Genese 50
50
1Yosefu wadinatoleli hamesu atata yindi, hakudilila hadi yena, hakumupwepujola. 2Yosefu walejeli ambuŋindi aŋaŋa, nindi, Muumishenu tata yami; aŋaŋa amuumishili Isarela. 3Amuwanishilili mafuku makumi awana, muloŋa dimu yawanishilaŋawu mafuku akuumisha nachu. AEjipitu amudilili mafuku makumi atanu nayedi.
4Cheliluwu mafuku akudila anahiti dehi, Yosefu hakuhosha nawantaŋa jaFwaro, nindi, Neyi munantoŋuhu, hoshenu mwani naFwaro, nenu, 5nami, Tata yami wansanyikishili chakunsanyikisha, nindi, Yami nukufwa onu, wakanjiika mwomwŋamu dami dinadiŋundilili mwituŋa daKenani. Dichi dinu aŋiteji mwani, niyi nakajiiki tata yami, nakenza cheŋi.
6Fwaro nindi, Yaŋa, kajiiki tata yeyi, mwomwakusanyikishihyi. 7Yosefu wayili akajiiki tata yindi; ambuŋa Fwaro ejima ayili nindi, niakulumpi ahamukala windi, niakulumpi amwituŋa daEjipitu, 8niantaŋa jaYosefu ejima, niana kwindi, niantaŋa jatata yindi, ashiyili mwituŋa daGosheni anyanawu anyanya hohu, nimpembi jawu, ninyikoku yawu, niŋombi jawu. 9Ayili hamu nindi nimakálu, niakwakwendela hatuwalu, hadiŋi chendu chacheni cheneni cheŋi. 10Chashikiluwu kwakuhulilatidiku kuAtadi, kwishinadi daYodana, hiyakudililaku makumbu aweni asweja nankashi; wamudilili tata yindi mafuku atanu nayedi. 11Awenawu ashakama mwituŋa, wowu aKenani, chamwenuwu chadililuwu mwakuhulilatidiku muAtadi, elili nawu, Kudila kwakudilawu aEjipitu o kukala! Dichi atumbiluku ijina, nawu KuAbeli Mizirayimi, kwishinadi daYodana.
12Anyanindi amwilili mwomwayilejeliyi; 13anyanindi amusendeli nakumutwala mwituŋa daKenani, amujiikili mwiyeŋu damwiha daMakapela, dalandiliyi Abarahama hamu neha dakaHiti Efwenaoni kulonda kwikalikunfuka yawu yakuheta kwakwihi naMamiri.
14Yosefu chajiikiliyi tata yindi wafuntili cheŋi kuEjipitu, niyena nianakwindi, niantu ejima ayiliyi nawu nakujiika tata yindi. 15Ana kwaYosefu chamwenuwu tata yawu nafwi dehi, hivakwila nawu, Kwiji Yosefu wukutuhela nakutukoŋa chatama nachina chitwamutamishili. 16Atemesheli kaŋanda kudi Yosefu, nawu, Tata yeyi hadiŋiyi wuchidimumi, watulejeli nindi, 17Mwakamwila Yosefu, nenu, Anakenaku mwani, muloŋa wawana kweyi, ninshidi yawu, muloŋa akukoŋeli chatama; ichidinu mwani, anakeni muloŋa wawambuŋa Nzambi yatata yeyi. Chahosheluwu nindi Yosefu hakudila. 18Ana kwindi ayili nakudinata hamasekikumesu indi; nawu, Etu ambuŋeyi.
19Yosefu wayilili nindi Bayi mutiyaŋa womaku, ochu ami yami Nzambi? 20Ilaŋa enu mwatoŋojokeli kuŋila chatama, hakwinza Nzambi watoŋojokeli kwila chachiwahi, nindi ahandishi antu amavulu neyi chitunamoni lelu. 21Dichi dinu bayi mutiyaŋa womaku, nukuyidiishaŋa ninenu ni anyanenu anyanya. Wayikundejeli nakuhoshanawu chachiwahi.
22Yosefu washakamini muEjipitu niyena niantaŋa jatata yindi; Yosefu wahandili nyaka nkulakaji nanyaka ikumi. 23Yosefu wamweni anyana kaEfweremi, nianyana kamwizukulu windi; nianyana kaMakiri mwana kaManase niwena ayileleli kudi Yosefu hanyendu yindi. 24Yosefu wayililiana kwindi, nindi, Ami hinukufwa; ilaŋa Nzambi chalala wakenza nakuyitala, wamba kayifumisha mwituŋa dinakuyitwala mwituŋa dashiikiliyi. Abarahama naIsaka naYakoba nakusanyika chakusanyika. 25Yosefu Kutach wayilili anyana kaIsarela, nindi, Sanyikenu. Nindi, Nzambi chalala wakenza nakuyitala, ninenu mwakasenda mafwahami nakuyifumisha kunu. 26Nochu Yosefu wafwili, washi kili munyaka nkulakaji nanyaka ikumi. Amuumishili, amushili muchimbaŋu chakujiikila mufu muEjipitu.
Currently Selected:
Genese 50: MW62
Highlight
Copy
Compare
Share
Want to have your highlights saved across all your devices? Sign up or sign in
The Bible in Lunda: Ndembu (Lunda of Kalunda) © B. F. B. S. 1962.
