ZIA YÃ 17

Karua kũ à di nɔ̀bɔ pãsĩa

1Malaika gbɛ̃nɔn suppla kũ ò kɛrɛ mɛ̀n suppla kũnaa pìnɔ doke pìmɛnɛ: Ǹ mɔ́ mà yã kũ ani wí karua zɔ̃kɔ̃ kũ à vutɛna swanɔa dasi mɔnnɛ. 2Andunia kínanɔ pãpã kɛ̀ kãao, andunia gbɛ̃nɔ a pãpãkɛna wɛ̃ mì ò kã̀. 3Luda Nini dinama pì gũn malaikaa pìi gɛ̀ɛ kũmao sɛ̃̀n. Akũ ma nɔgbɛ̃ ke è dina nɔ̀bɔ pãsĩ tɛ̃raa. Dɔkɛna kũ Ludao tɔ́nɔ fĩfĩa, a mìnɔ mɛ̀n suppla, a bɛ̃nɛnɔ mɛ̀n kuri. 4Nɔgbɛ̃ pì biza tɛ̃ra kũ a gaaruradeo yĩna, à zãblebɔ kũ ò pì kũ wuraaonɔ dana kũ gbɛ̀ bɛ̀ɛrɛdenɔ kũ òsonɔ. À wura toko kũna, tɛ̃̀ pɔ́nɔ kũ a pãpãkɛna gbãsĩnɔ kán à pà. 5Ò tɔ́ asiride kɛ̃̀ a mì'arɛa ò pì:

Wɛ́ra zɔ̃kɔ̃ Babilɔnu,

pãpãkɛrinɔ kũ andunia tɛ̃̀ pɔ́nɔ da.

6Ma è nɔgbɛ̃ pìi Luda gbɛ̃ kũ ò ń dɛdɛ Yesu sèedakpana yãinɔ aru mì à kã̀, àtɛni a dɛ lán wɛ̃ bà.

Kũ ma a è, yã pìi bò ma sarɛ manamana. 7Akũ malaikaa pì ma la à pì: Bɔ́ yã mɛ́ à tò yã pìi bò n sarɛɛ? Mani nɔgbɛ̃ pì asiri onnɛ kũ nɔ̀bɔ pãsĩ kũ à a sɛna asirio, kũ a mìnɔ mɛ̀n suppla a bɛ̃nɛnɔ mɛ̀n kurii pìi. 8Nɔ̀bɔ pãsĩ kũ n èe pì kun yã, à kun tera doro, akũsɔ̃ ani bo Zĩngo wɛ̀ɛ lòkotoo gũn à mì pɛ́ kakatɛnaaa. Gbɛ̃ kũ ò kú zĩtɛ, akũsɔ̃ ń tɔ́ kú wɛ̃̀ndi takadan zaa andunia naanagɔrɔaronɔ, tó ò nɔ̀bɔ pãsĩ kũ à kun yã, akũ à kun tera doro, ama ani ɛra à su pìi è, a yã ni bo ń sarɛ. 9Laasunde kũ à ɔ̃ndɔ̃ vĩ yãn dí. Mì mɛ̀n suppla pìnɔ bi sĩ̀sĩ mɛ̀n suppla kũ nɔgbɛ̃ pì vutɛnaanɔmɛ. Kína gbɛ̃nɔn supplanɔmɛ dɔ. 10Ń gbɛ̃nɔn sɔɔro lɛ̀tɛ, gbɛ̃ mɛ̀n do kun, gbɛ̃ mɛ̀n do kpɛ́. Tó à sù, ani gì kɛro. 11Nɔ̀bɔ pãsĩ kũ à kun yã, akũ à kun tera doro pì bi kína sɔraakɔ̃demɛ. Gbɛ̃nɔn suppla pìnɔ dokemɛ dɔ. Àtɛn mì pɛ́ kakatɛnaaa. 12Bɛ̃nɛ mɛ̀n kuri kũ n èe pìnɔ bi kína gbɛ̃nɔn kuri kũ odi kpata ble kɔ̀ronɔmɛ. Ama oni kí ble gɔrɔ fítinle gũn kũ nɔ̀bɔ pãsĩo lɛɛlɛ. 13Ń gbɛ̃nɔn kurii pìnɔ lɛ́dokɔ̃nɔmɛ. Oni ń gbãna kũ ń ikooo kpá nɔ̀bɔ pãsĩ pìia. 14Oni zĩ̀ ká kũ Sãnɛ Bɔ̀rɔɔo, ama ani zĩ̀ bleḿma, zaakũ dikirinɔ Dikirimɛ, kínanɔ Kínamɛ. A gbɛ̃ náanide kũ à ń sísi à ń sɛ́nɔn kú kãao. 15Akũ malaikaa pìi òmɛnɛ: Swa kũ n è karua vutɛnaanɔ bi gbɛ̃nɔ kũ parinɔ kũ burinɔ kũ buriyãnɔmɛ. 16Nɔ̀bɔ pãsĩ kũ bɛ̃nɛ mɛ̀n kuri kũ n èe pìnɔ ni zã karuaa pìgu. Oni a kakatɛ, ò à tó pótompo. Oni a só, oni tɛ́ sɔ̃a. 17Zaakũ Luda a pɔyenyĩnaa dàńnɛ ń swɛ̃̀n ò lɛ́dokɔ̃nɔ kɛmɛ. Oni ń kpata kpá nɔ̀bɔ pãsĩ pìia ari Luda yã gɛ́ papao. 18Nɔgbɛ̃ kũ n èe pì bi wɛ́ra zɔ̃kɔ̃ kũ à iko vĩ andunia kínanɔaamɛ.

Currently Selected:

ZIA YÃ 17: BB2005

Highlight

Copy

Compare