Milimo 13

Mbanambashi na Shaulu ba kuhatiwa na kutumiwa

1Mu litengo lya mu Antiyoke mwekalilenga bamiluwe na balongeshi. Mbanambashi na Shimiyoni (watumbiwile wa Kushipa) na Lushiya (waku Shilene) na Manayene (wa mu nkuta wakulile hamo na Kalela Helonda Antipashi) na Shaulu. 2Oho balemeshelenga Mwene na kuzila kulya, Moyo wa Kuyela wambile ngayi, “Mfungwilenu Mbanambashi na Shaulu ku mulimo ou nabehanini.”

3Munyima ya kuzila kulya na kulombela, babakambikile maboko, pe babatumine.

Mu Shayipulashi

4Oho Mbanambashi na Shaulu Moyo wa Kuyela wa batumine, bayile ku Shelusha. Oho bafumine kuyo bayile na wato ku shikuli sha Shayipulashi. 5Oho bakumine mu Shalamishi, bashimikilile lizu lya Nyambi mu mashinangonge a Bayunda. Bayile na Yowano Mako mu kubayavwa.

6Oho bapitile hakati ka shikuli, pe bakumine ku Pafwoshi, bawanineko mukamalele umo, lizina lyendi Mbala-Yeshu, muluwe wa mahalo wa Kayunda. 7Wengile muhoni wa Shelingashi Paulushi muntu wakukeya uya wengile kalela wa shikuli. Pe Shelingashi Paulushi wehanine Mbanambashi na Shaulu, ndaba washingile kuyuvwa lizu lya Nyambi. 8Ngoboni Elimashi, ou mukamalele (nilyo lizina lyendi mu Shingiliki), wabakananganishile na kwezeka ku shanwisha kalela ku kukulupila. 9Niho Shaulu, ou watumbiwile ngayi Paulu, hinga enzala na Moyo wa Kuyela, wamunconcomekele. 10Pe wambile ngayi, “Obe mwana Shatana! Mukankole wa byakwoloka, unenzala na mahalo nimwawo na ku shoshoka kwa kwongeza kati kukaleha Kubipisha zinzila za Mwene za kwoloka wufwako ndi? 11Haya, mona! Liboko lya Mwene lili hahobe, ukenga kashishitwa na kubula ku mona lumuni lwa mutena mu shikati shashishe.”

Hohobene mbundu yamufwikile ha meho, pe wendenganinenga na kushinga wakumukwata ku liboko. 12Oho kalela amonene ebye byatendiwile, wakomokele, pe wakulupilile ku longesha kwa Mwene.

Antiyoke wa mu Pishindiya

13Paulu na baminendi bavuwile wato kufuma ku Pafwoshi, pe bayile mu kufuwika ku Pelinga munzi wa mu Pamfwiliya. Niko Yowano Mako abashiyile, wabokele ku Yelushalema. 14Kufuma ku Pelinga, bakumine ku Antiyoke wa mu Pishindiya. Ha Mutena Wakukatala, benginine mu shinangonge, pe bekalile hanci. 15Oho bamanishile kulaba byatikitiwa mu Ndayano za Moshesha na bamiluwe, bakakwendesha mu shinangonge babatuminine muluwe ngayi, “Bawushinda, ndi muli na mazu akushumisha bantu, ambenu.” 16Niho Paulu emanine, wabalabizile na liboko, wambile ngayi, “Enu Baishalela, nenu Bakamatunga bakakutina Nyambi, nyuvwililenu! 17#Kut 1:7; 12:51. Nyambi wa Baishalela, wahatile bankakazetu, wabatumpwile oho bengile bayeni mu litunga lya Engepita. Wabafumishilemo na ngovu zendi, 18#Kul 14:34; Nday 1:31. wabalamine mulibelelengwa mu myaka makumi anaa. 19#Nday 7:1; Yosh 14:1. Oho amanishile kunongesha mikoka mutanu na yibili mu litunga lya Kenaani, wabapanikile litunga liyo kwinga likona. Ebye byatendiwile mu myaka 450. 20#Bak 2:16; 1Sha 3:20. Kufuma haya wabapanine bakakuyata kukuma na ku shikati sha muluwe Shamwele. 21#1Sha 8:5; 10:21. Niho bantu banyepele mwene, pe Nyambi wabapanine Shaulu, mwana Kishi mulume wa mushobo wa Mbenjamani, niye wabalelele mu myaka makumi anaa. 22#1Sha 13:14; 16:12; Nyi 89:20. Oho amufumishile, wayakile Ndavita ngayi enge mwene wabo. Nyambi wambile ngayi, ‘Nawana Ndavita mwana Njeshi, muntu wa ku mu wahilisha ku mutima, ukatenda shifungo shami nimwasho.’ 23Ku bazukulya Ndavita Nyambi waletele Yeshu kwinga mupulwishi wa Ishalela, ngonehe a kulupishile. 24#Mako 1:4; Luka 3:3. Oho Yeshu shilolo akume, Yowano washimikililenga ku bantu nimwabo ba Ishalela ngayi batenguluke ku wubi wabo, pe bazubilishiwe. 25#Mat 3:11; Mako 1:7; Luka 3:16; Yowa 1:20-27. Yowano oho amanishilenga mulimo wendi wambile ngayi, ‘Enu mu kuhanganika ngayi ami nengi yani? Kaliha ami mu kutatilila. Ngoboni ou ulinakwiza munyima yami, ku fwanina ku shobolola makatulo ku mawulu wendi nifwako.’

