Hose'a 5
5
Liimaamiiɓe e laamiiɓe Isira'iila e wagginee
1Kettinee, onon *liimaamiiɓe!
Onon ardiiɓe Isira'iila, kettinee e noppi mon ɗiɗi!
Onon himɓe laamorde, kettinee faa wooɗa!
Haanuno nun gaɗanon himɓe kiita no haaniri,
amma on laatanake himɓe am pittol faa wanŋarde Misipa,
on laatanake ɓe hande taaruuji dow waanne Tabori.
2On loƴake der hakke faa Sitimu,
amma, min Joomiraawo, mi hiitoto on on fu.
3Mii anni himɓe lenyol Efurayimu
himɓe Isira'iila suuɗaaki am.
Onon himɓe Efurayimu on gaɗii jeenu,
go himɓe Isira'iila fu laati soɓuɓe.
4Gaɗuuji maɓɓe accataa ɓe bittaa to am, min Alla maɓɓe.
Gam suuno jeenu tan nun hebbi der ɓerɗe maɓɓe,
ɓe annaa am min Joomiraawo.
5Manŋu hoore himɓe maɓɓe e gaccoo ɓe.
Himɓe Isira'iila e Efurayimu yanan gam sabbu hakke mum.
Himɓe Yahuuda bo yanidan e maɓɓe.
6Ɓe garan dartugo am,
ɓe gadda baali, e na'i ɓe gaɗiranammi kiiseteeɗi,
amma ɓe ji'ataa am, min Joomiraawo,
gam mi woppii ɓe.
7Ɓe jammake am, min Joomiraawo,
gam ɓe dimii sukaaɓe jaaluuruuɓe.
Jooni, ɗum waɗataa kade lewru go mi halka ɓe,
kamɓe e ko ɓe goodi fu.
Himɓe Efurayimu e ɓe Yahuuda haɓan konu
8Puuree walardu faa wanŋarde Gibeya,
puuree fuuraanu konu faa wanŋarde Rama.
Kuuɓee kuuɓaali konu faa Beti Awen.
Onon himɓe lenyol Benyamin
wayɓe e wara diga ɓaawo mon.
9Nyanne kiitotoomi himɓe lenyol Efurayimu,
leydi maɓɓe laatoto bille.
Ko anninanmi himɓe lenyi Isira'iila laati nun gooŋa,
ɗum faɓɓitintaa.
10Ardiiɓe himɓe Yahuuda laati nun hande ɓuytooɓe gese woɓɓe ɓeyda e ŋa mum.
Amma mi waanjan ɓe mone am hande diyam gooruwol.
11Kiita doƴƴii himɓe Efurayimu
go ɓee kollee semme,
gam ɓe diiwan nun hennu.
12Mi laatanto himɓe lenyol Efurayimu hande ɓuure luggune,
mi laatanoo bo himɓe lenyol Yahuuda hande nawnande ne feewataa.
13Himɓe Efurayimu annitii nyaw mum,
himɓe Yahuuda bo yi'ii nawnande mum.
Himɓe Efurayimu dogganii leydi Asuura,
ɓe lili himɓe yaha to laamiiɗo mayri noddeteeɗo Yarebu gam eeloygo ballal,
amma laamiiɗo oo ɗon waawataa nyawtugo ɓe,
o waawataa haɓɓugo ɓuure maɓɓe.
14Gam mum, min Joomiraawo mi laatanto himɓe Efurayimu hande jaggere,
mi laatanto himɓe Yahuuda hande tew ladde kalluɗum.
Mi happan ɓe,
mi pusa ɓe, mi etta ɓe mi yawtida,
walaa teetoowo ɓe.
Tuubu himɓe Isira'iila ŋu laataaki gooŋa
15Joomiraawo wi'i:
Mi ummoto, mi witta e nokkuure am,
faa nyanne ɓe anniti boofi maɓɓe,
den ɓe janta ɓee daartammi.
Toora maɓɓe accan ɓe bittaa, ɓe eelammi ballal.
Currently Selected:
Hose'a 5: BFB
Highlight
Share
Copy
Want to have your highlights saved across all your devices? Sign up or sign in
Bible Fulfulde Bénin © SIM International 2015, 2024.
