Milimo 24

Paulu ukuyatishiwa

1Munyima ya matena mutanu, Ananiyashi Mukulwane wa Bakankombela Nimwabo, wayile hamo na bakulwane ba Bayunda na mukakwimanina wabo ukutumbiwa Tetulashi. Batongwezele Kalela Fwelekishi bya Paulu. 2Niho behanine Paulu, pe Tetulashi watatikile kumuyatisha ngayi, “Hekulu Fwelekishi, tulinaku mwena ndaba ya nobe, kami milimo yayingi yayiwahe yikutendiwa mu litunga lino ndaba ya kutwaminina kwobe kwakukeya. 3Nimwabyo ebye tukutambula na kukambilila shikuma, mu myanya nimwayo. 4Ngoboni, kushinga nifwako Kubipisha shikati shobe, haya nikuku lomba ngayi utuyuvwile nceshe, mu kuyuvwa awa mazu muwipi.

5“Tunawana ngayi ou muntu wamukalu. Unalete mushunga mukati ka Bayunda mu kaye nimwamo, kami wenga ntwamina wa kanzunga ka Banazalena. 6Niye kami wezekele Kubipisha Litala lya Nyambi, niho etu twamukwatile. Twashingile kumuyata kuya na ndayano zetu. 7Ngoboni Lishiyashi, mukulwane wa banzita, wamufumishile na ngovu mu maboko etu. 8Niho Lishiyashi atongwezele bakakumuyatisha ngayi beze kukwobe. Wakamwipula obe mwine ukatwesha kulimuka byuma nimwabyo ebye tukumu yatishila.”

9Bayunda nabo betabilile, bambile ngayi byuma ebye nimwabyo bya kupwisha.

Paulu ukulilamwina ku meho a Fwelekishi

10Kalela walabizile Paulu ngayi ambe, niho Paulu ambile ngayi, “Nikulimuka ngayi, wekalile mukakuyata mu litunga elye myaka yayingi, nohobene niku wahilila ngayi nikumbule ku meho wobe. 11Ngonehi unalimonene obe mwine, shilolo kupite matena likumi na abili, munyima ya kuya kwami ku Yelushalema mu kulemesha. 12Bayunda kaliha bangwanine nikanangana na muntu mu Litala lya Nyambi, hinga kupilamisha bantu mu mashinangonge, hinga ndi kumina mu lukena. 13Kami Bantu aba kutwesha bafwako kuku monesha byuma ebye ba kunyatisha nabyo. 14Ngoboni eshe nikwitabila kukwobe ngayi, nikulemesha Nyambi wa bankakazetu ha kukonka Nzila eye bantu bakwamba ngayi kanzunga ka ku shanuka. Nikukulupila nimwabyo ebye byatikitiwa mu Ndayano za Moshesha na mu bamiluwe. 15Ha kuwana ngayi na kulumbeza kuli Nyambi, oku nibo kami bakwitabila, ngayi bantu nimwabo bakakwoloka na bakawubi, bakashanguka ku bafu. 16Ndaba yanebye nikuzundamina bikati nimwabyo kwikala na shikeketima kuli Nyambi na ku bantu.

17 # Mil 21:17-28. “Munyima ya myaka yayingi nekalile kwakutali na Yelushalema, nezile kuleta bya kuyavwa ku bawushinda wami na kutupula zinkombela. 18Oho natendelenga ebye, bangwanine mu Litala lya Nyambi oho namanishi shimbo sha kuliyelesha. Kaliha hekalile likunge lya bantu hinge mushunga. 19Ngoboni kwekalile Bayunda bamo ba ku litunga lya Esha. Nibo banafwanini kwiza ku meho wobe ndi bali na shuma na nami. 20Shashiwahe hinga nibo bali kuno batoye mulandu ou bawanine oho nemanine mu nkuta. 21#Mil 23:6. Ngoboni mulandu natenda, oho nemanine ku meho wabo nabilikizile ngayi, ‘Mukunyata lelo ndaba nikwitabila ngayi bafu bakashanguka.’ ”

22Fwelekishi walimukile bya Nzila, wemanikile shambo ngayi, “Nikatilamina eshe shambo shobe akeza Lishiyashi mukulwane wa banzita.” 23Niho atongwezele mukakutwaminina kanzunga ka banzita ngayi bamulame, ngoboni bamushobolole, hinga akanisha bandambo bendi kumuyavwa ebye akushinga.

Paulu ku meho a Fwelekishi na Ndulushila

24Oho kwapitile matena, Fwelekishi wezile na mukokwendi Ndulushila, wengile Kayunda. Wehanine Paulu, wamuyuvwililile ebye ambilenga bya kukulupila muli Yeshu Kilishitu. 25Ngoboni oho Paulu atoyele bya kulunga na kuzilikila bya Nyambi akayata kaye, Fwelekishi watinine wambile ngayi, “Ukutwesha kuya nakawana shikati nika kwihana.” 26Ngoboni niye wahanganikile ngayi Paulu ukamupanika mali, nibyo amutuminine bikati byabingi na kwambola nendi.

27Munyima ya myaka yibili, Posha Fweshitashi washwanine Fwelekishi. Ndaba Fwelekishi washingile kuwahililisha Bayunda, washiyile Paulu mu tolongo.

Currently Selected:

Milimo 24: LLK

Highlight

Compare

Copy