YAMISI 5

Kpãkɛ̃na aruzɛkɛdenɔi

1Ákɔ̃nɔ aruzɛkɛdenɔ, à yã ma sà. À ɔ́ɔ dɔ, à wiki lɛ́ kisira kũ ani á le yãi. 2Á aruzɛkɛnɔ yàka, kɔ̀kɔnɔ á pɔ́kasanɔ sòso. 3Á ɔgɔ dã̀a kpà, akũ a dã̀akpanaa pì ni á da yãn, ani á mɛ̀ piti lán tɛ́ bà. A aruzɛkɛ dì gɔrɔ kpɛde zĩ. 4À ma! A ɔgɔzĩkɛri kũ ò á burapɔnɔ kɛ̃̀árɛnɔ blè, akũ ɔgɔ pì yã Luda ki lè. Pɔ́kɛ̃rii pìnɔ wikilɛnaa gɛ̃̀ Dikiri Zĩ̀karide sãn. 5A á mɛ̀na mà zĩtɛ la á pɔyeinakɛnaa gũn. A mɛ̀ɛ kpà kùtukpana gɔrɔ pɔ́ ũ. 6A yã dà gbɛ̃ mananɔla, a ń dɛdɛ, odi gíárɛro.

Mɛna

7Abire yãi ma gbɛ̃nɔ, àgɔ̃ mɛna fɔ̃ ari Dikiri sugɔrɔ. À gwa lán búbarii dì a burapɔ bɛ̀ɛrɛde kɛ̃gɔrɔ dã nà. Àdi mɛna fɔ̃ zaa kaburagɔrɔ ari sakare. 8Ákɔ̃nɔ sɔ̃, à mɛna fɔ̃ à zɛ gbãna, zaakũ Dikiri sugɔrɔ kà kãni. 9Ma gbɛ̃nɔ, àsun yãkete kákɔ̃iro, de Luda sún yãkpatɛ kɛ kãáoro yãi. Yãkpatɛkɛrii pì zɛna kpɛ́lɛlɛa fá! 10Ma gbɛ̃nɔ, annabi kũ ò yã ò yã kũ Dikiri tɔ́onɔ, à mɛna kũ ò kɛ̀ warikɛnaa gũn zɛ́ dí taka sɛ́. 11Odì pi ò arubarika vĩ, kũ ò mɛna fɔ̃̀ yãimɛ. A Ayuba mɛnakɛna baaruu mà, a mà lákũ Dikiri kɛ̀nɛ nà kpɛkpɛ, zaakũ wɛ̃nda kũ sùruuo papana Dikiria.

12Atɛ̃nsa ma gbɛ̃nɔ, àsun la daro. Àsun pi a sì kũ ludambɛo ke kũ zĩtɛo kesɔ̃ kũ pɔ́ pãndeoro. À tó á ee gɔ̃ ee. À tó á oi gɔ̃ oi, de yã sún vutɛáwaro yãi.

Aduakɛna ludanaanikɛnaa gũn

13Á gbɛ̃ke tɛn wari kɛ yá? À adua kɛ. Á gbɛ̃ke pɔ nna yá? À Luda sáabu kpá. 14Á gbɛ̃ke tɛn gyã kɛ yá? Ade sɔsi gbɛ̃ zɔ̃kɔ̃nɔ sísi ò adua kɛnɛ, ò nísi máa kũ Dikiri tɔ́o. 15Adua kũ ò kɛ̀ ludanaanikɛnaa gũn ni gyãre pì werekɔ̃a. Dikiri ni a futɛ. Tó à durunna kɛ̀ yã sɔ̃, ani kɛ̃a. 16Abire yãi à á durunnanɔ okɔ̃nɛ, à adua kɛkɔ̃nɛ de à le àgɔ̃ aafia. Gbɛ̃ mana aduakɛna gbãna, àdi zĩ kɛ manamana. 17Iliasu bi bisãsirimɛ lán ó bà. À adua kɛ̀ manamana, de legũ sún maro, akũ legũ dí tɔ́ zĩtɛaro ari wɛ̃̀ aakɔ̃ kũ mɔ suddoo. 18À ɛ̀ra à adua kɛ̀ dɔ, akũ legũ'i bò manamana, zĩtɛ pɔ́ble kɛ̀.

19Ma gbɛ̃nɔ, tó á gbɛ̃ mɛ̀n do zã̀ yãpura zɛ́a, akũ á gbɛ̃ke ɛ̀ra à a dà zɛ́n, 20àgɔ̃ dɔ̃ kũ gbɛ̃ kũ à tò durunnakɛrii pìi bò sãtɛna zɛ́n à ɛ̀ra à sù, à a sì gaamɛ, akũsɔ̃ à lá kù durunna dasinɔla.

Currently Selected:

YAMISI 5: BB2005

Highlight

Copy

Compare