Milimo 12

Kuyandishiwa kukuneneha

1Ha shikati shiyo Mwene Helonda watatikile kuyandisha bamo bengile bakalitengo. 2Wazihile Yakoba yaya Yowano na mukwale. 3Oho Helonda amonene ngayi shikuwahilisha Bayunda, wakwatile kami Pita. (Eshe shatendiwile ha mutena wa Shimbo sha Mankende A kubula Mumena.) 4#Kut 12:1-27. Oho amukwatile, wamuyakile mu tolongo, wamupanikile ku mihoko yinaa ya banzita ngayi bamulame, Helonda wahanganikile ngayi bamulete ku meho a bantu ngayi bamuyate shapita Shimbo sha Kupitilila. 5Nohobene Pita wekalile mu tolongo, ngoboni litengo kaliha balehele kumulombelela kuli Nyambi.

Pita ukufumishiwa mu tolongo

6Wushiku uyo oho Helonda ashingile ngayi akamulete ku bantu, Pita walanganine mukati ka banzita babili. Wamangiwile na mawenge abili, kami ha shipana sha tolongo hekalile bakakulama. 7Hohobene kwezile lingeloyi lya Mwene, kami lumuni lwamunikile mu tolongo. Lingeloyi lyanyantizile Pita ha lupati, lyamutoneshele, lyambile ngayi, “Pinduka wanguwangu!” Hohobene mawenge awile ku maboko wendi. 8Lingeloyi lyambile kukwendi ngayi, “Vwala bya kuvwala byobe na ncangwa zobe.” Pita watendele noho, lingeloyi lyamutongwezele kami ngayi, “Manga mukunzi wobe, pe unkonke.” 9Pita watutikile, wamukonkele, kaliha walimukile ngayi eshe atendele lingeloyi shengile sha kupwisha, niye wahanganikile ngayi kampe unamono shimono. 10Oho bapitakanine kazunga kakutatika ka bakakulama na ba wubili, bakumine ku lipangati lya shondo lya kwinginina mu munzi, lyalishinkwilile nilyoline, pe bafumine, bayile mu mukwakwa, pe wanguwangu lingeloyi lyamushiyile.

11Niho Pita alimukile ebye byatendiwile kukwendi, pe wambile ngayi, “Haya nalimukakale ngayi mwa shikuma Mwene unatumu lingeloyi lyendi, unandamwini kuli Helonda na ku biya byabibi nimwabyo Bayunda bashingi kutenda.”

12Oho alimukile ebye, wayile ku litala lya Maliya manda Yowano ou watumbiwile Mako. Bantu babengi bakungulukile, pe balombelelenga. 13Oho Pita angongomwezele ha shihala sha ku lipangati, mushimbi ukutumbiwa Londa wezile ngayi amushinkwilile. 14Oho alimukile ngayi lizu lya Pita, wawahililile shikuma, pe kaliha washinkulwile ku lipangati, ngoboni wetukile kuya mu kushimika ngayi, “Pita unemana ku lipangati!” 15Bantu bayo bambile kukwendi ngayi, “Unapempele!” Ngoboni wazaminine ngayi mwa shikuma. Pe bambile ngayi, “Unengi lingeloyi wendi.”

16Ngoboni Pita wangongomwezelenga. Oho bashinkulwile shihala, bamumonene, pe bakomokele. 17Pita wabalabizile na liboko ngayi bamwene, wabashimikilile eshe Mwene amufumishile mu tolongo. Pe wambile ngayi, “Katongwezenu Yakoba na bakakukulupila byuma ebye.” Niho akatukile wayile ku mwanya washenge.

18Oho kwashile, kwekalile miyoyo yayinene mukati ka banzita ngayi, “Kati Pita unayi kuti?” 19Helonda wabatongwezele ngayi bamushinge, ngoboni kaliha bamuwanine. Wepwile bakakulama, pe walayelele ngayi bazihiwe.

Munyima yanebye Helonda wafumine ku Yundeya, wayile ku Sheshaliya na kwikalako matena amashe.

Lufu lwa Helonda

20Helonda wapilaminine bantu ba ku Tile na Shindoni, niho bayile mu likunge mu kumumona. Ha kutatika bakandamikile Mbalashita, shikombwa sha mwene, pe bayile mu kunyepa ku mwena, ndaba litunga lyabo lyayoyelelenga byakulya byafumine ku litunga lya nou mwene.

21Ha mutena wahatiwile, Helonda wavwalile bivwalo byendi bya wene, wekalile ha litanda lyendi, pe wambile kukwabo. 22Bantu babilikizile ngayi, “Lizu elye lya banyambi, kaliha lya muntu!” 23Wanguwangu lingeloyi lya Mwene lyakamine Helonda, ndaba kaliha wapanine maleema kuli Nyambi. Wafwile, pe mapila amulile.

24Ngoboni lizu lya Nyambi lya kulile na kuhanya.

25Pe Mbanambashi na Shaulu oho bamanishile mulimo wabo, babokele ku Yelushalema, bayile na Yowano ukutumbiwa Mako.

Currently Selected:

Milimo 12: LLK

Highlight

Compare

Copy