ZIA YÃ 4
4
Donyĩkɛna Ludanɛ zaa musu
1Abire gbɛra ma zɛ́ è wɛ̃na ludambɛ. Akũ ma kòto kũ ma mà káaku lán kãkãki'ũ bàa mà dɔ à pì: Ǹ mɔ́ la, mani yã kũ ani su abire gbɛra mɔnnɛ. 2Gwe gɔ̃̀nɔ Luda Nini dìma, akũ ma gbàa è ludambɛ gwe, gbɛ̃ke vutɛa. 3Gbɛ̃ kũ à vutɛnaa pì tɛn tɛ́ kɛ lán gbɛ̀ bɛ̀ɛrɛde kũ òdi pi diamɔɔ bà kesɔ̃ kaanɛlia. Ludambɛfɛ̃nɛda lika bára pìii, a í de lán lá'i taka bà lán ɛmɛradi bà. 4Gbà mɛ̀n baro awɛɛsiikɔ̃nɔn likai, gbɛ̃ zɔ̃kɔ̃ gbɛ̃nɔn baro awɛɛsiikɔ̃nɔn vutɛvutɛna bára pìnɔa. Ò pɔ́ pura dadana, ò wura fùra kúkuna. 5Legũ tɛn pí, àtɛni bo bára pì kĩnaa, àtɛni pũtã, àtɛni pata. fitila nana gbàa pì arɛ mɛ̀n suppla, mɔ́kɔ̃nɔmɛ Luda Nini mɛ̀n supplanɔ ũ. 6Dígi kú gbàa pì arɛ lán ísira bà. A í kɛ̀ gárangaran lán gbɛ̀digi bà.
Gbàa pìnɔ daguran pɔ́ bɛ̃nɛ mɛ̀n siikɔ̃nɔn lika gbàa pìii. Wɛ́ dɔdɔḿma kpɛ kũ arɛo. 7Pɔ́ bɛ̃nɛ pìnɔ káakupɔ de lán músu bà, a plade de lán zùsaa bà, a aakɔ̃de ãn de lán bisãsiri ãnn bà, a siikɔ̃de de lán vãu kũ àtɛn vura bà. 8Pɔ́ bɛ̃nɛ mɛ̀n siikɔ̃ pìnɔ baadi dɛ̀mbɛrɛ vĩ mɛ̀n suddodo. Wɛ́ dɔdɔ ń dɛ̀mbɛrɛ pìnɔa, a gũn kũ kpɛo. Fãnantɛ̃ kũ gwãanio òdigɔ̃ o lakanaa sari:
Kúadona, kúadona, kúadona,
Dikiri Luda Gbãnasĩndapinkide.
Ń kun yã, ń kun kũ a terao, akũsɔ̃ ntɛn su.
9Gɔrɔ kũ pɔ́ bɛ̃nɛ mɛ̀n siikɔ̃ pìnɔ gbɛ̃ kũ à vutɛna gbàaa, akũsɔ̃ àdigɔ̃ kun gɔrɔ sĩnda pínki pì tɔ́ kpà, ò bɛ̀ɛrɛɛ lìnɛ, ò a sáabu kpà, 10gbɛ̃ zɔ̃kɔ̃ gbɛ̃nɔn baro awɛɛsiikɔ̃ pìnɔ dì wútɛwutɛ a arɛ ò donyĩ kɛnɛ, òdi ń fùra gogo ò kátɛ gbàa pì arɛ ò pi:
11Dikiri ó Luda, n ka ò n tɔ́ kpá,
ò bɛ̀ɛrɛ kũ gbãnao linnɛ,
zaakũ n pɔ́ sĩnda pínki kɛ̀,
ń kɛna kũ ń kunnaao bi n pɔyenyĩnaamɛ.
Currently Selected:
ZIA YÃ 4: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
