TITU 1

Titu zĩkɛna Kɛrɛti bùsun

1Makũ Pɔlu, Luda zɔ̀blerii, Yesu Kirisi zĩ̀riin ma ũ. À ma zĩ mà gbɛ̃ kũ Luda ń sɛ́nɔ kara a náanikɛnan mà tó ò a donyĩzɛ yãpura dɔ̃, 2de ń wɛ́ gɔ̃ dɔ wɛ̃̀ndi kũ àdi lákaroi kũ Luda a lɛ́ sɛ̀ zaade andunia dí kátɛro. Àdi ɛ́kɛ to sɔ̃ro. 3Akũ yã pìi bò gupuraa a gɔrɔa waazi kũ Luda ó Surabarii dàmɛnɛ ma kɛ gũn lákũ à dìtɛ nà. 4Makũ mɛ́ ma takada dí kɛ̃̀nnɛ Titu, ma nɛ́ yãpura Yesu zɛ́ kũ ó kú lɛɛlɛ gũn. De Luda kũ Kirisi Yesu ó Surabariio gbɛ̃kɛ kɛnnɛ, à n gba aafiaa.

5Ma n to Kɛrɛti, de ǹ yã kũ ò gɔ̃̀ gwenɔ gɔ̃gɔ̃, ǹ gbɛ̃ zɔ̃kɔ̃nɔ ditɛ wɛ̃tɛ kũ wɛ̃tɛo lákũ ma ònnɛ nà. 6À mana gbɛ̃ zɔ̃kɔ̃ gɔ̃ kun taari sari nɔmɛndode ũ. A nɛ́nɔ gɔ̃ ludanaanikɛrinɔ ũ, òsungɔ̃ ń dɔ̃ nɛ́ zãzãde sãgbãnadenɔ ũro. 7Zaakũ gbɛ̃ zɔ̃kɔ̃ bi Luda zĩgwariimɛ, àsungɔ̃ de taaride ke ĩadãri ke pɔfɛ̃ri ke wɛ̃dɛri ke gbɛ̃ pãsĩ ke ɔgɔvãniwɛtɛri ũro. 8Séde àgɔ̃ de nibɔkũri ũ, laakaride kũ à zɛ̀ kũ yãmanakɛnaao ũ, gbɛ̃ súsu kũ à kú adona akũsɔ̃ à a zĩda kũna dɔ̃ ũ, 9gbɛ̃ kũ à zɛ̀ súsu kũ yã náanide kũ òdi dańnɛo ũ, de à le à lɛ́ da gbɛ̃ pãndenɔa kũ yãzɛdedannɛnaa pìio, à gbɛ̃ kũ à bò a yã kpɛnɔ ɛ́kɛ káńnɛ ń ɔĩ.

10Zaakũ sãyãmarisaride kũ òdi gbɛ̃nɔ likara kũ ń yã'onaaonɔn dasi, atɛ̃nsa gbɛ̃ kũ ò zɛ̀ kũ tɔ̃̀zɔ̃yãonɔ. 11Òdi ɔn bũnu yaka. À mana ò lɛ́sɔ dańnɛ. Òdi yã kũ à de ò dańnɛro dańnɛ ɔgɔ bɛ̃̀nɛ lena yãi. 12Kɛrɛti bùsu annabi ke pì, Kɛrɛtinɔ bi ɛ́kɛdenɔmɛ, nɔ̀bɔ pãsĩnɔmɛ, ye'uide pɔ́ke kopirisarinɔmɛ. 13Yã pì bi yãpuramɛ. Abire yãi ǹ kpãkɛ̃ńyĩ manamana, de ò zɛ́ sɛ́ súsu. 14Òsun laakari dɔ Yudanɔ garaaro ke gbɛ̃ kũ ò kɛ̃̀ yãpuraa yãditɛnanɔ. 15Pɔ́ke dìgɔ̃ gbãsĩ gbãsĩsaridenɔnɛro, akũsɔ̃ pɔ́ke dìgɔ̃ gbãsĩsari ludayãdarisari gbãsĩdenɔnɛro, kũ ń laasun kũ ń nɛ̀sɛɛo vãni yãi. 16Òdi pi ò Luda dɔ̃, akũ ń yãkɛnaa dì ń ɛ́kɛ bo. Bɛgirinɔmɛ, òdi yã maro, òdi fɔ̃ ò yã mana ke kɛro.

Currently Selected:

TITU 1: BB2005

Highlight

Copy

Compare