ZIA YÃ 7
7
Sèedakɛna Luda zɔ̀blerinɔa
1Abire gbɛra ma malaika gbɛ̃nɔn siikɔ̃nɔ è zɛzɛna andunia kusuru siikɔ̃nɔa, ń baadi a kusuru ĩa kũna, de ĩa sún pá zĩtɛ ke ísira ke lí kearo yãi. 2Akũ ma malaika pãnde è, à bò à fùtɛ ifãboki kpa, à Luda Wɛ̃̀ndide sèedakɛbɔ kũna. À lɛ́ gbãna zù malaika gbɛ̃nɔn siikɔ̃ kũ ò ń gbá zɛ́ ò zĩtɛ kũ ísirao yaka pìnɔi 3à pì: Àsun zĩtɛ ke ísira ke línɔ yakaro ari ò sèeda kɛ ó Luda zɔ̀blerinɔ mì'arɛnɔa. 4Akũ ò gbɛ̃ kũ ò sèedaa pìi kɛ̀ḿmanɔ lɛ́ òmɛnɛ, ń gbɛ̃nɔn dúbu basuppla awɛɛsiikɔ̃mɛ. Ò bò Isaraila buri sĩnda pínki gũn.
5Yuda burinɔ gbɛ̃nɔn dúbu kuri awɛɛpla
Rubɛni burinɔ gbɛ̃nɔn dúbu kuri awɛɛpla
Gada burinɔ gbɛ̃nɔn dúbu kuri awɛɛpla
6Asa burinɔ gbɛ̃nɔn dúbu kuri awɛɛpla
Nafatali burinɔ gbɛ̃nɔn dúbu kuri awɛɛpla
Manase burinɔ gbɛ̃nɔn dúbu kuri awɛɛpla
7Simɛɔ burinɔ gbɛ̃nɔn dúbu kuri awɛɛpla
Levi burinɔ gbɛ̃nɔn dúbu kuri awɛɛpla
Isaka burinɔ gbɛ̃nɔn dúbu kuri awɛɛpla
8Zɛbuluni burinɔ gbɛ̃nɔn dúbu kuri awɛɛpla
Yusufu burinɔ gbɛ̃nɔn dúbu kuri awɛɛpla
Biliaminu burinɔ gbɛ̃nɔn dúbu kuri awɛɛpla.
Buri sĩnda pínki kakarana ludambɛ
9Abire gbɛra ma gbɛ̃nɔ è dasidasi, oni fɔ̃ ò ń lɛ́ dɔ̃ro. Ò bò bùsu sĩnda pínki gũn, buri sĩnda pínki gũn, gbɛ̃ sĩnda pínki gũn, buriyã sĩnda pínki gũn. Ò zɛzɛna gbà kũ Sãnɛ Bɔ̀rɔɔo arɛ. Ò utagyaba pura dadana, ò zaa lánɔ kũkũna ń ɔĩ. 10Òtɛn wiki gbãna lɛ́ òtɛn pi:
Surabanaa dì bo ó Luda kũ à vutɛna gbàaa
kũ Sãnɛ Bɔ̀rɔɔo kiamɛ.
11Malaikanɔn zɛzɛna ò lìka gbà kũ gbɛ̃ zɔ̃kɔ̃nɔ kũ pɔ́ bɛ̃nɛ mɛ̀n siikɔ̃nɔi ń pínki, akũ ò kùtɛkutɛ gbàa pì arɛ ò donyĩ kɛ̀ Ludanɛ 12ò pì:
Aami! Ó Luda mɛ́ à tɔ́ vĩ kũ gakurio
kũ ɔ̃ndɔ̃o kũ sáabuo kũ bɛ̀ɛrɛɛo
kũ ikooo kũ gbãnao gɔrɔ sĩnda pínki. Aami!
13Akũ gbɛ̃ zɔ̃kɔ̃ɔ pìnɔ doke ma la à pì: Dínɔn gyabapuradari díkĩnanɔ ũu? Ò bò máa? 14Ma pìnɛ: Baa, mɔkɔ̃n mɛ́ ń dɔ̃. Akũ à òmɛnɛ: Gbɛ̃ kũ ò bò wɛ́tãmma zɔ̃kɔ̃ɔ gũnnɔmɛ. Ò ń utagyabaa pìnɔ pìpi Sãnɛ Bɔ̀rɔ aru gũn à pura kũ̀.
15Abire yãin ò kú Luda gbà arɛ,
òtɛn doi a kpɛ́n fãnantɛ̃ kũ gwãanio.
Gbɛ̃ kũ à vutɛna gbàaa pìi dì a kuta kúńla.
16Nà ke ími ni ń dɛ doro,
ifãntɛ̃ ni ń lɛ́ro, gu ni wãḿmaro,
17zaakũ Sãnɛ Bɔ̀rɔ kũ à kú gbà guragura ni kɛ ń Dã̀ri ũ,
ani dońnɛ arɛ ari ísɛ̃ wɛ̃̀ndide bokia,
gbasa Luda ni ń wɛ́tɛ̃ warawarańnɛ pínki.
Currently Selected:
ZIA YÃ 7: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
