Milimo 27

Paulu ukutwaliwa ku Loma

1Oho kwalimukiwile ngayi tukaya ku Itali na shishepe, bapanikile Paulu na batuyili bamina kuli mukakutwaminina banzita, lizina lyendi Njuliyashi, wa kazunga ka banzita kakutumbiwa ngayi Ongashitashi Kohoti. 2Twenginine mu shishepe sha kumine ku Andilamatiyamu, eshe shafwanina kukulisha lukandwa lwa mu litunga lya Esha, pe twavuwile. Alishitakashi waku Teshalonika mu Mashendoniya wekalile netu.

3Kwashile twakumine ku Shindone. Njuliyashi wekalile na nceshe na Paulu, wamuyitabilishile kuya ku bahoni bendi ngayi bakamuyavwe. 4Oho twafuminemo twakulishile shikuli sha Shayipulashi ndaba ya mpepo yakandikile shishepe. 5Niho twazabukile liwate ku nkumo ya Shilisha na Pamfwiliya, twafuwukile mu Mila, munzi waku Lishiya. 6Omu mukakutwaminina banzita wawanine shishepe shafumine ku Alekizandiliya shayilenga ku Itali, niho atwingizilemo.

7Twendele shashishe matena amengi, twakumine hahepi na Kininda. Mpepo yatukwangishile, twapitile ku shikuli sha Kilete, ku mbalila ya Shalimone. 8Twakulishilenga ku shibumbo na ku zumanana, twakumine ku mwanya watumbiwile ngayi Makobo Amawahe, hahepi na munzi wa Lasheya.

9Twamanishile shikati shashitali na Mutena wa Kuzila Kulya wapitile. Ha shikati osho shengile sha kutinisha kwenda mu shishepe. Niho Paulu abatongwezele ngayi, 10“Enu bawushinda, ninamono ngayi mukala wetu ukenga wa malamo. Byuma byabingi bikabipa ku ntutu na shishepe, kami na bantu bakafwa.” 11Ngoboni Njuliyashi wayuvwililile ku mukakutwaminina shishepe na mwinewasho, kaliha ebye ambile Paulu. 12Ndaba shibumbo kaliha shengile shashiwahe kwikalamo shikati sha mupepo, bantu babengi bashingile ngayi bafumemo, ngayi ndi shikutwesheka bakakume ku Fonikishi na kwikalako mupepo. Fonikishi shengile shibumbo sha mu Kilete, shatilamina ku mabukubuku aku mponci na mu ncelele aku mponci.

Nkuli ha liwate

13Mpepo ya ku mponci yatatikile kupepoka shiwahe, bantu bahanganikile ngayi ba kutwesha kutenda ebye bayongwele. Bafuwile, pe bavuwile na kukulisha ku shibumbo sha Kilete. 14Ngoboni wanguwangu mpepo ya nkuli yatumbiwile “Yulokwilo” yatatikile kupepoka kufuma ku lukandwa. 15Mpepo yakamine ha shishepe, ndaba kaliha twatweshele ku kandika mpepo, twalehele, pe shishepe shakukile na mpepo. 16Oho twakumine hahepi na shikuli shamina sha Kaunda. Niho twatweshele kukoka kawato kakokiwilenga na shishepe, ngayi hinga kabipa. 17Uya wato bawukokelele mu shishepe, niho bakakuvuwa bamangile shishepe na nyimbwa. Batinine ngayi ba kutapila ku shibumbo sha Limbiya.#27:17 Limbiya: Mu shingiliki niyo Shilitishi. Bawishile likwiza, pe shakukile na mpepo. 18Nkuli yanenehele shikuma, kwashile bayumbilile byuma bimo mu mema, 19pe ha mutena wa wuhatu bayumbilile byuma bya shishepe mu liwate. 20Kaliha twamonene mutena hinga nyenye matena amengi, ngoboni nkuli yanenehele, twayongeshele kulumbeza nimwako kwa kupuluka.

