Amoshi 5
5
Kulambilila Bantu ngayi Batenguluke
1Yuvwililenu ku lwimbo lwa malila nikwimbila kukwenu hinilila, enu baka litala lya Ishalela.
2“Mushimbi Ishalela unawu wulukutu,
kami kukapindukamo wufwako,
unakendiwi mu litunga lyendi,
kami kukabula wamina wakumupindula.”
3Eshe nisho anakwamba Nyambi wa Makunge ngayi, “Lukena luya lukatuma likulukazi lya bantu ku nzita, kukaboka tuhu mwanda. Lukena luya lukatuma mwanda ku nzita kukaboka tuhu likumi ku baka litala lya Ishalela.”
4Eshe nisho anakwamba Nyambi ya Ngula ku baka litala lya Ishalela ngayi, “Yekenu kukwami ngayi mwanga muyoye, 5hinga muya na kuncingila mu Mbetele, hinge kwingina mu Ngilingale. Hinga muya mu Mbelishemba, ndaba mwa shikuma Ngilingale ukaya mu wuntapwa na Mbetele ukashala tuhu mapembe.”
6Yekenu kuli Nyambi ya Ngula ngayi mwanga muyoye, ndelewa ukeza ku baka litala lya Yoshefwa ngonehe mundilo, ukahokesha Mbetele, pe kukabula wakuwuzima. 7Obe ukufutula kuyata kwakwoloka kwinga ngonehe mutondo wawululu na kuleha kwamba byakwoloka.
8 #
Yobo 9:9; 38:31. Shingenu ou walengele nyenye za muyilu,
na mulalanginza.
Ou ukufutula mincimpwe kwinga mwaana,
Ou ukushipisha mutena na kuwinga wushiku.
Ou ukushimba mema amu liwate na kuwayitila ha lukandwa,
Nyambi ya Ngula nilyo lizina lyendi.
9Ou ukulobesha bangovu wanguwangu,
na kunyemuna munzi uli mu shipata.
10Baishalela ba kuzimba muntu ukwamba shintwantwa, ou ukuyata mu kupwisha. 11Nohobene, mu kulyatilila ba kushepwa na kubakandamika ngayi bamipane mbuto. Munalizikili matala amawahe, ha mamanya ngoboni kukekalamo mufwako. Munashanga mikabo ya shinyanca, ngoboni ku kanwa waine yaneye mikabo mufwako. 12Ndaba nalimuku wingi wa milandu yenu nawunene wa wubi wenu. Muna kutambula lizika kanwa na kuyandisha bantu bakubula mulandu na kubula kuyata shiwahe byambo bya bakakushepwa. 13Nohobene, bantu ba kubomba bakabula kukumbula ha shikati shanehe, ndaba shinengi shikati shawubi.
14Shingenu byabiwahe na kukana wubi ngayi mwanga muyoye. Pe Nyambi ya Ngula, Nyambi wa Makunge, ukekala nenu, ngonehe mwambanga. 15Zimbenu wubi, pe muhake byabiwahe, ngayi mwanga muyate na kupwisha mu zinkuta, kampe Nyambi ya Ngula, Nyambi wa Makunge, ukayuvwila nceshe mashaliza a bana ba Yoshefwa.
16Haya ebye nibyo akwamba Nyambi ya Ngula, Nyambi wa Makunge ngayi, “Mu zimbanza nimwazo mukekala mbingo namu zinzila nimwazo kukayuvwanika malila. Bakehana bandimi ku malila hamo na baya balimuka tukonkobele. 17Pe mu mafuba a mikabo ya shinyanca mukekala mbingo, ndaba nikapita mukati kenu na kumishushula.” Ebye nibyo anakwamba Nyambi ya Ngula.
18Makando wenu, enu mu kutatilila mutena wa Nyambi ya Ngula. Shumangani mu kushingila mutena wakuyata kwa Nyambi ya Ngula? Ndaba ha mutena uyo kukekala mincimpwe, liyeye kukekalako lifwako. 19Shikenga ngo muntu ukutina shimbwi pe ha kulihangana na mbeya, hinge ndi ukwingina mu litala na kukwata ha limota pe ha kuhumiwa ku liyoka. 20Kati mutena wa Nyambi ya Ngula ukenga tuhu mincimpwe kwakubula mwaana, ukenga tuhu wa kambukwe wakubula kuyeluluka ndi?
21 #
Isha 1:11-14. “Nazimba na ku shampula bimbo byenu bya wunyambi. Kutwesha ku wahilila mu bikungulukilo byenu nifwako. 22Hinge ndi mu kutupula zintupu zenu kukwami, za kuhokesha na za mpeka, kukazitambula nifwako na zintupu zenu za kulilumikila za bimuna benu ba kushuwa, kukapenzako nifwako. 23Fumishenu miyoyo ya nyimbo zenu kukwami, kami kukayuvwilila ku maleenda a tumbuli twenu nifwako. 24Kuyata na kupwisha ku kunkulenga ngonehe mushinzi, pe kwoloka kukalifweke ngo kashinzi kakubula kuyuma.
25 #
Mil 7:42, 43. “Enu baka litala lya Ishalela, oho mwandetelelenga zinkombela na zintupu mu myaka makumi anaa mu libelelengwa. 26Kati mwakatwile kaala ka nyambi Shakuti na Kayiwani nyambi yenu wa lunyenye na tunankishi twenu otwe mwatendele enu bamwine ndi? 27Nohobene nikamitwala mu wuntapwa kupitakana Ndamashika.” Eshe nisho akwamba Nyambi ya Ngula, lizina lyendi Nyambi wa Makunge.
Currently Selected:
Amoshi 5: LLK
Highlight
Copy
Compare
Share
Want to have your highlights saved across all your devices? Sign up or sign in
Libuka Lya Kuyela © Bible Society of Zambia, 2020.
