ZIA YÃ 8

Kãni'ɔ supplade gonaa

1Kũ Sãnɛ Bɔ̀rɔ kãni'ɔ supplade gò, ludambɛ kɛ̀ kítikiti lákũ minti baraakuri taka bà. 2Akũ ma malaika gbɛ̃nɔn suppla kũ òdigɔ̃ zɛzɛna Luda arɛnɔ è, ò kãkãki kpàḿma mɛ̀n suppla.

3Akũ malaika pãnde sù à zɛ̀ turaretitikpataki kũ ò pì kũ wuraao sarɛ, à tɛ́sibɔ kũ ò pì kũ wuraao kũna. Ò turaretiti kpàa dasidasi de à kakara kũ Luda gbɛ̃nɔ pínki aduakɛnaao à kpata, akũ à kpàta gbà arɛ turaretitikpataki pìia. 4Akũ turaretiti túsukpɛ kũ Luda gbɛ̃nɔ aduakɛnaao fùtɛ malaika ɔĩ Luda arɛ. 5Akũ malaikaa pì tɛ́sibɔɔ sɛ̀, à tɛ́ sìo turaretitikpatakia à pà, akũ à zù zĩtɛ. Legũ tɛn pata, àtɛn pũtã, àtɛn pí, akũ zĩtɛ yĩ̀gãyĩgã.

Kãkãki mɛ̀n supplanɔ pɛnaa

6Malaika gbɛ̃nɔn suppla kũ ò kãkãki mɛ̀n suppla kũnaa pìnɔ a pɛna soru kɛ̀. 7A káakude a kãkãki pɛ̀, akũ ò legũgbɛ kũ tɛ́o kakarana kũ aruo kɔ̀tɛ zĩtɛ. Zĩtɛ lɛu aakɔ̃de tɛ́ kũ̀, línɔ lɛu aakɔ̃de tɛ́ kũ̀, sɛ̃̀ ísi tɛ́ kũ̀ míɔmiɔ.

8Malaika plade a kãkãki pɛ̀, akũ pɔ́ tɛ́de bò à sì ísiran lán kpi zɔ̃kɔ̃ɔ bà. Ísira lɛu aakɔ̃de lì aru ũ, 9akũ ísira pɔ́ bɛ̃nɛnɔ lɛu aakɔ̃de gàga, gó'itɛnɔ lɛu aakɔ̃de yàka.

10Malaika aakɔ̃de a kãkãki pɛ̀, akũ susunɛ zɔ̃kɔ̃ kũ àtɛn tɛ́ kũ lán sɛ̃̀ntɛ bàa bò ludambɛ, à lɛ̀tɛ à dà swanɔ kũ ísɛ̃bokinɔ lɛu aakɔ̃dela. 11Susunɛ pì tɔ́n Sɛwɛ. Í lɛu aakɔ̃de lì sɛwɛ ũ, akũ gbɛ̃ kũ ò í pìi mìnɔ gàga dasi a kyã̀kyã yãi.

12Malaika siikɔ̃de a kãkãki pɛ̀, akũ ò ifãntɛ̃ lɛu aakɔ̃de lɛ̀ kũ mɔvuraao lɛu aakɔ̃de kũ susunɛnɔ lɛu aakɔ̃de, de ń lɛu aakɔ̃de sira kũ yãi. Akũ fãnantɛ̃ lɛu aakɔ̃de gɔ̃̀ gupurakũnaa sari, lɛn à kun lɛ gwãani dɔ. 13Akũ ma vãu è, àtɛn vura musumusu. Ma mà, à wiki gbãna lɛ̀ à pì: Waiyoo, waiyoo, waiyoo gbɛ̃ kũ ò kú zĩtɛnɔ malaika gbɛ̃nɔn aakɔ̃ kũ ò gɔ̃̀ pìnɔ kãkãki'ũ kũ àtɛn gɛ́ bo yãi.

Currently Selected:

ZIA YÃ 8: BB2005

Highlight

Copy

Compare