Eshita 8
8
Bayunda bakubweshela wubi ku wubi
1Ha mutena uyo bene Mwene Zekishi wapanikile ntutu ya kamalamo wa Bayunda Hamani kuli Lihano Eshita. Eshita watongwezele mwene ngayi Mondikayi wenga kawushinda wendi, pe Mondikayi wetabilishiwile kwiza ku meho a mwene. 2Mwene wafumishile kambalamunwe kendi kekalile na limango, kaya ayangwile Hamani, pe wakapanikile kuli Mondikayi. Eshita wayakile Mondikayi mu wukulwane wa ntutu ya Hamani.
3Niho Eshita awilile ku mawulu a mwene na kulila. Pe wanyepele mwene na kumulambilila ngayi amanishe shiyongo shashibi sha Hamani muzukulya Angange, eshe ayongwele kulwisha Bayunda. 4Mwene niho atabikizile muwana wendi wa ngolinde ou wekalile mu liboko lyendi kuli Eshita, nohobene Eshita wemanine, pe wambile ngayi, 5“Hekulu, ndi shikukuwahilisha, ndi ami nayamiziziwi kukwobe, pe kami ndi shashiwahe kukwobe, hekulu, bilika lukuwa lwa kukanisha ndayano za Hamani mwana Hamendata muzukulya Angange ngayi zibule kutendiwa, ziya ndayano za kunongesha Bayunda nimwabo mu matunga wobe nimwawo. 6Haya nikutwesha nahiti ku shuma mutima ha ku mona ndi awa makando akwiza ha bawushinda wami kami ndi bawushinda wami ba kuzihiwa?” 7Niho Mwene Zekishi ambile kuli Lihano Eshita na Mondikayi, wa Kayunda ngayi, “Mona. Nashwanga Hamani ha lubeta lwendi lwa kulwisha Bayunda. Pe napaniki Eshita ntutu yendi. 8Ngoboni lukuwa lunabilikiwi mu lizina lya mwene na kukantiwa na limango lya wene kutwesha kufutuliwa lufwako. Hinge noho, mu kutwesha kutikita lukuwa lwamina ku Bayunda eshe nimwasho mukushinga, kami mu kutwesha kutikita mu lizina lyami na kukantako na limango lya wene.”
9Eshe shatendiwile ha mutena wawumakumi abili na ahatu wa ngonda wawuhatu, ngonda wa Zibani#8:9 Mu shihebelu, mu shinkoya Shiyenge. Mondikayi wehanine bakakutikita ba mwene na kubatongweza ku tikitila mañwati ku Bayunda naku batulela na bakakwendesha litunga na babilolo nimwabo ba ku matunga 127, ku balika ku Indiya kukakuma na ku Kushi. Awa mañwati atikitiwile ku litunga na litunga ngo ntikitilo ya lulimi lwabo naku Bayunda ngo ntikitilo ya lulimi lwabo. 10Mondikayi watikitile mañwati mu lizina lya Mwene Zekishi na kukantiwa na limango lya wene. Niwo atwaliwile wanguwangu na bakakukandama ha bambishi bakwituka shikuma bafumine mu matanga a wene.
11Awa mañwati atontwelele ngayi mwene ukwitabila Bayunda mu munzi na munzi kuwana nzila yakulilamwina nibo bamwine. Ndi nibo ba kulwishiwa ku bamalamo, winge mukoka ngani, hinge ndi mukoka ngani, linge litunga ngani hinge ndi litunga ngani, ba kutwesha kubalwisha na ku baziha na kubalobesha hamo na bakazabo na bana babo. Bakutwesha ku baziha nimwabo kukuma ku muntu wakumanishila na kupukula wuheti wabo nimwawo. 12Lukuwa olwe lwatweshele kutendiwa mu matunga nimwawo a mwene wamu Pesha ha mutena wemikiwile wakuziha Bayunda, mutena wawulikumi na ahatu wa Anda#8:12 Anda: Mu shihebelu, mu shinkoya Yowayowa. ngonda wawulikumi na zibili. 13Lukuwa lwabilikiwile kwinga ndayano na kulimukiwa ku bantu nimwabo bamu matunga nimwawo a Pesha, ngayi Bayunda mwanga batweshe kubweshela wubi ku wubi ku bamalamo babo oho mutena uyo ukakuma. 14Pe bakakukandama ha bambishi ba mwene, betukile lubilo lwalunene ngo ku ndayano za mwene. Ndayano kami zabilikiwile mwaana ncanana mu lukena lwalunene lwa Shusha.
15Niho Mondikayi atutikile mu musheke ku meho a mwene, hinga avwala bivwalo bya wene byabitali bya wuhombo na bya kutuba na likwiza lya kulelema lya kufumbuluka na munana wawuwahe wa ngolinde. Pe mumikwakwa yamu Shusha mwayuvwanikile tunkelenkele twa ku wahilila. 16Ku Bayunda kwekalile ku wahilila na kupwezuluka na kutangala hamo na kuliyuvwa wuwahe ngayi banakomo. Pe bawanine maleema ku bantu nimwabo. 17Mu matunga nimwawo namu minzi nimwayo, oku kwakumine lukuwa lwa mwene, Bayunda bekalilenga na mutena wakukatala na waku wahilila na kulya mayambwayambwa na kutangala. Mwa shikuma, bantu babengi ba mishobo yashenge ha shikati eshe bafutukile kwinga Bayunda, ndaba bekalile na bowa ha Bayunda.
Currently Selected:
Eshita 8: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.