Kututika 37
37
Kutenda Likwati lya Kulimama
(Kututika 25:10-22)
1Mbezalela wabazile Likwati lya Kulimama ha mutondo wa mumbambangoma, mu wutali walyo lyengile mashentimita 114, muwipi walyo lyengile mashentimita 69, kami mumwimo walyo lyengile mashentimita 69. 2Pe walifwikile na ngolinde yayiwahe mukati na ha munkanda, pe walizingwilishile mufumo wa ngolinde kunkumo yalyo nimwako, 3niho afulilileko mahuzi akulikulikila anaa a ngolinde yayiwahe na kuwayaka ku mawulu walyo anaa, mahuzi abili ku mbalila na mbalila. 4Wabazile mibanda ya ku kulikila ya mutondo wa mumbambangoma, wayifwikile na ngolinde. 5Pe kami wayingizile mu mahuzi a Likwati. 6Niho kami afulile muhuko wa nceshe wa ngolinde yayiwahe, wa mashentimita 114 mu wutali na muwipi wawo kupitakana mashentimita 69. 7Wafulile makelumbi abili a ngolinde, 8likelumbi limo kunkumo na kunkumo ya muhuko. Pe wa wafulile ngayi akenge shuma shimo na muhuko. 9Makelumbi alipenzele limo na lyamina hayilu ya muhuko na mbando zawo za kutandubuka zafwikile muhuko.
Kutenda Tebulu ya Mankende akutupula kuli Nyambi
(Kututika 25:23-30)
10Mbezalela wabazile tebulu ha mutondo wa mumbambangoma ya mashentimita 91 na mashentimita 46 muwipi namu mwimo washo mashentimita 69. 11Niho ayifwikile na ngolinde yayiwahe pe wafulilileko mufumo wa ngolinde wakuyizingwilisha. 12Wayifulilile mubalo, wunene wawo ngonehe shikandi sha liboko lya muntu, pe wazingwilishileko mufumo wa ngolinde. 13Wafulile mahuzi anaa a ngolinde pe wayakile ku zinkomi za tebulu zinaa ku mawulu. 14Mahuzi akukwata mibanda ya ku shimbila tebulu ayakiwile hahepi na mubalo. 15Wabazile mibanda ya mutondo wa mumbambangoma, pe wayifwikile na ngolinde. 16Watendele bikwatilo bya ngolinde yayiwahe byaha tebulu na zindonga za kuhelukila na zindonga za kukunama na zinkomoki na zintesho za kutendesha nkombela ya waine.
Kutenda lyeyeko lya Mimuni
(Kututika 25:31-40)
17Mbezalela wafulile kami lyeyeko lya mimuni lya ngolinde yayiwahe. Wafulile kapona kalyo na mukoto walyo ha ngolinde yakufula na shikoma na zintemo za kuyengiwa za makolwa na zintemo, nimwabyo byengile shuma shimo. 18Pe myahi mutanu na umo yashonkomanine ha zimbalila zalyo, yihatu mbalila yimo na yimo. 19Ku mwahi na mwahi waku myahi mutanu na umo kwekalile zintemo za kuyengiwa za makolwa na zintemo. 20Pe lyeyeko lya mimuni yinaa lyekalile na zintemo za kuyengiwa za kufweka ngonehe zintemo za alimonde za ku shamuna na makolwa na zintemo. 21Pe ku myahi mutanu na umo kwekalile likolwa limo na limo ku nceto ya mwahi na mwahi. 22Makolwa na myahi na lyeyeko lya mimuni byafuliwile hamo kwinga shuma shimo, ha ngolinde yayiwahe. 23Pe kami watendele mimuni mutanu na yibili yaha lyeyeko lya mimuni, kami wafulile zimanya na meyeko walyo a ngolinde yayiwahe. 24Niye walitendeshele wulemu wa ngolinde yayiwahe ya kukuma ku makilongilamu 34 ha kufula lyeyeko lya mimuni na bingwalingwali byalyo nimwabyo.
Kutenda Kaala kakuhokeshela incence
(Kututika 30:1-5)
25Wabazile kaala ka mutondo wa mumbambangoma ka kuhokeshela incence. Kengile ka kufwanikizila hamo, mu wutali wako kengile mashentimita 46 na mashentimita 46 muwipi, kami mwimo wako kengile mashentimita 91. Ncengo zako za ku zinkomi zinaa zengile shuma shimo na kaala. 26Wakafwikile hayilu yako na kuzimbalila zako nimwazo zinaa na ku ncengo zako na ngolinde yayiwahe, kami washizingwilishile na mufumo wa ngolinde. 27Niho afulilile mahuzi abili aku kulikila a ngolinde na kuwayakila ku nceto ya mufumo ha zimbalila zibili, mwakukwatila mibanda ya kukakulikila. 28Pe wabazile mibanda ya mutondo wa mumbambangoma, niho ayifwikile na ngolinde.
Kuyengula mazi akuwaba na incence
(Kututika 30:22-38)
29 #
Kut 30:22-38. Wayengwile kami mazi ashizila akuwaba na incence ya livumba lyaliwahe ngonehe mulimo wa muka ku vwela shiwahe lukumba.
Currently Selected:
Kututika 37: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
