FILIPIDENƆ 3

Kirisi dɔ̃naa

1Ma gbɛ̃nɔ, yã kũ à gɔ̃̀n dí: À pɔnna kɛ Dikiri gũn. Mani gí yã kũ ma òárɛ gbɛ̀ sísiiro. Àkũmɛ aafia ũárɛ. 2À laakari kɛ lɛwanna kũ̀nɔi, yãvãnikɛri kũ òdi ń kɛ yákiyaki pìnɔ! 3Ókɔ̃nɔ kũ odì donyĩ kɛ Ludanɛ kũ a Nini gbãnao, odì ĩa dã Kirisi Yesu gũn, odì náani kpá ó zĩda yãaro, ókɔ̃nɔ mɛ́ ó tɔ̃̀zɔ̃nade yãpuranɔ ũ. 4Makũ, má zɛ́ vĩ mà náani kpá ma zĩdaa. Tó gbɛ̃ tɛn da a a zĩda náani kɛ̀, ma a pɔ́ kɛ̀ deala. 5Ma tɔ̃̀ɔ zɔ̃̀ ma gɔrɔ sɔraakɔ̃de zĩ. Isarailan ma ũ inaa gũn, Biliaminu buri, Eberu buri yãpura. Musa doka musu má kú Farisinɔ gã̀a gũn. 6Ma ania kɛ̀, ma wɛ́ tã̀ sɔsi gbɛ̃nɔa. Yãkɛna a zɛ́a Musa doka gũn, gbɛ̃ke dí fɔ̃ à ma taari èro. 7Ama yã kũ má kũna àre ũ yã pìnɔ gɔ̃̀mɛnɛ àree sari tera Kirisi yãi. 8A kũ à deńla ma yã sĩnda pínki dìtɛ àree sari ma Dikiri Kirisi Yesu dɔ̃na kũ à de a pínkila yãi. Kirisi pì yãi ma ɔ gbàrɛ yã sĩnda pínkii bìsa ũ, de màgɔ̃ a vĩ, 9màgɔ̃ kú a gũn kũ yã kũ dì tó ò kɛ nna kũ Ludao a náanikɛna yãiio. Luda dì tó yã bo kũńwo nna dokakũna yãinlo, àdi tó yã bo kũńwo nna Kirisi náanikɛna yãimɛ. 10Yã kũ má yei mɛ́ à de mà Kirisi dɔ̃ kũ gbãna kũ à fùtɛo bona ganwo, de ma bàka gɔ̃ kú a warikɛnaa gũn, mà gɔ̃ lákũ a bà a ganaa gũn 11gbasa mà gɔ̃ gàavu ũ.

Pɔ́ kũ ntɛn pɛ́a lenaa

12Adi kɛ ma lè pínkinlo akũsɔ̃ má papana gĩaro. Matɛn pɛ́amɛ, de mà yã kũ Kirisi Yesu ma sɛ a pɔ́ ũ yãi sí ma pɔ́ ũ. 13Ma gbɛ̃nɔ, mádi sí ma lè kɔ̀ro. Yã mɛ̀n don matɛn kɛ, madì nɔnɔ pɔ́ kũ à kú ma arɛi, pɔ́ kũ à kú ma kpɛ laasunlɛnaa sari. 14Matɛn pɛ́ pɔ́ kũ ma wɛ́ dɔiia, de mà àre kũ Luda ó sísia gɛna musu le Kirisi Yesu gãi. 15Ókɔ̃nɔ gbɛ̃ papananɔ, ògɔ̃ laasun bire vĩ. Tó á laasun pãnde vĩ, Luda ni á wɛ́ kɛ̃árɛ yã bire musu. 16A pínki dé, gu kũ o kan dí, ò gɛ́ arɛ zɛ́ dokɔ̃nɔ pìi gũn.

17Ma gbɛ̃nɔ, à ma ágba sɛ́, lákũ o a taka kɛ̀árɛ nà, á wɛ́ gɔ̃ pɛ́ gbɛ̃ kũ ń kunna kɔ̃ sìonɔi. 18Madìgɔ̃ oárɛ yã gɛ̃̀n baaakɔ̃, akũsɔ̃ ma ɛra matɛn oárɛ tera dɔ kũ wɛ́'io, gbɛ̃nɔn kun dasi kũ ń yãkɛna ń kɛ́ Kirisi gana lía ibɛrɛnɔ ũ. 19Ò mìi pɛ̀ kakatɛnaaa. Ń gbɛrɛmɛ ń dikiri ũ, wé'iyãmɛ ń ĩadãbɔ ũ, andunia yãn ń laasun dìgɔ̃ kúa. 20Ókɔ̃nɔ sɔ̃, ludambɛ gbɛ̃nɔn ó ũ, ó wɛ́ dɔ Surabari kũ ani bo gwea, àkũmɛ Dikiri Yesu Kirisi ũ. 21Ani ó mɛ̀ gbãnasarinɔ li lán a mɛ̀ gakuride bà kũ a gbãna kũ ani fɔ̃ à tó pɔ́ sĩnda pínki mì natɛarɛo.

Currently Selected:

FILIPIDENƆ 3: BB2005

Highlight

Copy

Compare