TITU 2

Yãdannɛna zɛ́de

1Mɔkɔ̃n sɔ̃, ǹ yã kũ àdi kɔ̃ sɛ́ kũ yãzɛdedannɛnaao dańnɛ. 2Ǹ da mare zɔ̃kɔ̃nɔnɛ ògɔ̃ ń zĩda kũna dɔ̃ gbɛ̃ bɛ̀ɛrɛdenɔ ũ, laakaridenɔ ũ. Ò zɛ́ sɛ́ súsu kũ yenyĩo kũ mɛnao. 3Ǹ da nɔgbɛ̃ zɔ̃kɔ̃nɔnɛ dɔ ń kunna gɔ̃ de donyĩri mananɔ kunna ũ. Òsungɔ̃ de gudɛri ke wɛ̃ zɔ̀nɔ ũro. Ò yã mana dańnɛ, 4de ò lɛ́ da nɔzãrenɔa ń baadi gɔ̃ ye a zãi kũ a nɛ́nɔo, 5ògɔ̃ de laakaridenɔ ũ gbãsĩ sari, ò laakari dɔ ń ɔn zĩa, ń baadi mì natɛ a zãnɛ de òsun Luda yã vãni boro yãi.

6Ǹ lɛ́ da kɛfɛnnanɔa dɔ ògɔ̃ laakari vĩ. 7Ǹ yãmanakɛna zɛ́ mɔńnɛ a pínki gũn. N yãdannɛna gɔ̃ bɛ̀ɛrɛ vĩ à kɔ̃ sí kũ n yãkɛnaao 8kũ yãzɛde kũ oni fɔ̃ ò a ɛ́kɛ boroo, de wé'i gbɛ̃ kũ ò bò n kpɛnɔ kũ, òsun yã vãni le ò o ó yã musuro yãi.

9Ǹ lɛ́ da zɔ̀nɔa ò mì natɛ ń dikirinɔnɛ yã sĩnda pínki gũn, ò yã kũ ani káńgu kɛ. Òsun yã liḿmaro. 10Òsun kpãni oḿmaro. Ò tó ògɔ̃ ń dɔ̃ gbɛ̃ náanidenɔ ũ manamana, de Luda ó Surabari yã kũ odì dańnɛ wɛ́ bo yã sĩnda pínki gũn.

11Zaakũ Luda gbɛ̃kɛ kũ à sù kũ surabanaao gbɛ̃ sĩnda pínkinɛɛ bò gupuraa. 12Gbɛ̃kɛ pì tɛn dawɛrɛ ò kpɛ li yã kũ adi kɔ̃ sí kũ Luda yãoronɛ kũ andunia pɔ́nidɛnanɔ, de ògɔ̃ ó zĩda kũna dɔ̃ gbɛ̃ mananɔ ũ, ludayãmarinɔ ũ andunia tera díkĩna gũn, 13ó wɛ́ gɔ̃ dɔ gɔrɔ arubarikade kũ ótɛn dãa. Àkũmɛ ó Luda zɔ̃kɔ̃ ó Surabari Yesu Kirisi sugɔrɔ gakuride ũ. 14À a zĩda kpà ó yãi, à ó bó vãni sĩnda pínki gũn, à ó gbãsĩ gògo, de ò gɔ̃ a zĩda gbɛ̃ kũ ò yãmanakɛna ania vĩnɔ ũ. 15Ǹ yã pìnɔ dańnɛ ǹ lɛ́ daoḿma. Ǹ kpãkɛ̃ńyĩ kũ iko kũ ń vĩo pínki. Ǹsun tó gbɛ̃ke n gya boro.

Currently Selected:

TITU 2: BB2005

Highlight

Copy

Compare