1 PITA 1
1
Tãmaa kũ àdi ń nɛro
1Makũ Pita, Yesu Kirisi zĩ̀ri mɛ́ à takada dí kɛ̃̀ Luda gbɛ̃ kũ ò de nibɔnɔ ũ andunia dí gũn, kũ ò fãkɔ̃ana bùsu díkĩnanɔ gũnnɔnɛ: Pɔntu, Galatia, Kapadosia, Asia kũ Bitiniao. 2De Luda gĩnakɛ à á dɔ̃, akũ à á sɛ́, a gɔ̃ a pɔ́ ũ kũ a Nini gbãnao, de à mì natɛ Yesu Kirisinɛ, a aru gbã̀ boárɛ. Luda gbɛ̃kɛ kũ aafiaao karaárɛ.
3Ò Luda ó Dikiri Yesu Kirisi De sáabu kpá! A sùru zɔ̃kɔ̃ɔ gũn à ó í dufu kũ Yesu Kirisi vuna gan gbãnao, akũ ó tãmaa kũ àdi ń nɛro vĩ, 4zaakũ túbi kũ à ditɛnaárɛ ludambɛ pìi dì lákaro, àdi gbãsĩ kpáro, a mana dì lákaro. 5Luda soru kɛ̀ à làka de à á sura ba a náani kũ átɛn kɛ yãi, akũ àtɛni á dãkpã kũ a gbãnao ari à gɛ́ bo kũ surabanaa pìio gupuraa gɔrɔ kpɛde zĩ. 6Átɛn pɔnna kɛ kũ yã pìio, bee kũ áni wari kɛ gĩa fíti yɔ̃ogwana buri sĩnda pínki yãi. 7Lákũ òdi wura mana dɔ̃ tɛ́ gũn nà, lɛn òtɛni á ludanaanikɛna yɔ̃ à gwa lɛ, zaakũ á ludanaanikɛnaa pìi bɛ̀ɛrɛ vĩ de wura kũ a gakuri dì lákala manamana. Tó a bo mana, Luda ni á sáabu kpá Yesu Kirisi sugɔrɔ zĩ, ani á kpe ta kũ gakurio. 8Bee kũ ádi a ero, á yei. Bee kũ ádi wɛ́ kɛ pla kãao zikiro, átɛni a náani kɛ, akũ átɛn pɔnna zɔ̃kɔ̃ kũ à gɛ̃̀ onala kɛ, 9kũ átɛni á ludanaanikɛna gbɛ̀ le á surabana ũ yãi.
10Annabinɔ gĩnakɛ ò gbɛ̃kɛ kũ Luda ni kɛ kãáo yã ò, ò surabanaa pì yã gwà, ò a tàasii kà. 11Kirisi Nini kũ à kú ń gũn gĩnakɛ à wari kũ Kirisi pì ni kɛ òńnɛ kũ gakuri kũ ani le a gbɛrao, akũ ò wɛ̀tɛ ò yã pì zɛ́ dɔ̃ kũ a gɔrɔo. 12Akũ Luda tò ò dɔ̃̀ kũ yã kũ òtɛn o pì de ń gɔrɔ pɔ́ ũro, á pɔ́mɛ. Tera sà baarunnakparinɔ yã pìi òárɛ kũ Luda Nini kũ Luda pìi zĩ̀ bona ludambɛ gbãnao. Bee malaikanɔ se òtɛn ɔsi ká yã pì dɔ̃naai.
Kunna adona
13Abire yãi àgɔ̃ kú á laakariia, àgɔ̃ á zĩda kũna dɔ̃, á wɛ́ gɔ̃ dɔ gbɛ̃kɛ kũ Luda ni kɛárɛ Yesu Kirisi sugɔrɔ zĩi sikaa sari. 14Lákũ á de Luda nɛ́ kũ òtɛni a yã manɔ ũ nà, àsun tó dà vãni kũ á vĩ yã á wɛ́siragɔrɔ doárɛ arɛro. 15Luda kú adonamɛ. Lákũ à á sisi à á sɛ́ nà, àgɔ̃ kú adona á yãkɛna sĩnda pínki gũn lɛ se. 16Zaakũ ò kɛ̃̀ Luda yãn ò pì:
Àgɔ̃ kú adona,
zaakũ má kú adonamɛ.
17Zaakũ Luda dì yãkpatɛ kɛ kũ baadio a yãkɛnaaa ń wɛ́ gwanaa sari, tó átɛni a sísi De, à vĩna kɛnɛ á nibɔkɛnaa gũn la. 18Á dɔ̃ lákũ Luda á bó kunna kori kũ à de á futɛokarayã ũ gũn nà. Luda dí á bo kũ pɔ́ kũ a gakuri dì lákaoro, lán wura ke andurufu bà, 19à á bó kũ Kirisi aru gakurideomɛ, kũ à de lán sãnɛ bɔ̀rɔ kũ à mamberu vĩro à gbãsĩ vĩro bà. 20Luda gĩnakɛ à a dìtɛ zaade adi andunia kátɛro, akũ à bòárɛ kãao gupuraa gɔrɔ kpɛde díkĩnanɔ zĩ. 21A yã musun átɛn Luda náani kɛ. Luda a bò gan à gakuri kpàa, de à le à a náani kɛ, á wɛ́ gɔ̃ dɔi.
22Lákũ mìnatɛna yãpuranɛɛ gbã̀ bòárɛ nà, akũ a gɔ̃ kɔ̃ gbɛ̃nɔ ũ manafiki sari, àgɔ̃ yekɔ̃i kũ nɛ̀sɛ mɛ̀n doo. 23Luda á í dufu kũ a yã wɛ̃̀ndide kũ àdigɔ̃ kun gbãnao. Yã pì de pɔ́buri kũ àdi ga ũro, pɔ́buri kũ àdi garomɛ.
24Gbɛ̃ sĩnda pínki de lán sɛ̃̀ɛ bàmɛ,
ń gakuri de lán sɛ̃̀vu bàmɛ pínki.
Sɛ̃̀ɛ dì kori kɛ, a vú dì kɔ́tɛ,
25ama Dikiri yã dìgɔ̃ kun gɔrɔ sĩnda pínki.
Yã pì mɛ́ à de baaru nna kũ ò kpàárɛ ũ.
Currently Selected:
1 PITA 1: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