Paulu ukushumankanisha mitima baminendi ha mukala

21Munyima ya kuzila kulya shikati shashitali, Paulu wemanine hakati kabo wambile ngayi, “Balume, shinga mwayuvwa ebye namba na kubula kufuwika ku Kilete, shinga byuma kubipa na kuyongala bifwako. 22Ngoboni haya nikumitongweza ngayi mushume mitima! Ndaba kowa hinga umo ukafwa, ngoboni kukayonga tuhu shishepe. 23Ndaba wushiku kweza lingeloyi lya Nyambi, Nyambi ami nili wendi, ou nikulemesha. 24Lingeloyi linamba kukwami ngayi, ‘Hinga utina, Paulu! Unafwanini kwimana ku meho a Nkeshali. Ndaba ya nobe Nyambi ukalamwina myoyo ya nimwabo aba uli nabo mu shishepe.’ 25Nohobene, enu balume shumenu mitima, ndaba nikukulupila muli Nyambi ngayi ebye anantongweze bikatendiwa nehi anantongweze. 26Ngoboni tukayumbiwila mu shikuli shamina.”

Bakuhenyena ku shibumbo

27Hakati ka wushiku wa likumi na kanaa, mpepo yatutwalile noku, noku mu Liwate lya Andiliya. Bakakwendesha shishepe bahanganikile ngayi tunakuhenyena ku shibumbo. 28Niho bapimine kukunama kwa liwate, pe bawanine ngayi ma mita a makumi anaa, kumbili bapimine kami, pe bawanine ngayi ma mita a makumi ahatu. 29Batinine ngayi shishepe shikupita ha mamanya, banyezumwishile byondo binaa mu liwate ku ntongo ya shishepe. Niho balombelele ngayi kushe wangu.

30Bakakwendesha shishepe bashingile kutina mu shishepe. Niho bashezumwishile wato mu mema na kutenda ngo bakushinga ku yumbila byondo mu mema ku ntongo ya kumbili ya shishepe. 31Niho Paulu atongwezele mukulwane wa banzita hamo na banzita ngayi, “Ndi aba bantu bafwako kwikala muno mu shishepe, kutwesha enu kupuluka mufwako.” 32Niho banzita baketwile nyimbwa za wato, bawulehele, wawile.

33Oho kwashilenga Paulu wabanyepele nimwabo ngayi balye byakulya. Wabatongwezele ngayi, “Munekala zishunda zibili na kutatilila kwakubula kulya shamina. 34Nohobene nikumilomba ngayi mulye byakulya ndaba eshe sha kufwanina ndaba ya kupinduka kwenu. Kowa muntu kukwenu ukayongesha hinge luhuki lwa ku mutwe wendi.” 35Oho amanishile kwamba, Paulu watolele linkende, wakambililile kuli Nyambi ku meho abo nimwabo, pe wapabwile linkende watatikile kulya. 36Niho nimwabo bashumine mitima nabo kami batatikile kulya. 37Nimwetu bantu mukati twekalile ba 276 38Oho bekutile na byakulya, bahehukishile shishepe na kuyumbila loto mu liwate.

Shishepe shikutabuka

39Oho kwashile bantu kaliha balimukile liya litunga, ngoboni bamonene likobo lya shibumbo sha lihekelela. Pe bahanganikile ndi sha kutwesheka ku nyakilako shishepe. 40Niho baketwile byondo, byazubilile mu liwate. Ha shikati shiyo bamangulwile nyimbwa za kwatiwile na bilapo, bayalile likwiza lyalinene kuyilu, ngayi mpepo yinyakile shishepe ku shibumbo. 41Ngoboni shishepe shakakatilile mu lihekelela mu mema, mato abili aliwanine, niho shemanine. Ntongo ya kumbili yakwatiwile na ku shuma, shabulile kwenda. Pe ntongo ya kunyima yapabukile na ngovu za mankanyi.

42Banzita bayo bayongwele bya kuziha batuyili, kutina ngayi bamo ba kuyowa na ku shila. 43Ngoboni uya mukakutwaminina banzita, washingile kuyoyesha Paulu, niho abakanishile. Wabatongwezele ngayi nimwabo bakakutwesha kuyowa batuwame taha mu liwate, bayowele ku shibumbo. 44Baya bashalileho wabatongwezele ngayi bakwate ha maleenge hinge bipabu bya shishepe. Batendele noho nimwabo bapulukile na kukuma ku shibumbo.

Currently Selected:

Milimo 27: LLK

Highlight

Compare

Copy