26“Enu bawushinda wami Baishalela, bazukulya Abulahama nanenu Bakamatunga nimwenu mukutina Nyambi, ncango za kupulwisha okwe zinatumiwi kukwetu. 27Bantu ba mu Yelushalema na batulela babo, kaliha bamulimukile Yeshu, hinge ku yuvwishisha mazu a miluwe aya alabiwanga ha Matena nimwawo aku Katala. Ngoboni ha kumuyata Yeshu ngayi afwe, batendele ebye batikitile bamiluwe. 28#Mat 2:22-23; Mako 15:13-14; Luka 23:21-23; Yowa 19:15. Hinge babulile kuwana mulandu kukwendi waku fwanina kufwa, ngoboni banyepele Pilato ngayi Yeshu azihiwe. 29#Mat 27:57-61; Mako 15:42-47; Luka 23:50-56; Yowa 19:38-42. Oho bamanishile kutenda nimwabyo byatikitiwile hahendi, bamufumishile ha shishempakano, bamulangikile mu shinzimbi. 30Ngoboni Nyambi wamushangwile ku bafu. 31#Mil 1:3. Yeshu waliholwele ha matena amengi ku baya bantu bezile nendi ku Yelushalema kufuma ku Ngalileya. Aba bengakale bapaki bendi ku bantu ba Ishalela. 32Tukumishimikila ncango zaziwahe eze Nyambi a kulupishile ku batatizetu, 33#Nyi 2:7. pe ebye Nyambi a kulupishile unatutendele etu bazukulyendi, ha ku shangula Yeshu ku bafu, ngonehe kwatikitiwile mu Lwimbo lwa wubili ngayi,

‘Obe uli Mwanami,

mutena walelo nengakale Tatiyobe.’

34 # Isha 55:3. Pe ebye nibyo Nyambi ambile ha kumushangula ku bafu, ngayi hinga akabola, Nyambi wambile ngayi,

‘Nikamipana mfuywezi za kuyela na kupwisha

eze na kulupishile Ndavita.’

35 # Nyi 16:10. Nohobene wambile kami mu lwimbo lwamina ngayi,

‘Kuka lehela wa kuyela wobe ngayi abole wufwako.’

36Ndavita oho amanishile kutenda mulimo wa Nyambi shikati shendi, wafwile, bamufundile hamo na batatizendi, pe wabolele. 37Ngoboni ou Nyambi ashangwile kaliha wabolele. 38Nohobene, bawushinda wami, limukenu ngayi muli Yeshu kuyatiwila kwa wubi kunashimikiwi kukwenu. 39Pe muli Yeshu nimwabo bakukulupila bakashoboloka ku byuma nimwabyo ebye babulile kutwesha ku shoboloka kukwabyo na Ndayano za Moshesha. 40Nohobene keyenu, kutina biya bambile bamiluwe biza kukwenu oho bambile ngayi,

41 # Hamba 1:5. ‘Monenu, enu bakamashewinizi! Komokenu, pe munonge!

Ndaba nikutenda milimo mutena walelo,

iya mukabula kukulupila,

hinge ndi muntu wamina ukamitontwelela.’ ”

42Oho batutikilenga mu shinangonge, bantu banyepele Paulu na Mbanambashi ngayi awa mazu bakawabokele kuwashimikila kukwabo ha Mutena Wakukatala wakwiza. 43Oho bantu bapanzanine mu shinangonge, Bayunda babengi na Bakamatunga baya bakulupilile biheka bya Shiyunda bakonkele Paulu na Mbanambashi aba bambile nabo na ku bashumankanisha ngayi bazamine mu nceshe za Nyambi.

44Ha Mutena Wakukatala wakulundamina, bantu babengi ba mu munzi bakungulukile mu kuyuvwa lizu lya Nyambi. 45Ngoboni Bayunda oho bamonene likunge lya bantu, bekalile na mwili. Bakanine nimwabyo ebye Paulu ambilenga, pe bamuhandwile. 46Niho Paulu na Mbanambashi bambile na kukanca ngayi, “Tunafwanini ngayi tutatike ku shimikila lizu lya Nyambi kukwenu. Ngoboni, ndaba muli na kukana na kuliyata enu bamwine ngayi ku fwanina wumi wa mwaya myaka mufwako, monenu, etu tukumishiya na kuya ku Bakamatunga. 47#Isha 42:6; 49:6. Ndaba Mwene watulayile ngayi,

‘Nakuyaka obe mukwinga lumuni ku Bakamatunga,

ngayi mwanga ukatwale kupulwisha kwakumina kaye.’ ”

48Oho Bakamatunga bayuvwile noho, bawahililile, bayemezele lizu lya Mwene. Pe nimwabo baya Nyambi ahatilile ku wumi wa mwaya myaka bengile bakakukulupila.

49Lizu lya Mwene lyakwayanine mu litunga nimwalyo. 50Ngoboni Bayunda bahongele bambuyama ba maleema bakakutina Nyambi na balume bakakutwaminina ba mu munzi kulwisha Paulu na Mbanambashi, pe babatandile mu litunga liyo. 51#Mat 10:14; Mako 6:11; Luka 9:5; 10:11. Ngoboni bantumwana batotomwene lukungu ku mawulu wabo ku monesha ngayi nibo mulandu bafwawo, pe bayile ku Ikoniyamu. 52Pe bandongesha ba ku Antiyoke benzalile na Moyo wa Kuyela, kami bawahililile shikuma.

Currently Selected:

Milimo 13: LLK

Highlight

Compare

Copy