2 TIMƆTI 4

1Ma nannɛ Ludai kũ Kirisi Yesu kũ ani ɛra à su à kpata ble à yãkpatɛ kɛ kũ gbɛ̃ bɛ̃nɛnɔ kũ gyãwãndenɔo, 2ǹ Luda yã waazi kɛ. À zɛ́ kɛ̀ kesɔ̃ adi kɛro, ǹgɔ̃ kúo. Ǹ yã ditɛńnɛ, ǹ kpãkɛ̃ńyĩ, ǹ lɛ́ daḿma, ǹ yã dańnɛ kũ mɛna zɔ̃kɔ̃ɔo. 3Zaakũ gɔrɔke ni su kũ gbɛ̃nɔ ni we ò sã kpá Luda yãzɛdedannɛnaairo. Oni yãdannɛrinɔ kakarańyĩ ń zĩda pɔyeinaaamɛ, de ò yã kũ à kàńgu dańnɛ. 4Oni ń kɔ̀kɔtɔ zu yãpuranɛ ò arɛ dɔ garanɔa. 5Mɔkɔ̃n sɔ̃, ǹgɔ̃ laakari vĩ yã sĩnda pínki musu. Ǹ wari fɔ̃, ǹ baarunnakpari kɛna kɛ, ǹ n zĩ lɛ́ papa.

Pɔlu kunna ga lɛ́i zaa Romu

6Ma gɔrɔ pàpa kɔ̀, oni ma aru kɔ́tɛ sa'o'i ũ tera. 7Ma ɔsi mana kà, ma bàa lɛ̀ ma bɔtɛ. Má Yesu yã kũna ma a lɛ́ pàpa. 8Kunna mana fùra ditɛna, àtɛni ma dã sà. Dikiri yãkpatɛkɛri mana mɛ́ ani kúmɛnɛ yãkpatɛkɛgɔrɔ zĩ. Adi kɛ makũmɛ ma adoro, kũ gbɛ̃ kũ ò ye a sunaainɔ ń pínkimɛ.

9Ǹ zɛ́ wɛtɛ ǹ su ma kĩnaa likalika. 10Demasi ma ton à tà Tɛsalonika, kũ à ye anduniai yãi. Kɛrɛsɛnsi tà Galatia bùsun, akũsɔ̃ Titu tà Dalamatia bùsun. 11Luku mɛ́ à gɔ̃̀ kũmao ado. Ǹ Maaku sɛ́ à mɔ́ lɛɛlɛ, zaakũ àdi kpámai zĩ gũn manamana. 12Ma Tikiku gbàrɛ Ɛfesu. 13Tó ntɛn su, ǹ ma utagyaba kũ ma tò Kaapu bɛa zaa Toroasi sɛ́ ǹ suomɛnɛ kũ ma takadanɔ, atɛ̃nsa a kũ ò kɛ̀ kũ báraonɔ.

14Alɛsanda sia yã vãni kɛ̀mɛnɛ manamana. Dikiri ni yã kũ à kɛ̀ɛ pì fĩna bonɛ. 15Ǹ laakari kɛi, zaakũ à bò ó yã kpɛ pãsĩpãsĩ. 16Yãkpatɛkɛna kũmao káaku gũn gbɛ̃ke dí zɛ kũmaoro, ò ma ton ń pínki. Luda sún ń yã pì daro. 17Dikiri zɛ̀ kũmao à ma gba gbãna, akũ ma zɛ́ lè ma waazi kɛ̀ ma a lɛ́ pàpa, buri pãndenɔ mà ń pínki. À ma bo músu lɛ́i. 18Dikiri ni ma bo yã vãni gũn pínki, ani ma sura ba ari mà gɛ́ káo a kpatan musu. Àkũ mɛ́ à gakuri vĩ gɔrɔ sĩnda pínki, aami.

Lɛ́zammanaa

19Ǹ fɔ kpá Pirisila kũ Akilaooa kũ Ɔnɛsifɔru bedenɔ. 20Erasatu gɔ̃̀ Kɔrinti. Ma Torofimu tò kũ gyão Milɛtu. 21Ǹ zɛ́ wɛtɛ ǹ su ari bunsirɛ gɔ̃ ká. Yubulu kũ Pudɛnio kũ Linuo kũ Kalaudiao kũ ó gbɛ̃nɔ pínki fɔ kpàmma. 22Dikiri gɔ̃ kú kũnwo. À gbɛ̃kɛ kɛárɛ.

Currently Selected:

2 TIMƆTI 4: BB2005

Highlight

Copy

Compare