Eshita 7
7
Hamani uli na kuzihiwa
1Niho mwene na Hamani benginine mu kulya mayambwayambwa hamo na Eshita, 2ha shikati sha wubili. Oho banwinenga waine mwene wepwile Eshita ngayi, “Haya, obe Lihano Eshita, ukulambilila shumangani kukwami? Ntongweze pe ukushiwana, Nikakupanika hinge shitika sha litunga lyami.”
3Lihano Eshita wakumbwile ngayi, “Ndi hekulu ami nayamiziziwi kukwobe, kami ndi shikukuwahilisha, yitabila kulambilila kwami, nikushinga ngayi uyoyeshe wumi wami, pe kami uyoyeshe wumi wa bawushinda wami. 4Ami na bawushinda wami twalandishiwakale ngayi tuzihiwe na kulobeshiwa. Shinga shenga tuhu sha kutulandisha ngayi tuye mu wulungo balume nanetu bambuyama, shinga namwene tuhu nee. Shinga kwiza na kuka bakanisha mwene nifwako. Ndaba makando wetu afwako kutwesha kufwanikiziwa na kuyawa kwa mwene ndi nimwetu tukunongeshiwa kulungu.”
5Niho Mwene Zekishi epwile Lihano Eshita ngayi, “Kati yani ou unazamuku kutenda shuma sha nehe? Pe kami muntu ou uli kuti?”
6Eshita wakumbwile ngayi, “Kamalamo wetu, mukakutuyandisha, unengi owe muntu wakuluwa Hamani.”
Hamani wekalile na bowa kuli mwene na lihano. 7Mwene wakatukile na kuvundangila, niho afumine mu kampenci pe wayile ha munkanda ku mwanya wa maluba aku musheke. Hamani watweshele ku mona ngayi ha shuma eshe mwene ukufunga ngayi amushushule nohobene washalile mu kunyepa Lihano Eshita ngayi amuyoyeshe.
8Oho mwene afuminenga mu mwanya wa maluba aku musheke kwingina mu kampenci, kuwana Hamani ha kwinga aliyumbile ku shipona sha Eshita sha kuyendamina, mu kunyepa kumuyuvwilako nceshe. Ha ku mona nehe, mwene wabilikile ngayi, “Kati ou mulume uli na ku kilukila lihano kuno kumbili yami, muno mu musheke ndi?” Oho mwene amanishile kwamba, Hamani bamufwikile.
9Niho umo hakati kabo ou watumbiwile Hambona wambile ngayi, “Hamani bene hinge atende nehe wazikakale bitondo byabitali bya kuzihila bantu ku litala lyendi ngayi mwanga atweshe kuziha Mondikayi, ou wakutongwezele na kupulwisha wumi wobe obe hekulu, Nibyo wutali wabyo binengi bya mamita 22.” Mwene wabatongwezele ngayi bakashwangileho Hamani.
10Nohobene Hamani wazihiwile ku biya bitondo azikile ngayi mwanga azihileho Mondikayi. Niho mwene abweshelemo mutima.
Currently Selected:
Eshita 7: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.