Hose'a 4

No Hose'a gaccorii liimaamiiɓe, e laamiiɓe

(4–11)

No Joomiraawo gaccorii himɓe Isira'iila

1Onon himɓe Isira'iila,

kettinee ka batanmi on, min Joomiraawo.

Mii gaccoo on onon jooɗiiɓe der leydi nii ɗoo,

gam goɗɗo mon walaa yurumeene,

gooŋa walaa der mon.

Goɗɗo mon bo annaa am min Alla.

2Oon jaa'ontira,

oon pewontira, oon barontira.

Oon bujja, oon gaɗa bo jeenu.

Oon kollontira semme,

oon barontira wakkati fu.

3Gam mum, mi accan leydi nin fu yoora.

Himɓe jooɗiiɓe der mayri, e tewuji ladde, e colli fu fooƴan sanne.

Liƴƴi fu halkan.

Alla e gaccoo liimaamiiɓe Isira'iila

4Joomiraawo wi'i:

To goɗɗo wi'u, toonyoto nun goɗɗo,

naa bo wi'a gaccoto banniraawo mum.

Amma onon *liimaamiiɓe nun gaccotoomi.

5On janan caka nyalooma,

*annabiiɓe wonduɓe e mon bo yanan jemma.

Mi halkan inna mon.

6Himɓe am halkii gam ɓe annaa am.

Onon bo, on jiɗaa annitingo am.

Gam mum, min bo mi saloto on,

on laatataako kade *liimaamiiɓe am.

On jeggitanii ekkitinooje am, min Alla mon,

min bo mi yeggitanan sukaaɓe mon.

7Jaka no *liimaamiiɓe ɗuuɗirta,

non non ɓe boofirantammi.

Mi waylitan tedduŋal maɓɓe,

ŋal laatoo senteene.

8Tew mareefuuji ɗi himɓe am waɗiri kiiseteeɗi gam yaafuye hakkeeji mum nun ɓe marorii.

Gam mum nun ɓe jeeƴata himɓe am ɓen waɗa hakke.

9Gam mum, mi hiitoto *liimaamiiɓe kiita goota kan e himɓe am.

Mi hiitoto ɓe jaka no baadi maɓɓe foti,

mi yoɓan ɓe kalluɗum ɗum ɓe gaɗi.

10Ɓe nyaaman, amma ɓe kaarataa.

Ɓe gaɗan jeenu,

amma ɓe keɓataa sukaaɓe,

gam ɓe accii nanango am min Joomiraawo.

11Jeenu e innaboojam e haaŋa ɓe.

12Himɓe am e waɗa ƴamal to tooruuje gaɗiraaɗe e leɗɗe,

ɓee jiɗi leɗɗe hokka ɓe ko ɓe eelata.

Miilooji jeenu majjinii ɓe,

ɓee tokki tooruuje hande no debbo jeenoowo tokkirta worɓe,

go ɓe accimmi min Alla maɓɓe.

13Ɓee gaɗa kiiseteeɗi dow ko'e baalle,

ɓee buuɗa wardi luttoojum dow tile, e ley leɗɗe pewɗe feere feere ɗe ɗoogi mum weli.

Kan acci sukaaɓe maɓɓe rewɓe e waɗa jeenu,

esiraaɓe maɓɓe rewɓe bo e jammo worɓe mum.

14Mi hiitataako sukaaɓe maɓɓe rewɓe gam sabbu jeenu mum,

mi hiitataako bo esiraaɓe maɓɓe rewɓe gam sabbu ɓe jammake worɓe maɓɓe.

Amma onon *liimaamiiɓe nun kiitotoomi,

gam oon cuuɗoo oon gaɗida jeenu e kaaruwaaɓe,

oon gaɗida bo kiiseteeɗi e rewɓe saafooɓe tooruuje.

Hande no ballool gom wi'i: Lenyol ŋol walaa hakkillo halkan.

15Himɓe Isira'iila e saafa tooruuje,

amma onon himɓe Yahuuda, to on jemminee ɓe.

To on jahee Giligali, to on jahee Bayti Afeni,

oon kunoroo e inne am min Joomiraawo.

16Himɓe Isira'iila laatino nun hande nagge #4:16 Buruwe: Yiɗu nun wi'ugo sannanne naa bo nagge caliiŋe tokkugo na'i, buruwe, amma jooni Joomiraawo yoofan ɓe der ladde yaajune, ɓe dura hande baali. 17Himɓe Efurayimu e saafa tooruuje, accee ɓe ɓe tokka laawol maɓɓe. 18To ɓe jari bagi ɓe keennyii, ɓe jahan nun ɓe gaɗa jeenu. Centiniiɗum nun ardiiɓe maɓɓe ɓuri yiɗugo. 19Hennu waran etta ɓe yawtina, ɓe centan gam sabbu kiiseteeɗi ɗi ɓe gaɗata.

Currently Selected:

Hose'a 4: BFB

Highlight

Copy