Milimo 23

1Paulu aconcomekele Bakankuta, wambile ngayi, “Bawushinda wami, moyo wami kukuma ku mutena walelo nekalile na shikeketima shashiwahe kuli Nyambi.” 2Niho Ananiyashi Mukulwane wa Bakankombela Nimwabo, watongwezele bemanine hahepi na Paulu ngayi, “Mukamenu ku kanwa!” 3#Mat 23:27-28. Niho Paulu ambile kukwendi ngayi, “Nyambi ukakukama, obe limota lya kuyoweshiwa lya kutuba! Unekala na kunyata kuya na ndayano, ngoboni ukukiluka ndayano ha kubetabilisha ngayi nikamiwe!”

4Bantu bemanine hahepi na Paulu bambile ngayi, “Ndaba ngani ukuhandula Mukulwane wa Bakankombela Nimwabo wa Nyambi?”

5 # Kut 22:28. Paulu wakumbwile ngayi, “Bawushinda wami, kaliha na limuka ngayi niye Mukulwane wa Bakankombela Nimwabo. Ndaba kwatikitiwile ngayi, ‘Hinga ukahandula kalela waku bantu benu.’ ”

6 # Mil 26:5; Fwip 3:5. Oho Paulu amonene ngayi bamo bengile ba kazunga ka Bashanduki, bamina ba kazunga ka Bafwalishi wabilikizile mu nkuta ngayi, “Bawushinda wami, ami kami nili Kafwalishi, mwana Kafwalishi. Nikuyatiwa ndaba ya kulumbeza kwa ku shanguka ku bafu.”

7Oho amanine kwamba noho, kwekalile nkani mukati ka Bafwalishi na Bashanduki, pe nkuta yalitapile hakati. 8#Mat 22:23; Mako 12:18; Luka 20:27. Ndaba Bashanduki bakwamba ngayi kowa ku shanguka ku bafu, kowa lingeloyi hinge moyo, ngoboni Bafwalishi bakulupilile ebye nimwabyo. 9Baya bantu babilikizile shikuma. Pe bakakulongesha ndayano bamo ba kanzunga ka Bafwalishi, bakatukile na kukanangana ngayi, “Kuwana wubi mu muntu ou tufwako. Kampe ndi moyo hinga lingeloyi unamba nendi!”

10Oho nkani zanenehele, mukulwane wa banzita watinine ngayi bakatabula Paulu. Niho alayelele banzita ngayi, “Yenu mukamufumishe mukati kabo, pe mumubweshe ku litala lya banzita.”

11Wushiku uyo, Mwene wemanine hahepi na Paulu, wambile ngayi, “Shuma! Nehi unampaka muno mu Yelushalema, unafwanini kumpaka kami ku Loma.”

Bihanganiko bya kuziha Paulu

12Oho kwashile, Bayunda bamo bakungulukile hamo, pe balibezele ngayi, “Kukalya hinge kunwa tufwako, hantu tunazihi Paulu.” 13Bantu bahanganikile ebye bapitakanine makumi anaa. 14Niho bayile ku bakulwane ba bakankombela na bakulwane ba Bayunda bambile ngayi, “Tunalibeze ngayi kukalya shamina tufwako, hantu tunazihi Paulu. 15Haya enu, hamo na bakankuta nimwabo mutume mazu kuli mukulwane wa banzita ngayi Paulu bamulete kukwenu, ngo mukushinga ku shingishisha shiwahe byambo byendi. Etu tunalibalakanya kumuziha shilolo akume kuno.”

16Ngoboni mwipa wa Paulu oho ayuvwile ebye bihinganiko, wayile mukwingina mu litala lya banzita. Pe watongwezele Paulu.

17Niho Paulu ehanine umo wa bakakutwaminina banzita wamutongwezele ngayi, “Twala ndumbana ou ku mukulwane wa banzita ndaba uli na shuma akushinga kumutongweza.” 18Nohobene wamushimbile, pe wamutwalile kuli mukulwane wa banzita wambile ngayi, “Kayili Paulu unanyihana, wanyepe ngayi nikuletele ndumbana ou kukwobe, niye uli na shambo sha kwamba kukwobe.”

19Mukulwane wa banzita wakwatile uya ndumbana ha liboko, wayile nendi kwaninkayabo, pe wamwipwile ngayi, “Bishini ukushinga kuntongweza?”

20Niho ambile ngayi, “Bayunda bamo banayongolo kukunyepa ngayi utume Paulu ku nkuta nzona, ngo bakushinga kushingishisha shambo kukwendi. 21Ngoboni hinga ubetabila, ndaba kuli bantu ba kupitakana makumi anaa banabelamini Paulu ha nzila. Banalibeze ngayi kukalya hinga kunwa bafwako, hantu banamuzihi. Wuluno banalibalakanya na kutatilila kukumbula kwobe.”

22Niho mukulwane wa banzita atongwezele uyo ndumbana ngayi, “Shashiwahe, obe yanga, ngoboni hinga ushimikila muntu ngayi unantontwelele byuma ebye.”

Paulu ukutumiwa kuli Kalela Fwelekishi

23Niho mukulwane wa banzita ehanine bakakutwaminina babili ba banzita, wambile kukwabo ngayi, “Balakanyenu banzita myanda yibili na bakakukandama ha bambishi ba makumi a mutanu na abili na bakamilinga ba myanda yibili, baye ku Sheshaliya ha shikati sha wuhatu wushiku. 24Mubalakanye mbishi ngayi Paulu akandameho, mu mutwale kuli Kalela Fwelekishi.” 25Niho atikitile liñwati,

26“Ami Kilaundiyashi Lishiyashi, kuli Hekulu, Kalela Fwelekishi. Nikushangwisha. 27Ou muntu Bayunda bamukwatile, kami bashingile kumuziha. Oho nayuvwile ngayi niye Kaloma nayile na banzita mu kumulamwina. 28Nashingile kulimuka ndabangani banamuyatishi, niho namutwalile mu nkuta yabo. 29Niho nawanine ngayi bamuyatishile ndaba ya byambo bya ndayano zabo, ngoboni kumuyatisha shuma sha kufwanina kufwa, hinga ku mangiwa bafwako. 30Oho bantongwezele ngayi Bayunda banamubelamini ou muntu namutumu kukwobe wanguwangu. Natongwezele bakakumuyatisha ngayi bambe ku meho obe ebye ba kumuyatisha nabyo.”

31Niho banzita batendele nehi abatongwezele. Bashimbile Paulu, bamutwalile wushiku ku Antipatili. 32Oho kwashile, bakanzita bayo bayile na mawulu babokele ku munzi wabo, balehele bakakukandama ha bambishi ngayi baye na Paulu. 33Oho bakumine ku Sheshaliya, bapanikile liñwati kuli Kalela Fwelekishi, pe baletele na Paulu kukwendi. 34Kalela oho amanishile kulaba liñwati, wepwile Paulu ngayi waku litunga liti. Oho ayuvwile ngayi waku Shilisha, 35wambile ngayi, “Nikayuvwa shambo shobe, oho bakakukuyatisha bakeza.” Niho abatongwezele ngayi Paulu aholekiwe mu musheke wa Helonda.

Currently Selected:

Milimo 23: LLK

Highlight

Compare

Copy