Milimo 25

Paulu ukunyepa kuyatishiwa kuli Mwene Nkeshali

1Oho Fweshitashi akumine mu litunga liyo, kunyima ya matena ahatu wafumine mu Sheshaliya kuya ku Yelushalema. 2Nikwo bakankombela ba bakulwane na bakulwane ba Bayunda bamutongwezele mulandu wa Paulu. Banyepele Fweshitashi 3ngayi abayamizize ha kutumina Paulu ku Yelushalema. Bambile noho ndaba bekalile na bihanganiko bya kumubelamina mu nzila ngayi bamuzihe. 4Fweshitashi wakumbwile ngayi, “Paulu ukulamiwa mu tolongo mu Sheshaliya, pe amimwine nikabokelako wuluno. 5Nohobene bakakutwaminina benu baye hamo nami, bakamuyatishe ou muntu ndi kuli shuma anabipishi.”

6Fweshitashi wekalile nabo ku Yelushalema matena a kubula kupitakana mutanu na ahatu hinge likumi, wayile ku Sheshaliya. Ha mutena wakulundamina hinga ekala ha shipona sha kuyatila milandu, wabatongwezele ngayi balete Paulu. 7Paulu oho akumine, Bayunda aba bafumine ku Yelushalema, bemanine na kumuzinguluka, babangilile Paulu milandu yayingi, eye niyo babulile kutwesha ku monesha ngayi ya kupwisha.

8Paulu mu kuliyawila kwendi wambile ngayi, “Kowa shuma ninabipishi ku ndayano za Bayunda, hinga ku Litala lya Nyambi, hinga kuli Nkeshali.”

9Ngoboni Fweshitashi washingile ku wahilisha Bayunda, wepwile Paulu ngayi, “Kati ukwitabila kuya ku Yelushalema mu kuyatiwa ku meho ami ndi?”

10Ngoboni Paulu wambile ngayi, “Nemana ku nkuta ya Nkeshali, oku niku fwanina kuyatiwa. Kaliha ninabipishili Bayunda nehi obe ukulimuka shiwahe. 11Ndi ami nina bipishi, kami natende shuma sha ku fwanina kufwa, nifwako ku kana kufwa. Ngoboni ndi ebye bakwamba kaliha bya kupwisha, kowa muntu ukampanika kukwabo. Ami nikunyepa kuya kuli Nkeshali.”

12Niho Fweshitashi, ha kumanisha kuliyuvwashana na bakankuta yendi, wambile ngayi, “Obe unanyepe kuya kuli Nkeshali. Ukaya kuli Nkeshali.”

Paulu ku meho a Angilipa na Mbenishi

13Munyima ya matena amina, Mwene Angilipa hamo na mukazendi Mbenishi bayile ku Sheshaliya mu kushangwisha Fweshitashi. 14Oho bekalile matena amengi, Fweshitashi watontwelele uya mwene byambo bya Paulu. Wambile ngayi, “Kuli muntu umo kuno ou Fwelekishi ashiyile mu tolongo. 15Oho nekalile ku Yelushalema, bakankombela ba bakulwane na bakulwane ba Bayunda bantontwelele byendi, banyepele ngayi nimuyate. 16Ngoboni naba kumbwile ngayi kaliha shiheka sha Baloma kupanika muntu ku kufwa. Mukakuyatishiwa watatikanga kuliwana na bakakumuyatisha na kuwana mwanya wa kuliyawila ku mulandu banamuyatishi. 17Oho bezile kuno, kaliha nehalile, nekalile ha shipona sha kuyatila nabatongwezele ngayi ou muntu bamulete kukwami. 18Bakakumulwisha bemanine, kaliha bamuyatishile na mulandu wa noho nehi nahanganikile. 19Balikananganishile nendi ha bya kukulupila kwabo na ha muntu lizina lyendi Yeshu, uya wafwile, ou Paulu ambile ngayi wamumi. 20Nakwangile mwakuwanina ebye byambo. Niho namwipwile Paulu ndi ukwitabila kuya ku Yelushalema ngayi bakamuyate. 21Ngoboni Paulu wanyepele ngayi alamiwe mu tolongo kutatilila Nkeshali kuyata eshe shambo. Hohobene nabatongwezele ngayi bamulame mu tolongo kukuma na ku mutena nikamutuma kuli Nkeshali.”

22Niho Angilipa atongwezele Fweshitashi ngayi, “Ami kami nikushinga kuyuvwa ou muntu hamba.”

Fweshitashi wambile ngayi, “Ukamuyuvwa nzona.”

23Oho kwashile, Angilipa na Mbenishi bezile na wulolo wa wene. Benginine mu nkuta na bakulwane banzita na bakulwane ba mu munzi. Fweshitashi wabatongwezele ngayi balete Paulu, niho bamuletele. 24Fweshitashi wambile ngayi, “Mwene Angilipa, nenu nimwenu muli netu muno, munamono ou muntu. Bayunda nimwabo banyepele ku Yelushalema na kuno kami na kubilikiza ngayi wufwako ku fwanina kuyoya. 25Ngoboni ami nifwako kuwana mulandu waku fwanina ngayi afwe. Ndaba ngayi niye mwine wanyepele ngayi mulandu wendi akauyate Mwene Nkeshali nafungile kumutuma. 26Ngoboni nifwasho shuma sha kutikita kuli Mwene bya nou muntu. Nohobene namulete kukwenu, shinene kuli Mwene Angilipa, ngayi oho ukamuyipwiziza niwane shuma sha kutikita. 27Ndaba kukwami sha kubula ku fwanina kutuma kayili kwakubula ku shimika mulandu unapanikiwi kukwendi.”

Currently Selected:

Milimo 25: LLK

Highlight

Compare

Copy