ZIA YÃ 19

Pɔnnakɛna ludambɛ

1Abire gbɛra ma kòto gbãna mà ludambɛ lán pari yã'onaa bà à pì:

Aleluya! Ó Luda mɛ́ à zĩ̀i blè!

Àkũ mɛ́ à gakuri kũ gbãnao vĩ ado,

2zaakũ àdi yãkpatɛ kɛ kũńwo

a zɛa kũ yãpuraomɛ.

À yãkpatɛ kɛ̀ kũ karua zɔ̃kɔ̃

kũ à andunia yàka kũ a pãpãkɛnaao.

À a zɔ̀blerinɔ dɛdɛna fĩna bòa.

3Ò pì dɔ:

Aleluya!

A túsukpɛ nigɔ̃ dɔ gɔrɔ sĩnda pínkimɛ.

4Gbɛ̃ zɔ̃kɔ̃ gbɛ̃nɔn baro awɛɛsiikɔ̃nɔ kũ pɔ́ bɛ̃nɛ mɛ̀n siikɔ̃nɔ wùtɛwutɛ ò donyĩ kɛ̀ Luda kũ à vutɛna a gbàaanɛ ò pì:

Aami! Aleluya!

Sãnɛ Bɔ̀rɔ nɔsɛpɔble

5Akũ ma kòtoo mà bona gbàa pì kĩnaa à pì:

À ó Luda tɔ́ kpá a zɔ̀blerinɔ á pínki,

ákɔ̃nɔ kũ á a vĩna vĩnɔ,

nɛ́ fíti gbɛ̃ zɔ̃kɔ̃.

6Akũ ma kòtoo mà lán pari yã'onaa bà, lán ísɔ̃kɛna kĩni bà, lán legũpũtãna gbãna bà à pì:

Aleluya!

Dikiri ó Luda Gbãnasĩndapinkide nà kíblenaaa.

7Ò pɔnna kɛ, ò yáa dɔ, ò a tɔ́ kpá,

zaakũ Sãnɛ Bɔ̀rɔ nɔsɛgɔrɔ kà, a nɔ sorumii mà.

8Ò táaru biza pura táitai kũ àtɛn tɛ́ kɛ kpàa à yĩ.

Táaru biza pì bi Luda gbɛ̃nɔ yãmanakɛnanɔmɛ.

9Malaikaa òmɛnɛ: Ǹ kɛ̃. Arubarikadenɔn gbɛ̃ kũ ò ń sísi Sãnɛ Bɔ̀rɔɔ pìi nɔsɛpɔbleanɔ ũ. À òmɛnɛ dɔ: Luda yã yãpuran gwe. 10Ma wutɛ a arɛ de mà donyĩ kɛnɛ, akũ à òmɛnɛ: Ǹ abire tó. Ǹ donyĩ kɛ Ludanɛ. N zɔ̀bleri daken ma ũ kũ n gbɛ̃ kũ ò yã kũ Yesu de a sèedade ũ kũnanɔ. Zaakũ yã kũ Yesu de a sèedade ũmɛ annabikɛyã'ona mì ũ.

Kirisi suna dina sɔ̃ puraa

11Akũ ma ludambɛ è wɛ̃kɔ̃ana, akũsɔ̃ pura bò, gbɛ̃ kũ à dia tɔ́n Náanide Yãpurade. Àdi yãkpatɛ kɛ kũńwo, àdi zĩ̀ ká kũńwo a zɛ́a. 12A wɛ́ de lán tɛ́vuraa bà, à kífura kúkuna dasi. Tɔ́ ke kɛ̃na a mì'arɛa, gbɛ̃ke tɔ́ pì yáasi dɔ̃ro, akãa baasiro. 13À uta kũ ò dà aru gũn dana. À tɔ́n Luda Yã. 14Ludambɛ zĩ̀karinɔn tɛ́i, ò didi sɔ̃ puranɔa kũ táaru biza pú táitaio dadana. 15Fɛ̃nɛda lɛ́nna tɛn bo a lɛ́n, de à burinɔ lɛ́o. Ani kí bleḿma kũ mɔ̀ gòoo, ani gɛ̀sɛ pɛ́tɛ geepi nɛ́nɔa geepi'ifɛ̃ki gũn, àkũmɛ Luda Gbãnasĩndapinkide pɔfɛ̃ pãsĩ ũ. 16Ò tɔ́ díkĩna kɛ̃̀ a utaa kũ a gbádao:

Kínanɔ Kína, dikirinɔ Dikiri.

17Akũ ma malaikaa è à zɛna ifãntɛ̃n. À lɛ́ gbãna zù bã kũ òtɛn vura musumusunɔi pínki à pì: À mɔ́ à kakara à pɔ́ble zɔ̃kɔ̃ kũ Luda kɛ̀árɛ ble, 18de à le à kínanɔ gɛ̀ só kũ soza gbɛ̃ zɔ̃kɔ̃nɔ kũ gbãnadenɔ kũ sɔ̃nɔ kũ ń dìrinɔ kũ gbɛ̃ sĩnda pínkinɔ, zĩdadenɔ kũ zɔ̀nɔ, nɛ́ fíti gbɛ̃ zɔ̃kɔ̃. 19Akũ ma nɔ̀bɔ pãsĩ è kũ andunia kínanɔ kũ ń zĩ̀karinɔ, ò kɔ̃ kàkara ò zĩ̀ ká kũ gbɛ̃ kũ à di sɔ̃a pìio kũ a zĩ̀karinɔ. 20Ò nɔ̀bɔ pãsĩ pìi kũ̀ lɛɛlɛ kũ annabi ɛ́kɛ kũ à daboyãnɔ kɛ̀ a arɛo. Daboyã pìnɔn à gbɛ̃ kũ ò nɔ̀bɔ pãsĩ sèeda vĩ, ò kùtɛ a takanɛnɔ sã̀tɛo. Ò ń zú tɛ́ sɛ̀bɛ kũ àtɛn kũ kũ ifãntɛ̃gbɔ̃ɔo gũn bɛ̃nɛ ń pla ń pínki. 21Gbɛ̃ kũ à di sɔ̃a gbɛ̃ kparanɔ dɛ̀dɛ kũ fɛ̃nɛda kũ à bò a lɛ́ gũnwo, akũ bãnɔ ń gɛ̀nɔ blè ò kã̀ pínki.

Currently Selected:

ZIA YÃ 19: BB2005

Highlight

Copy

Compare