FILIPIDENƆ 2
2
Zĩdabusanaa
1Tó á kunna Kirisi gũn lɛ́damma vĩ, tó a yenyĩ tɛn tɛ́ kpáái, tó á lɛ́dokɔ̃nɔ vĩ kũ a Ninio, tó á kɔ̃ wɛ̃nda vĩ kũ sùruuo, 2à laasun dokɔ̃nɔ kɛ, àgɔ̃ yenyĩ dokɔ̃nɔ vĩ lɛ́dokɔ̃nɔdenɔ ũ, pɔyeinayãdokɔ̃nɔdenɔ ũ, de ma pɔnna gɔ̃ papana. 3Àsun yãke kɛ denlana ke yɔ̃̀gɔ̃kɛna yãiro. Zĩdabusanaa gũn à a gbɛ̃dake kũ kũ bɛ̀ɛrɛɛo de á zĩdala. 4Gbɛ̃ke sún laasun lɛ́ a zĩda mɛ̀n do yãaro, à gbɛ̃ pãndenɔ pɔ́ lɛ́ dɔ. 5Àgɔ̃ nɛ̀sɛ kũ Kirisi Yesu vĩ vĩ se.
6A ludakɛnaa gũn adi a zĩda kɛna lɛɛlɛ kũ Ludao yã daro,
7akũ à a zĩda gwenaa tòn, à zĩ̀rikɛ sɛ̀,
à gɔ̃̀ bisãsiri ũ, à bisãsirikɛ sɛ̀.
8À a zĩda bùsa,
à mìi nàtɛ ari à gɛ̀ɛ à gào,
ari lígbãndurukpana ganaa.
9Abire yãi Luda a sɛ̀ musu,
à tɔ́ kũ à de tɔ́ sĩnda pínkila kpànɛ,
10de tó ò Yesu tɔ́ sì,
gbɛ̃ sĩnda pínki ni kútɛnɛ
ludambɛ kũ zĩtɛo kũ zĩtɛ gɛ̃io,
11gbɛ̃ sĩnda pínki ni o kũ a lɛ́o
kũ Yesu Kirisimɛ Dikiri ũ
De Luda tɔ́bona yãi.
À gu puńnɛ andunia gũn
12Abire yãi ma gbɛ̃ yenyĩdenɔ, lákũ adì ma yã ma gɔrɔ kũ má kú kãáo nà, atɛ̃nsa kũ má kú kãáo tera doro, àgɔ̃ á bona mana lɛ́ papa kũ vĩnao kũ lukanaao. 13Zaakũ Luda mɛ́ àtɛn zĩ kɛ á gũn de àgɔ̃ ye a pɔyenyĩnaai gbasa à kɛ. 14À yã sĩnda pínki kɛ yãkete kũ lɛ́kpakɔ̃anaao sari, 15de àgɔ̃ taari sari, gbãsĩ sari, Luda nɛ́ mamberusaridenɔ ũ tera gbɛ̃ sãtɛna nɛ̀sɛpãsĩdenɔ tɛ́, kũ átɛn gu puńnɛ andunia gũn lán susunɛnɔ bà, 16àgɔ̃ wɛ̃̀ndi yã kũna, de mà le mà ĩa dã kãáo Kirisi sugɔrɔ zĩ yãi. Tó átɛn kɛ lɛ, de mádi bà pã lɛ́ro akũsɔ̃ mádi zĩ pã kɛro. 17Bee tó ma aru ni kɔ́tɛ á ludanaanikɛna sa'o'i ũ, ma pɔ nigɔ̃ nna, matɛn pɔnna kɛ kãáo á pínki. 18Ákɔ̃nɔ sɔ̃, à pɔnna kɛ lɛ, ò kɛ lɛɛlɛ.
Timɔti kũ Ɛpafarɔdituo
19Kũ Dikiri Yesu arubarikaao mani Timɔti zĩáwa tera, de mà le mà á baaru ma, ma laakari kpátɛ. 20Má gbɛ̃ke vĩ kũ à ye á yãi yãpura lákũ a bàro. 21Gbɛ̃ sĩnda pínki zĩda yã mɛ́ àdi donɛ arɛ, adi kɛ Yesu Kirisi yãnlo. 22Á dɔ̃ lákũ Timɔti a zĩda bì nà, à baaru nna zĩ kɛ̀ kũmao lán nɛ́ kũ a deo bà. 23Tó má a zɛna dɔ̃ súsu, má ye mà a zĩáwa gɔ̃̀nɔ. 24Má Dikiri náani vĩ kũ mani su á gwa tera ma zĩda.
25Ma gbɛ̃ Ɛpafarɔditu, ma zĩkɛri dake, ma zĩ̀kari dake kũ a a zĩ̀ à kpámai kũ pɔ́ kũ matɛni a ni dɛnɔ, ma è à mana mà a gbarɛáwamɛ. 26Àtɛni á bɛgɛ kɛ á pínki, akũsɔ̃ a nɛ̀sɛɛ yàka, kũ a a gyãkɛna baaruu mà yãi. 27À gyã kɛ̀ yãpura ari à kà gana, akũ Luda a wɛ̃nda gwà. Adi kɛ àkũmɛ adoro, kũ makũomɛ se, de ma pɔsira sún kararo yãi. 28Abire yãi matɛn wã mà a gbarɛáwa, de á wɛ́ sikɔ̃lɛ, á pɔ kɛ nna, ma laakari kpátɛ. 29À gbãnakɛ kpái Dikiri gũn kũ pɔnna zɔ̃kɔ̃ɔo. À bɛ̀ɛrɛ lí gbɛ̃ bire takanɛ. 30À gɔ̃̀ fíti kũ ani ga Kirisi zĩ yãi. À a zĩda kpà gaa de à le à kpányĩ kũ áni fɔ̃ à kɛmɛnɛro kɛmɛnɛ yãi.
Currently Selected:
FILIPIDENƆ 2: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
