Eshita 9
9
Bayunda ba kunongesha bamalamo babo
1Pe mutena wawulikumi na ahatu wa ngonda wa Anda wakumine. Ou wengile mutena wakutenda lukuwa lwa mwene, mutena uya bamalamo ba Bayunda bahanganikile ngayi ba kuyaka Bayunda mu ngovu zabo. Ngoboni haya Bayunda bafutukilile bamalamo babo. 2Mu minzi nimwayo yamu litunga lya mwene Zekishi ku zimbalila oku bazikile Bayunda, balihongele ngayi balwishe muntu nimwendi ou washingile kubalwisha. Pe bantu bashenge ku zimbalila nimwazo babatinine, kami kowa muntu watweshele kwimana na kubalwisha. 3Mwa shikuma nimwabo babilolo bamu matunga na batulela na bakakwendesha litunga na bakakwimanina mu wene, bayavwile Bayunda, ndaba nimwabo batininenga Mondikayi. 4Ndaba mu litunga nimwamo, Mondikayi walimukiwile ngayi wengakale muntu wa ngovu shikuma ku musheke, kami mpupo yendi yanenehele shikuma. 5Nohobene Bayunda batweshele kutenda ebye bashingile nimwabyo ku bamalamo babo. Babalwishile na mikwale, pe babazihile.
6Mu lukena lwalunene lwa Shusha, Bayunda bazihile bantu myanda mutanu. 7Hakati ka baya bazihile hekalile Pashandata na Ndalufoni na Ashipata, 8na Polata na Andaliya na Alindata, 9na Pamashita na Alishayi na Alindayi na Vayizata, 10Bengile bana ba Hamani mwana Hamendata babalume likumi, kamalamo wa Bayunda. Ngoboni Bayunda kaliha bapukwile wuheti.
11Wa uya mutena bene wingi wa bantu bazihiwile mu Shusha bashimikiwile kuli mwene. 12Niho mwene ambile kuli Lihano Eshita ngayi, “Mu Shusha tuhu ninkayamo Bayunda banazihi bantu myanda mutanu, kufungila kumo na bana ba Hamani likumi. Hayabo mu matunga amina bafwanina kuziha ba kukuma hati. Haya obe Lihano Eshita ukushinga bishini? Ntongweze ebye ukulambilila kami, pe ukabiwana.”
13Eshita wakumbwile ngayi, “Hekulu ndi shikukuwahilisha, ba Yunda bali mu Shusha betabile bakatende kami eshe nzona, ngonehe banetabilishiwi kutenda lelo. Kami yitabilisha zinyutu za bana ba Hamani likumi mwanga zishwangiwe ku bitondo.” 14Niho mwene ambile ngayi eshe shitendiwe, pe lukuwa lwabilikiwile mu Shusha. Nohobene zinyutu za bana ba Hamani likumi zashwangiwile. 15Ha mutena wawulikumi na anaa mu ngonda wa Anda Bayunda bamu Shusha balikungwile hamo kami, pe bazihile bantu bamu lukena myanda yihatu. Ngoboni nibo kaliha bapukwile wuheti.
16Bayunda bamu matunga amina kami balihongele pe balilwililile nibo bamwine. Balilamwinine ku bamalamo babo nakuziha bantu 75,000 aba babazimbilenga. Ngoboni kaliha bapukwile wuheti. 17Eshe shengiwile ha mutena wawulikumi na ahatu wa ngonda wa Anda. Oho kwashile ha mutena wawulikumi na anaa, pe kaliha kwekalile kami kuziha bantu, mutena uyo bawutendele kwinga mutena waku wahilila wa mayambwayambwa. 18Bayunda bamu Shusha, bakatalile ha mutena wawulikumi na mutanu, ndaba ngayi ha mutena wawulikumi na ahatu na mutena wawulikumi na anaa niwo matena bazihile bamalamo babo, pe balehelesho ha mutena wawulikumi na mutanu. 19Eshe nisho shuma shiya Bayunda aba bekala mu minzi ya kwakutali na lukena, bakatalanga ha mutena wawulikumi na anaa wa ngonda wa Anda kwinga mutena waku wahilila nawa mayambwayambwa na kulipanika bishemo ku umo na wamina.
Shimbo sha Pulimi
20Mondikayi watikitile byuma ebye nimwabyo. Pe watumine mañwati ku Bayunda nimwabo, bakwakwipi na bakwakutali, mu matunga nimwawo a Mwene Zekishi, 21kubatongweza ngayi mutena wawulikumi na anaa na mutena wawulikumi na mutanu wa ngonda wa Anda, awa matena alamiwe kwinga aku katala ha mwaka ha mwaka. 22Awa matena niwo Bayunda batweshele bamalamo babo, niye wengile ngonda wa malwa na kulihupwiza, ngoboni wafutukile kwinga shikati sha ku wahilila na kutangala. Batongwezewile ngayi balame awa matena kwinga a mayambwayambwa na ku wahilila na kulipanika bishemo ku umo na wamina naku bakakushepwa. 23Nohobene Bayunda bakonkele kufundiziza kwa Mondikayi, pe bafutwile shimbo kwinga shiheka shaha mwaka ha mwaka.
24Hamani, mwana Hamendata, muzukulya Angange, kamalamo wa Bayunda nimwabo, wakunine nyela, eye yatoyiwile ngayi Pulimi, mukwimika mutena wakunongesha Bayunda, wafungile ngayi abalobeshe nimwabo. 25Ngoboni oho Eshita ayile kuli mwene, pe wubi ou afungile Hamani ha Bayunda wamubokelele, pe niye na bana bendi bashwangiwile ku bitondo. 26Eshe nisho shuma shiya matena aya aku katala atumbiwile ngayi Pulimi, likufuma ku lizu lya “Puli,” ndaba ya liñwati lya Mondikayi, hamo na nebye nimwabyo byatendiwile kukwabo. 27Bayunda batendele shuma eshe nibo bamwine na bazukulyabo na nimwendi ou ukafutuka kwinga Kayunda, ngayi ha mwaka ha mwaka shikati sha kulama aya matena abili shikalamiwenga ngonehe kukufundiziza kwa Mondikayi. 28Kwawahishiwile ngayi ba lupashi lwa Bayunda nimwabo ku bihemwinino bya kumbili, mu matunga nimwawo namu minzi nimwayo, bakafwanina kwanukanga na kulama matena a Shimbo sha Pulimi.
29Niho Lihano Eshita mwana Ambihayile, hamo na Mondikayi wa Kayunda, batikitile kami liñwati, lya kupana ngovu ha liñwati elye atikitile Mondikayi ha kutatika lya Shimbo sha Pulimi. 30Liñwati elye lyatikitiwilile ku Bayunda nimwabo na mañwati akulifweka atumiwile mu matunga nimwawo 127 mu wene wa Zekishi. Nilyo lyashingile ngayi Bayunda bekale shiwahe mu ku mwena, 31na kubafundiziza kulama matena na shikati sha shimbo sha Pulimi, ngonehe shiya balamine ndayano za kuzila kulya na kwikala na bikati bya malila. Ndayano eze waziyakile Mondikayi wa Kayunda na Lihano Eshita. 32Ndayano za Lihano Eshita zashumishile kufundiziza kwa kulama shimbo sha Pulimi, pe zatikitiwile mu libuka.
Currently Selected:
Eshita 9: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.