ZIA YÃ 16

Luda pɔfɛ̃kipana anduniaa

1Akũ ma kòto gbãna mà bona Luda kpɛ́n, à pì malaika gbɛ̃nɔn suppla pìnɔnɛ: À gɛ́ à Luda pɔfɛ̃ kũ à kú kɛrɛ mɛ̀n suppla pìnɔ gũn atɛ̃ anduniaa.

2A káakude gɛ̀ɛ à a kɛrɛ àtɛ̃ anduniaa. Akũ bɔ̀bũnu vãni pãsĩnɔ bò gbɛ̃ kũ ò nɔ̀bɔ pãsĩ sèeda vĩ, kũ òdi donyĩ kɛ a takanɛnɔa.

3A plade a kɛrɛ àtɛ̃ ísiraa. Akũ ísira'i gɔ̃̀ lán gɛ̀ aru bà, pɔ́ bɛ̃nɛ kũ ò kú a gũnnɔ gàga pínki.

4A aakɔ̃de a kɛrɛ àtɛ̃ swanɔa kũ ísɛ̃bokinɔ, akũ í pìnɔ lì aru ũ. 5Akũ ma mà malaika kũ à í iko vĩ pì:

Kúadonade mɔkɔ̃n kũ ń kun yã,

akũsɔ̃ ń kun kũ a terao,

n yãkpatɛ kɛ̀ kũńwo a zɛ́amɛ.

6Ò n gbɛ̃nɔ kũ n annabinɔ aru kɔ̀tɛ,

akũ n aru kpàḿma ò mì.

À kɔ̃ sì kũńwo lɛ.

7Akũ ma kòtoo mà bona sa'okia à pì:

Lɛmɛ, Dikiri Luda Gbãnasĩndapinkide,

n yãkpatɛ kɛ̀ kũńwo a zɛ́amɛ,

akũsɔ̃ ń yãpura vĩ.

8A siikɔ̃de a kɛrɛ àtɛ̃ ifãntɛ̃a, à tò a tɛ́ bisãsirinɔ kpàta. 9A puusu gbãna ń pá, akũ ò Luda kũ à kisira birenɔ iko vĩ tɔ́ bɛ̃̀nɛɛ sì. Odi nɛ̀sɛ litɛ ò bɛ̀ɛrɛ línɛro.

10A sɔɔrode a kɛrɛ àtɛ̃ nɔ̀bɔ pãsĩ gbàaa, akũ gusira dà a kpatala. Gbɛ̃nɔ tɛni ń lɛ́ yãkatɛ wãwã gũn, 11akũ ò Luda Musude tɔ́ bɛ̃̀nɛɛ sì ń wãwã kũ ń bɔ̀bũnuo yãi. Odi nɛ̀sɛ litɛ ò kpɛ lì ń yãkɛnanɔnɛro.

12A suddode a kɛrɛ àtɛ̃ swada kũ òdi pi Yuflatia, akũ swa pì í bàba, akũ zɛ́ bò ifãboki kpa kínanɔnɛ. 13Akũ ma tãnanɔ è mɛ̀n aakɔ̃ lán blɔ̀nɔ bà, òtɛn bo kwã kũ nɔ̀bɔ pãsĩo kũ annabi ɛ́kɛo lɛ́n. 14Tãna dabokɛrinɔmɛ. Òtɛn gɛ́ andunia pínki kínanɔ kĩnaa, de ò ń kakara ò zĩ̀ ká Luda Gbãnasĩndapinkide gɔrɔ zɔ̃kɔ̃ zĩ yãi. 15Ǹ ma! Mani su lán kpãni bàmɛ. Arubarikaden gbɛ̃ kũ á wɛ́ gɔ̃ dɔ ũ, kũ à a pɔ́kasanɔ dana de àsun bo pótompo ò a pótompokɛ ero yãi. 16Akũ tãna pìnɔ kína pìnɔ kàkara gu kũ òdi pi kũ Eberu yão Amagɛdɔ̃.

17À supplade a kɛrɛ àtɛ̃ ĩaa. Akũ kòto gbãna bò gbà kĩnaa Luda kpɛ́n à pì: À kɛ̀n gwe. 18Legũ tɛn pí, àtɛn pata, àtɛn pũtã. Zĩtɛ yĩ̀gãyĩgã pãsĩpãsĩ. Zaa lákũ bisãsirinɔn kú zĩtɛn nà, a taka buri dí kɛ zikiro, à kɛ̀ pãsĩ manamana. 19Wɛ́ra zɔ̃kɔ̃ɔ kpàatɛkɔ̃rɛ lɛu aakɔ̃, akũ buri sĩnda pínki wɛ́ranɔ gbòro. Wɛ́ra zɔ̃kɔ̃ Babilɔnu yã dɔ̀ Ludagu, akũ à a pɔfɛ̃ pãsĩ wɛ̃ toko kpàa, à mì. 20Ísira luannɔ gɛ̃̀tɛ pínki, odi kpinɔ e doro. 21Legũgbɛ zɔ̃kɔ̃nɔ bò ludambɛ, ò kà kiloo bupla. Ò sìsi bisãsirinɔa, akũ ò Luda tɔ́ bɛ̃̀nɛɛ sì legũgbɛ kisira pì yãi, zaakũ kisira pì pãsĩ manamana.

Currently Selected:

ZIA YÃ 16: BB2005

Highlight

Copy

Compare