FILIPIDENƆ 4

Lɛ́dammanaa

1Abire yãi ma gbɛ̃ yenyĩde kũ matɛni á bɛgɛ kɛnɔ, ákɔ̃nɔ kũ á de ma ĩadãbɔ kũ madì pɔnna kɛo ũnɔ, àgɔ̃ zɛna gíngin Dikiri gũn lɛ, ma gbɛ̃nɔ.

2Ma kútɛ kɛ̀ Yuodianɛ kũ Sintisio ògɔ̃ lɛ́dokɔ̃nɔ vĩ Dikiri gũn. 3Mɔkɔ̃n sɔ̃ ma gbɛ̃ndo náanide, ma wɛ́ kɛ̀mma, ǹ kpá nɔgbɛ̃ pìnɔi, zaakũ ò ɔsi kà kũmao baaru nna kpanaa gũn kũ Kɛlɛmɛntio kũ ma zĩkɛri dakenɔ. Ń tɔ́ kú wɛ̃̀ndi takadan.

4Àgɔ̃ pɔnna kɛ Dikiri gũn gɔrɔ sĩnda pínki. Ma òárɛ dɔ, à pɔnna kɛ. 5À á zĩda busa gbɛ̃ sĩnda pínkinɛ. Dikiri sunaa kà kãni. 6Àsun yãke damu kɛro. Yã sĩnda pínki gũn à adua kɛ, à yã gbɛka Ludaa kũ sáabukɛnaao, à á yã'ũmmananɔ onɛ, 7ani á nɛ̀sɛ kũ á laakariio kpátɛárɛ Kirisi Yesu gũn. Nɛ̀sɛkpatɛnaa pìi zɔ̃kɔ̃, à de bisãsiri dɔ̃na la.

8Ma gbɛ̃nɔ, yã kũ à gɔ̃̀árɛn dí: Yã kũ à yãpura vĩ akũsɔ̃ à bɛ̀ɛrɛ vĩ, yã kũ à zɛ́ vĩ akũsɔ̃ à gbãsĩ vĩro, yã kũ à nna akũsɔ̃ à arubarika vĩ, yã kũ à mana akũsɔ̃ òdi a sáabu kpá, àgɔ̃ laasun lɛ́ yã birenɔ musu. 9Yã kũ ma dàárɛ a sì, yã kũ a mà ma lɛ́i akũsɔ̃ a èma, à yã birenɔ kɛ, Luda aafiade nigɔ̃ kú kãáo.

Pɔlu Filipidenɔ sáabukpanaa

10Ma pɔ nna à kɛ̀ zɔ̃kɔ̃ Dikiri gũn, zaakũ á laasun ɛ̀ra à sùma sà. Á ma yã kũna yã fá, zɛ́n ádi lero. 11Mádi o lɛ kũ matɛn takasi kɛ yãinlo, zaakũ ma dà ma zĩdanɛ màgɔ̃ sáabu vĩ gwena sĩnda pínki gũn. 12Má takasikɛna dɔ̃ akũsɔ̃ má nnamana dɔ̃. Gɔrɔ sĩnda pínki gu sĩnda pínkia kãna ke nàa, pɔ́dinyĩ ke pɔ́kĩammana yãke vĩmɛnɛ doro. 13Mani pɔ́ sĩnda pínki fɔ̃ Kirisi kũ àdi ma gba gbãna yãi. 14Bee kũ abireo kũ á bàka kú kũ ma takasikɛnaao, a yã mana kɛ̀.

15Filipidenɔ, á dɔ̃ kũ á zĩdao, ma baaru nna kpanaárɛ káaku gũn, kũ ma bo Masedonia bùsun, sɔsi ke kun kũ à kpàmai kũ ɔgɔ yã bɔkɔtɛnaaoro, sé ákɔ̃nɔ. 16Bee gɔrɔ kũ má kú Tɛsalonika, a pɔ́ kũ matɛni a ni dɛnɔ kpã̀zãmɛnɛ de gɛ̃̀n dola. 17Adi kɛ gban matɛn wɛtɛro, á àre karana Luda kĩnaan matɛn wɛtɛ. 18Ma pɔ́ kũ a kpã̀zãmɛnɛ lè, à pàpa ari à dìrɛ. Ɛpafarɔditu á gbanɔ kpàma, pɔ́ mɔ̀ma sà. À de sa'obɔ kũ a gbĩ nna Ludanɛ akũsɔ̃ àdi káagu à sí ũ. 19Ma Luda ni pɔ́ kũ á a ni vĩnɔ kpááwa Kirisi Yesu gũn a aruzɛkɛ gakuride lɛ́n.

20Ògɔ̃ ó Luda ó De tɔ́ bo gɔrɔ sĩnda pínki! Aami.

Lɛ́zammanaa

21À fɔ kpá Luda gbɛ̃nɔa ń pínki kunna Kirisi Yesu gũn. Ma gbɛ̃ kũ ó kú lɛɛlɛnɔ fɔ kpàáwa. 22Luda gbɛ̃nɔ fɔ kpàáwa ń pínki, atɛ̃nsa gbɛ̃ kũ ò kú Siza bɛanɔ. 23Dikiri Yesu Kirisi gbɛ̃kɛ kɛárɛ á ninin.

Currently Selected:

FILIPIDENƆ 4: BB2005

Highlight

Copy

Compare