ZIA YÃ 9

1Malaika sɔɔrode a kãkãki pɛ̀, akũ ma susunɛ è, à bò ludambɛ à lɛ̀tɛ zĩtɛ. Akũ ò Zĩngowɛɛ lòkoto mɔ̀nɛ kpàa, 2akũ susunɛ pì Zĩngo wɛ̀ɛ lòkoto pì zɛ́ wɛ̃̀. Túsukpɛ bòn lán tãmatɛ zɔ̃kɔ̃ túsukpɛ bà, akũ Zĩngo wɛɛ pì túsukpɛ ifãntɛ̃ sira kũ̀, gu kɛ̀ síi níkiniki. 3Kwanɔ bɔ̀tɛ túsukpɛ pìi gũn, ò dà zĩtɛla. Ò ń gbá gbãna lán andunia fínɔ gbãna bà. 4Ò pìńnɛ òsun wari dɔ sɛ̃̀ɛaro ke lá ke lí ke, séde gbɛ̃ kũ ò Luda sèeda vĩ ń mì'arɛaronɔ. 5Odi ń gba zɛ́ ò gbɛ̃nɔ dɛdɛro, ama oni ń da mɛ̀'ũmmanan ari mɔ sɔɔro. Ń wãwã de lán fí gbɛ̃pana wãwã bàmɛ. 6Gɔrɔ birenɔa gbɛ̃nɔ ni ga wɛtɛ, oni ero. Ga ni ni ń dɛ, ama ga ni bàa lɛ́ńnɛ.

7Kwa pìnɔ de lán sɔ̃ kũ ò soru mà kũ zĩ̀ionɔ bà. Ò pɔ́ke kúkuna lán wura fùraa bà, ń ãn de lán bisãsiri ãnn bà. 8Ò mìkã vĩ gbã̀nagbãna lán nɔgbɛ̃ mìkã bà, ò sakanɔ vĩ lán músu saka bà. 9Ń kùsɛ de lán mɔ̀ uta bà, ń dɛ̀mbɛrɛ kĩni dɔ lán gó dasi kũ sɔ̃nɔ tɛn gátɛ zĩ̀i gũn kĩni bà. 10Ò vlã vĩ kũ kàao lán fí pɔ́ bà. Ń gbãna kú ń vlã pìnɔa, de ò wari dɔo gbɛ̃nɔa ari mɔ sɔɔro. 11Zĩngowɛɛ lòkoto malaikaa pìmɛ ń kína ũ. Kũ Eberu yão a tɔ́n Abadɔ̃. Kũ Giriki yão sɔ̃ Apɔliɔ̃. 12Yã pãsĩ káakupɔ gɛ̃̀tɛ, a mɛ̀n planɔ tɛn su a kpɛ dɔ.

13Malaika suddode a kãkãki pɛ̀. Ma kòtoo mà à bò Luda arɛ turaretitikpataki kũ ò pì kũ wuraao bɛ̃nɛ siikɔ̃nɔ kpa. 14À pì malaika suddode kũ à kãkãki kũnaanɛ: Ǹ malaika gbɛ̃nɔn siikɔ̃ kũ ò yĩyĩna swada kũ òdi pi Yuflati sarɛnɔ poro. 15Akũ à malaika gbɛ̃nɔn siikɔ̃ kũ ò ń soru kɛ̀ wɛ̃̀ birea mɔ birea gɔrɔ birea gɔrɔ zaka bire yãinɔ pòro, de ò bisãsirinɔ lɛu aakɔ̃de dɛdɛ yãi. 16Ò soza sɔ̃denɔ dasi lɛ́ òmɛnɛ, ò gbɛ̃nɔn miliɔ̃ wàa domɛ. 17Wɛ́gupu'enaa pìi gũn lán ma sɔ̃ pìnɔ kũ ń dìrinɔ è nàn dí: Ò mɔ̀ utanɔ dadana tɛ̃ɛ lán tɛ́ bà, búgu lán buluu bà, kpà'ikpa'i lán ifãntɛ̃gbɔ̃ɔ bà. Sɔ̃ pìnɔ mì de lán músu mìi bà. Tɛ́ kũ túsukpɛo kũ ifãntɛ̃gbɔ̃ɔo tɛn bo ń lɛ́n. 18Kisira mɛ̀n aakɔ̃ díkĩnanɔ, tɛ́ kũ túsukpɛo kũ ifãntɛ̃gbɔ̃ kũ àtɛn bo ń lɛ́ gũnwo mɛ́ à bisãsirinɔ lɛu aakɔ̃de dɛ̀dɛ. 19Zaakũ sɔ̃ pìnɔ gbãna kú ń lɛ́ gũn kũ ń vlão dɔ. Ń vlã de lán mlɛ̃̀ɛ bà, ò mì vĩ kũ òdi wari dɔo gbɛ̃nɔa.

20Gbɛ̃ kpara kũ odi gaga kisira pìi musuronɔ, odi nɛ̀sɛ litɛ ò pɔ́ kũ ò kɛ̀ yã tòro. Ò kpɛ́ òtɛn kútɛ tãnanɔnɛ kũ pɔ́ kũ ò kɛ̀ kũ wuraao kũ andurufuuo kũ mɔ̀gotɛ̃o kũ gbɛ̀ɛo kũ lío. Pɔ́ pìnɔ dì gu ero, òdi yã maro, òdi táa o sɔ̃ro. 21Odi nɛ̀sɛ litɛ ò ń gbɛ̃dɛna tòro ke ń pɔ́dammana ke ń gbãsĩkɛna ke ń kpãni'ona.

Currently Selected:

ZIA YÃ 9: BB2005

Highlight

Copy

Compare