Milimo 11

Lushango lwa Pita ku litengo lya mu Yelushalema

1Bantumwana na bakakukulupila baya bekalile ku Yundeya bayuvwile ngayi Bakamatunga nabo banatambulu lizu lya Nyambi. 2Oho Pita abokele ku Yelushalema, bakakwitabila bamo baya bashingilenga ngayi Bakamatunga baye ku mukanda, bamunyancile. 3Pe bambile ngayi, “Wenginine mu litala lya bantu bakubula kuya ku mukanda na kulya nabo!” 4Niho Pita atatikile kubatontolwela nimwabyo eshe byekalile ngayi, 5“Nekalile mu munzi wa Yopa na kulombela, pe namonene shimono. Namonene shuma sha kufweka ngo likwiza lyalinene kuyilu lyanyenzumukile kukwami, lyamangiwile ku zinkomi zasho zinaa. 6Oho nalipenzesheshele namonenemo tuyamana na tunzama na bya kulikoka na tuyoni. 7Pe nayuvwile lizu lyambile kukwami ngayi, ‘Pita, katuka uzihe, ulye!’ 8Ngoboni nambile ngayi, ‘Byo Mwene! Ndaba shuma sha mazilo hinge sha kubula kuyela hinga shatanga kwingina mu kanwa kami.’ 9Ngoboni kuyilu kwafumine lizu lyankumbwile ka wubili ngayi, ‘Eshe anayeleshe Nyambi, hinga ushitoya ngayi sha kubula kuyela.’ 10Eshe shatendiwile kahatu, niho nimwabyo byakokiwile kami kutwaliwa kuyilu. 11Ha shikati shiyo kwakumine balume bahatu ku litala oku nekalilenga. Babatumine kukwami kufuma ku Sheshaliya. 12Moyo wantongwezele ngayi niye nabo na kubula kuhalulula. Kami bawushinda aba bakakukulupila mutanu na umo baya bafumine ku Yopa bancindikizile, twenginine mu litala lya Koniliyashi. 13Watutongwezele eshe amonene lingeloyi lyemanine mu litala lyendi lyambile kukwendi ngayi, ‘Tuma bantu ku Yopa ngayi bakehane Shimoni ukutumbiwa Pita. 14Uka ku shimikila mazu awa ukapuluka nawo na baka litala lyobe nimwabo.’ 15Oho natatikile kwamba, Moyo wa Kuyela wezile hahabo, nehe wezile hahetu ha kutatika. 16#Mil 1:5. Niho nanukile mazu a Mwene ambile ngayi, ‘Yowano wazubilishilenga na mema, ngoboni enu mukazubulishiwa na Moyo wa Kuyela.’ 17Pe ndi Nyambi wabapanikile shishemo shimo ngonehe atupanine oho twa kulupilile muli Mwene Yeshu Kilishitu, haya ami nengi yani ngayi nitweshe kukanisha Nyambi?”

18Oho bayuvwile ebye byambo bamwenene, pe bayemezele Nyambi na kwamba ngayi, “Mwa shikuma Nyambi unapaniki Bakamatunga kutengulukila ku wumi!”

Litengo lya ku Antiyoke

19 # Mil 8:1-4. Kunyima ya kuzihiwa kwa Shetefwano, bakakukulupila bapanzanine ndaba ya kuyandishiwa. Bamo bayile na kukuma ku Fonisha na ku Shayipulashi na ku Antiyoke, oku bakalongeshelenga lizu lya Nyambi ku Bayunda tuhu. 20Ngoboni kwekalile bakakukulupila bamo ba ku Shayipulashi na ba ku Shilene, oho bezile ku Antiyoke bambile kami ku Bangiliki na ku shimikila byambo bya Mwene Yeshu ku Bakamatunga. 21Ngovu za Mwene zekalile hahabo, pe bantu babengi bakulupilile na kutengulukila kuli Mwene.

22Ncango eze za kumine ku matu a litengo lya mu Yelushalema, pe batumine Mbanambashi ku Antiyoke. 23Oho akumine na ku mona Nyambi eshe abatandalishilenga, wawahililile, wabakowaminine nimwabo ngayi benge bakukulupila, pe bekale na mutima wakukakatila kuli Mwene. 24Mbanambashi wengile muntu wamuwahe, wenzalile na Moyo wa Kuyela na kukulupila, pe bantu babengi balitabilile kuli Mwene.

25Niho Mbanambashi ayile ku Talishashi mukushinga Shaulu. 26Oho amuwanine wamuletele ku Antiyoke. Pe mwaka wanzimba nimwawo, ba kungulukilenga hamo na litengo na ku longesha bantu babengi. Mu Antiyoke nimo bandongesha batatikile kutumbiwa ngayi Bakakilishitu.

27Matena ayo miluwe bamo bafumine ku Yelushalema na kuya ku Antiyoke. 28#Mil 21:10. Pe umo hakati kabo ou watumbiwile Angabushi wemanine, walubulwile na ngovu za Moyo wa Kuyela ngayi nzala yayinene yikekala mu kaye nimwamo. (Nzala eye yekalileko ha matena a Mwene Kilaundiyashi.) 29Pe bandongesha bahanganikile bya kutuma bya kuyavwa ngo kutwesha kwendi muntu, ku bawushinda bakakukulupila bekalile ku Yundeya. 30Batendele noho, pe batumine Mbanambashi na Shaulu kutwala bya kuyavwa ku bakulwane ba litengo.

Currently Selected:

Milimo 11: LLK

Highlight

Compare

Copy