ngayi nimwabyo byatendiwile ngonehe eshe amutongwezele Nyambi ya Ngula, pe Moshesha wabafuywele.
Currently Selected:
Kututika 39: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
