Hose'a 7
7
1Wakkati jiɗumi yanɗitiningo himɓe Isira'iila,
den mum nun ji'umi kade hakkeeji ɗi himɓe lenyol Efurayimu waɗata.
Ji'umi bo kalluɗum ɗum himɓe Samariya waɗata.
Ɓee pewa.
Wuyɓe e naata der wurooji himɓe e wujja.
Pasotooɓe e pasoo himɓe der laabi.
2Ɓe bi'ataa ko'e maɓɓe, mii anni kalluɗum ɗum ɓe gaɗata ɗon fu.
Jooni, gaɗuuji maɓɓe ɗin e haɓɓi ɓe.
Mii yi'a ko ɓe gaɗata fu.
3Ɓee gaɗa ko halli gam ɓe belina ɓerne laamiiɗo.
Ɓee pewa gam ɓe ceyina doogariiɓe laamiiɗo.
4Ɓe fu ɓee gaɗa jeenu.
Ɓee nandi hande wuuɗirde peen ne buuɗoowo peen wattani yiite faa wuli sanne,
faa kade o bukaaka duncugo ŋe diga wakkati o laawata conni peen nin faa de ni ƴuufi.
5Nyanne laamiiɗo maɓɓe nyaamata juulɗe,
doogariiɓe mum yaran nun bagi faa yana,
den yanta e jala himɓe.
Laamiiɗo on bo e waɗa hande no maɓɓe.
6Fukkinooɓe dabareeji kalluɗi e wuli hande wuuɗirde peen.
Jemma, mone maɓɓe e deƴƴi,
amma subaka, ne ummoo e semme,
ne nanda hande yiite manŋe.
7Ɓe fu ɓee buli hande wuuɗirde peen.
Ɓee kalka ardiiɓe maɓɓe.
Ɓee bara laamiiɓe maɓɓe gooto gooto.
Amma goɗɗo der leydi nin eelay am ballal.
8Himɓe lenyol Efurayimu jaamontirii e lenyi koriiɗi.
Ɓee nandi hande kiraruure ca'eteene amma wonƴitaaka.
9Hoɓɓe heennyii semme maɓɓe, amma ɓe paamay ka.
Gaasa maɓɓe waɗii dandandi, amma ɓe paamay ka.
10Himɓe Isira'iila e woodi manŋu hoore.
Manŋu hoore ŋun e gaccoo ɓe.
Amma ɓe bittay to am min Alla Joomiraawo maɓɓe.
Der ko tawi ɓe ɗon fu, ɓe dartay am.
11Himɓe lenyol Efurayimu e nandi hande tantabaraaru nu ƴoƴaa, nu walaa hakkillo.
Ɓee eela himɓe Misira ballal.
Ɓee jaha faa leydi Asuura gam dartoygo ballal.
12Wakkati ɓe jahata ton, mi faɗɗanan ɓe taaruwol am,
mi happa ɓe mi doƴƴa ɓe hande no colel happirtee,
den mi hiitoo ɓe hande no batirnoomi ɓe ka der hawriine maɓɓe.
13Bone tawan ɓe gam ɓe boppii am.
Ɓe kalkan gam ɓe ummanake am.
Mii yiɗi hisingo ɓe,
amma ɓee pewanammi.
14To ɓee eelammi ballal, ɓe gaɗirtaa ɗum e ɓerne woore.
Ɓe pukkoto nun dow banniiji maɓɓe ɓee bulla e semme,
ɓee ƴara ɓalli maɓɓe gam alkamaari maɓɓe e innabooje maɓɓe rima sanne.
Non non ɓe jahirta ɓee boppirammi.
15Min nun ekkitini ɓe ko haani ɓe gaɗa, accumi ɓe gaɗi semme,
amma jooni, min nun ɓe pukkinanta dabareeji kalluɗi.
16Baa to ɓe bittoy,
ɓe bittay to am min Alla mo dow.
Ɓe laatake hande biroogal ŋal wooɗaa.
Ardiiɓe maɓɓe warete der konu gam sabbu ɓee batanammi haalaaji kalluɗi.
Kanjum accata himɓe jala ɓe der leydi Misira.
Currently Selected:
Hose'a 7: BFB
Highlight
Share
Copy
Want to have your highlights saved across all your devices? Sign up or sign in
Bible Fulfulde Bénin © SIM International 2015, 2024.
