ZIA YÃ 11

Sèedade gbɛ̃nɔn planɔ

1Akũ ò leba kpàma pɔ́yɔ̃bɔ ũ, ò pìmɛnɛ: Ǹ futɛ ǹ Luda kpɛ́ yɔ̃ kũ a gbagbakio, ǹ donyĩri kũ ò kú gwenɔ naro. 2Ǹ a ɔn tó, ǹsun yɔ̃ro, zaakũ ò kpà kifirinɔaamɛ. Oni gɛ̀sɛ pɛ́tɛpɛtɛ Luda wɛraa ari mɔ bupla awɛɛpla. 3Mani ma sèedade gbɛ̃nɔn planɔ gba zɛ́ ò annabikɛyã o gɔrɔ wàa suddo kũ baaakɔ̃oo pìi gũn kũ uta kasanɔo dadana. 4Gbɛ̃ pìnɔn kù lí mɛ̀n pla kũ fitiladibɔ mɛ̀n pla kũ ò zɛna andunia Dikiri arɛnɔ ũ. 5Tó gbɛ̃ tɛn wɛtɛ à wari dɔḿma, tɛ́ ni bo ń lɛ́n à ń ibɛrɛɛ pìnɔ kpáta. Lɛn gbɛ̃ kũ àtɛn wɛtɛ à wari dɔḿma ni ga lɛ. 6Ò ludambɛ zɛ́ tatana gbãna vĩ, de legũ sún ma gɔrɔ kũ òtɛn annabikɛyã oro yãi. Ò í litɛna aru ũ gbãna vĩ dɔ. Oni kisira buri sĩnda pínki kpá anduniai gɔrɔ kũ ò yeiia.

7Tó ò ń sèedaakɛnaa làka, nɔ̀bɔ pãsĩ kũ àdi bo Zĩngo wɛ̀ɛ lòkoto gũn ni zĩ̀ ká kũńwo à zĩ̀ bleḿma à ń dɛdɛ. 8Ń gɛ̀nɔ nigɔ̃ katɛna wɛra zɔ̃kɔ̃ kũ ò ń Dikiri pà lía zɛ́da gũn. Yáasi gũn òdi wɛra pì sísi Sɔdɔmu ke Misila. 9Gbɛ̃ sĩnda pínki kũ buri sĩnda pínkio kũ buriyã sĩnda pínki òrinɔ kũ bùsu sĩnda pínki gbɛ̃nɔ ni ń gɛ̀nɔ gwagwa ari gɔrɔ aakɔ̃ kũ a kusuo, oni we ò ń vĩro. 10Gbɛ̃ kũ ò kú zĩtɛnɔ ni pɔnna kɛ, oni dikpɛ kɛ, oni gba dakɔ̃nɛ, kũ annabi gbɛ̃nɔn pla kũ ò wari dɔ̀ḿma pìnɔ gàga yãi.

11Gɔrɔ aakɔ̃ kũ a kusuo pìi gbɛra Luda tò wisa wɛ̃̀ndide gɛ̃̀ńgu, akũ ò fùtɛ ò zɛ̀. Vĩna gbɛ̃ kũ ò ń énɔ kũ̀ manamana. 12Akũ annabii pìnɔ kòto gbãna mà à bò ludambɛ, à pìńnɛ: À futɛ à mɔ́ la. Gɔrɔ kũ ń ibɛrɛnɔ wɛ́ fĩḿma, akũ ò fùtɛ ò tà musu ludambɛ luku gũn. 13Zĩ kũ̀a zĩtɛ yĩ̀gãyĩgã pãsĩpãsĩ, wɛra pì lɛu kuride gbòro, akũ gbɛ̃nɔn dúbu supplanɔ gàga zĩtɛyĩgãyĩgãnaa pìi gũn. Vĩna gbɛ̃ kparanɔ kũ̀, akũ ò bɛ̀ɛrɛɛ lì Luda Musudenɛ. 14Yã pãsĩ plade gɛ̃̀tɛ, a aakɔ̃de tɛn ká sà.

Kãkãki supplade pɛnaa

15Malaika supplade a kãkãki pɛ̀. Kòto gbãnanɔ bò ludambɛ ò pì:

Andunia kpataa gɔ̃̀ ó Dikiri pɔ́ ũ

kũ kína kũ à kàao,

anigɔ̃ kí ble gɔrɔ sĩnda pínki.

16Gbɛ̃ zɔ̃kɔ̃ gbɛ̃nɔn baro awɛɛsiikɔ̃ kũ ò vutɛvutɛna ń gbàaa Luda arɛ pìnɔ kùtɛkutɛ ò donyĩ kɛ̀nɛ 17ò pì:

Dikiri Luda Gbãnasĩndapinkide

kũ ń kun yã akũsɔ̃ ń kun ari tera,

o n sáabu kɛ̀,

zaakũ n bo kũ n gbãna zɔ̃kɔ̃ɔomɛ,

gbasa n na kíblenaaa.

18Bùsu sĩnda pínki gbɛ̃nɔ pɔ fɛ̃̀,

akũ n pɔfɛ̃ kìpaḿma.

N yãkpatɛkɛna kũ gyãwãndenɔ gɔrɔ kà.

Ĩni fĩna bo n zɔ̀bleri annabinɔnɛ

kũ n gbɛ̃ kũ òtɛn vĩna kɛnnɛnɔ,

nɛ́ fíti gbɛ̃ zɔ̃kɔ̃,

ĩni anduniadɛrinɔ dɛdɛ.

19Akũ ò Luda kpɛ́ kũ à kú musu wɛ̃̀, akũ ò Luda bàka kunna kũńwo àkpatii è a gũn. Legũ tɛn pí, àtɛn pata, àtɛn pũtã. Zĩtɛ yĩ̀gãyĩgã, legũgbɛ pãsĩ kɔ̀tɛ.

Currently Selected:

ZIA YÃ 11: BB2005

Highlight

Copy

Compare