Hose'a 8
8
Aawuɗo hennu ruggan hennu ŋol duydi
1Joomiraawo wi'i:
Puuree fuuraanu konu maatinon himɓe.
Wayɓe e wara yantugo suudu am hande birigaare
gam sabbu himɓe Isira'iila firtii alkawal am,
ɓe tokkay sariya am.
2Ɓe bullanan am ɓee bi'a:
Alla amen, emen anni maa menen Isira'iilaaɓe.
3Ɓe accii waɗugo ko wooɗi.
Gam mum wayɓe maɓɓe riiwan ɓe.
4Ɓe cuɓanii ko'e maɓɓe laamiiɓe baa ɓe ceedinaaki am.
Ɓe cuɓanii ko'e maɓɓe ardiiɓe baa mi annaa.
Ɓe ettii cardi maɓɓe, e kanŋeeri maɓɓe,
ɓe gaɗirani ko'e maɓɓe tooruuje.
Kanjum nun waddanta ɓe halkere.
5Onon himɓe Samariya, mii wanyi ga'el ŋel kanŋeeri ŋel caafoton.
On umminii mone am sanne.
Faa dey baawoton laataago ɓe walaa gacce?
6Ga'el mon ŋel kanŋeeri ŋel ƴiwu nun diga der leydi Isira'iila ɗoo.
Gaɗoowo golle kanŋeeri nun waɗi ŋel.
Ŋel laataaki Alla.
Gam mum, sey ŋel pusee yaka yaka.
7On aawii hennu.
Gam mum, on duggan hennu ŋol duydi.
Hande no ballool gom bati:
Alkamaari ni waɗay cammeeje waɗataa conni.
Baa to ni waɗii conni, hoɓɓe nun nyaamata ni.
8Lenyi janani moɗii himɓe Isira'iila.
Jooni, ɓe na'on caka lenyi janani ɗin,
ɓee nandi hande faande woppaane.
9Himɓe lenyol Efurayimu dartoy ballal leydi Asuura baa seedinaaki goɗɗo.
Ɓee nandi hande babba ladde gonuŋa kanun tan.
Ɓee joɓa ceede gam ɓe keɓa igooɓe.
10Baa no ɓe kokkorii lenyi goɗɗi dokke,
jooni mi hawritan ɓe,
den ɗoo e wakkati seɗɗa, ɓe tooroo der juuɗe #8:10 Laamiiɗo doogariiɓe: Jammoore laamiiɗo Asuura non ɗon laamiiɗo doogariiɓe.
11Ɓe mahii kiisirɗe ɗuuɗɗe gam moƴƴingo boofi maɓɓe.
Amma kiisirɗe ɗen naannii ɓe der hakke.
12Baa mi winnana ɓe sariyaaji am, e fasara mum fu,
ɓe daarataa ɗi goɗɗum.
13Ɓee gaɗanammi kiiseteeɗi
gam ɓe keɓa no ɓe ƴakkiri tew mareefuuji ɗi ɓe gaɗiranimmi kiiseteeɗi ɗin.
Kiiseteeɗi ɗi ɓe gaɗantammi ɗin fottantaa am min Joomiraawo.
Jooni, mi siwtoran boofi maɓɓe.
Mi hiitoto ɓe gam sabbu hakkeeji maɓɓe,
mi wittina ɓe der leydi Misira.
14Himɓe Isira'iila yeggitanii am min taguɗo ɓe,
go ɓe mahani ko'e maɓɓe cuuɗi booɗɗi.
Himɓe Yahuuda mahii wanŋarɗe ɗuuɗɗe mahanaaɗe biriniiji
Amma mi wattan yiite der wanŋarɗe maɓɓe ɗen,
ŋe jaɓina cuuɗi maɓɓe booɗɗi ɗin.
Currently Selected:
Hose'a 8: BFB
Highlight
Share
Copy
Want to have your highlights saved across all your devices? Sign up or sign in
Bible Fulfulde Bénin © SIM International 2015, 2024.
