ZIA YÃ 12

Nɔgbɛ̃ kũ kwã zɔ̃kɔ̃ɔo

1Akũ ma wɛ́ sì sèeda zɔ̃kɔ̃ bonsarɛlɛ ludambɛ. Nɔgbɛ̃ ke ifãntɛ̃ yĩna biza ũ, mɔvura kú a gbá gbáru, à susunɛ mɛ̀n kuri awɛɛplanɔ kuna kífura ũ. 2À nɔ̀sina, akũ nɔ̀wãwã fùtɛa, àtɛn nɛ́'iwãwã wiki lɛ́. 3Akũ ma wɛ́ sì pɔ́ pãndelɛ ludambɛ sèeda ũ. Kwã zɔ̃kɔ̃ tɛ̃ra zónzon kú gwe, a mìi mɛ̀n suppla, a bɛ̃nɛ mɛ̀n kuri. À kífura mɛ̀n supplanɔ kúkuna. 4À susunɛnɔ lɛu aakɔ̃de wòwo ludambɛ kũ a vlão, à kɔ̀tɛ zĩtɛ, akũ à sù à zɛ̀ nɔgbɛ̃ kũ à ye à nɛ́ i pì arɛ, de à le à nɛ́ kũ ani i pì só yãi. 5Akũ nɔgbɛ̃ pì nɛ́gɔ̃gbɛ̃ kũ ani kí ble buri sĩnda pínkia kũ mɔ̀ gòoo ì. Akũ ò nɛ́ pìi sɛ̀ ò tà kãao Luda kũ a gbàao kĩnaa. 6Nɔgbɛ̃ pìi bàa lɛ̀ à tà sɛ̃̀n, gu kũ Luda kɛ̀kɛnɛ, de ò a gwa gɔrɔ wàa suddo kũ baaakɔ̃oo gũn.

7Akũ zĩ̀ fùtɛ ludambɛ, Mukaila kũ a ìbanɔ zĩ̀i kà kũ kwã pìio, kwã kũ a ìbanɔ zĩ̀i kà kũńwo. 8Akũ ń gbãna kĩ̀a, odi vutɛki e ludambɛ doro. 9Ò pɛ̀ kwã zɔ̃kɔ̃ɔ pìia ò a bò. Àkũ mɛ́ à mlɛ̃̀ zĩ kũ òdi pi Ibilisi kesɔ̃ Setan, andunia pínki sã̀tɛri ũ. Ò a bò ò zù zĩtɛ kũ a ìbanɔ lɛɛlɛ. 10Akũ ma kòto gbãna mà ludambɛ à pì:

Ó Luda zĩ̀i blè sà,

a gbãna kũ a kpataao bò gupuraa,

à ikoo kpà kína kũ à kàa.

Zaakũ ò pɛ̀ yãdimmariia ò a bò.

Akũ mɛ́ àdigɔ̃ ó gbɛ̃nɔ yaka ó Ludanɛ fãnantɛ̃ kũ gwãanio.

11Ó gbɛ̃nɔ zĩ̀i blèa kũ Sãnɛ Bɔ̀rɔ aru gbãnao

kũ ń sèedadekɛyão.

Ò gì ń wɛ̃̀ndiii ari ò gɛ̀ɛ gào.

12Abire yãi ákɔ̃nɔ kũ á kú ludambɛnɔ,

à pɔnna kɛ.

Waiyoo zĩtɛ kũ ísirao,

zaakũ Ibilisi kìpaáwa kũ pɔfɛ̃ zɔ̃kɔ̃ɔomɛ,

kũ à dɔ̃ kũ gɔrɔ kũ à gɔ̃̀arɛ kpáraro yãi.

13Kũ kwã è ò a zu zĩtɛ, akũ à pɛ̀tɛ nɔgbɛ̃ kũ à nɛ́gɔ̃gbɛ̃ ì pìii. 14Akũ ò vãu zɔ̃kɔ̃ dɛ̀mbɛrɛ mɛ̀n pla kpà nɔgbɛ̃ pìia à vurao à kɛ zã̀ kũ mlɛ̃̀ɛ pìio, à tá gu kũ ò kɛ̀kɛɛnɛ sɛ̃̀n, de ò a gwa gwe wɛ̃̀ aakɔ̃ kũ a kusuo. 15Mlɛ̃̀ɛ pì í pìsi nɔgbɛ̃ pì kpɛ lán swa bà, de ísɔ̃ le à a sɛ́, 16akũ zĩtɛ nɔgbɛ̃ pìi mìi sì, à a lɛ́ wɛ̃̀, à í kũ à bò kwã lɛ́n pìi mì. 17Akũ kwã pì pɔ fɛ̃̀ nɔgbɛ̃ pìii, à gɛ̀ɛ zĩ̀ ká kũ a buri kũ ò gɔ̃̀nɔ, gbɛ̃ kũ ò Luda yã kũna, kũ ò kun Yesu sèedade ũnɔ. 18Kwã pì zɛna ísira lɛ́a.

Currently Selected:

ZIA YÃ 12: BB2005

Highlight

Copy

Compare