Amoshi 6
6
Kulobeshiwa kwa Ishalela
1Makando wenu enu muli mumpoza mu Ziyoni naku nenu mu kuliyuvwa ngayi munekala shiwahe ha lipili lya Shamaliya, bantu ba kutumbalala ba ku mukoka wa hayilu ya mikoka nimwayo, oku bezanga baka litala lya Ishalela ngayi babayavwe. 2Mwambile ku bantu ngayi, yenunga mukapenze ku munzi wa Kalina, mwakafumako pe mukakume naku Hamati wawunene, niho kami mukaye ku Ngati mu litunga lya Bafwilishitina. Kati eye minzi yayiwahe shikuma kupitakana wene wetu wa matunga abili ndi? Kati litunga lyabo lyalinene kupitakana litunga lyetu ndi? 3Kaliha mwakulupilanga ngayi mutena wabyabibi ukeza, ngoboni ebye mwatendanga byawuhenyeshelanga hahepi. 4Makando wenu enu mu kulala ha malili anayaliwi mayewe a banzovu na kwalamina mu bipona byenu bya mihamino. Mukulya nyama ya bana babambelele na bana ba zingombe ba kushuwa. 5Mukwimbila nyimbo zowa ha tumbuli. Mukulitendela tuhanzi twa kumbeta enu bamwine ngonehe atendelenga Ndavita. 6Mukunwina waine mu zindonga za kukunama, mu kuliwabisha mazi amawahe shikuma, ngoboni kuyuvwila wunginga ha kuloba kwa Ishalela mufwako. 7Nohobene enu mukenga bakutatika kuya mu wuntapwa, pe mukeyu wenu mwalamininenga mu bipona ukamana.
8Nyambi wa Makunge, Nyambi Wangovu Nimwazo unalibeze niyemwine ngayi, “Kuliyemeza kwa Yakobo kunandetele wunyengwe. Pe nazimbi bipata byendi, nikapanika munzi na baya balimo nimwabo ku bamalamo.”
9Ndi bantu likumi bakashala mu litala limo nabo kami bakafwa. 10Ndi kawushinda wa muntu, uya ukamuhokesha, ukeza mu kututwisha bifupa mu litala, niho ukepula uya uli mu kampenci ka litala ngayi, “Kati kushili umo uli hamo nanenu ndi?” Ukakumbula ngayi, “Byo,” pe ukamba ngayi, “Mwena, kaliha tunafwanini ku toya lizina lya Nyambi ya Ngula.”
11Mona! Nyambi ya Ngula unakulayelela ngayi matala amanene na nawa amashe, nimwawo akanyemuniwa. 12Kati bambishi ba kutwesha kwituka ha mamanya ndi? Muntu ukutwesha kulima mu liwate na zingombe ndi? Ngoboni enu munafutulu kuyata kwakwoloka kwinga wulembe na mbuto ya kwoloka kwinga mutondo wawululu.
13Enu mu ku wahilila ha kukoma Londemba na kwamba ngayi, “Nka twakomene Kalanaima na ngovu zetu ndi?”
14Ebye nibyo anakwamba Nyambi ya Ngula, Nyambi wa Makunge ngayi, “Haya monenu, enu baka litala lya Ishalela, nikatumeza litunga kwiza na kumi lwisha, pe bakamiyandisha ku balika ku menginino a Hamati ku ncelele, kutwala naku mukulo wa Alamba ku mabukubuku.”
Currently Selected:
Amoshi 6: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
