YAMISI 4

Gbɛ̃nnakpana kũ anduniao

1Bɔ́ mɛ́ àdi fìti kũ lɛ́kpakɔ̃anaao da á tɛ́ɛ? Òdi bo á pɔyeina kũ òtɛn ɔsi ká á mɛ̀ɛ gũnnɔ kĩnaanloo? 2Adìgɔ̃ ye pɔ́i, ama adì ero, akũ adì gbɛ̃ dɛ. Adì pɔ́ ni dɛ, akũ adì pɔ́ kũ átɛn pɛ́a lero. Akũ adì lɛ́kpakɔ̃a kɛ, adì fìti kɛ. Á a vĩro, kũ adì wɛ́ kɛ Ludaaro yãimɛ. 3Tó à wɛ́ kɛ̀, adì ero, kũ adì wɛ́ kɛ kũ nɛ̀sɛmanaoro yãimɛ, zaakũ adìgɔ̃ ye à a bɔkɔtɛ kɛ á pɔ́nidɛnanɔ gũmmɛ. 4Náanisaridenɔ, á dɔ̃ kũ gbɛ̃nnakpana kũ anduniao bi ibɛrɛsɛna kũ Ludaonloo? Gbɛ̃ kũ à ye à kɛ andunia gbɛ̃ ũ gɔ̃̀ Luda ibɛrɛ ũmɛ. 5Kũ ò kɛ̃̀ Luda yãn ò pì, Nini kũ Luda dà ó gũn nɛ̀sɛgɔ̃ba vĩ, átɛn da yã pãn yá? 6Ama gbɛ̃kɛ kũ Luda vĩ kũoo de abirekũla, zaakũ ò kɛ̃̀ Luda yãn ò pì:

Luda dì ibɛrɛ sɛ́ kũ zĩdabirinɔ,

ama à gbɛ̃kɛ vĩ kũ zĩdabusarinɔ.

7Abire yãi à mì natɛ Ludanɛ. À gí Ibilisinɛ, ani bàa síárɛ. 8À na Ludai, ani naái. Durunnakɛrinɔ, à ɔ bo durunnan. Nɛ̀sɛpladenɔ, à á swɛ̃̀ pípi. 9À ɔ́ɔ dɔ kũ pɔsirao kũ wɛ̃ndayão. À á yáadɔna litɛ ɔ́ɔdɔna ũ, à á pɔnna litɛ nɛ̀sɛyakana ũ. 10À á zĩda busa Dikiri arɛ, ani á kara.

11Ma gbɛ̃nɔ, àsun kɔ̃ tɔ́ bɛ̃̀nɛ síro. Gbɛ̃ kũ à a Yesude dake tɔ́ bɛ̃̀nɛɛ sì ke à a bɛ̃̀nɛɛ bò, à Luda doka sèeda vãni kɛ̀, à a vãni bò. Tó n Luda doka vãni bò sɔ̃, a màriimɛ n ũro, a vãniboriimɛ n ũ. 12Ludan dokaditɛri ũ kũ yãkpatɛkɛriio. Àkũ mɛ́ à gbɛ̃ surabana kũ a kakatɛnaao gbãna vĩ. Mɔkɔ̃n sɔ̃, dímɛ n ũ, kũ ndì n gbɛ̃dake vãni boo?

Luda bàka bonaa

13À yã ma sà, ákɔ̃nɔ kũ adì pi, gbãra ke zia áni gɛ́ wɛ́ran, áni vutɛ gwe wɛ̃̀ do, áni laga tá à àre le. 14Á yã kũ ani á le zia dɔ̃ yá? Á dɔ̃ lákũ á wɛ̃̀ndi de nà yá? Á de lán suka bàmɛ. Tó à kpà fíti, akũ àdi gɛ̃tɛ gɔ̃̀nɔ. 15Yã kũ à de à on dí: Tó Dikiri wè, akũ ó aafia, óni kɛ lán dire bà ke lán dí bà. 16Tera sɔ̃ átɛn ĩa dã, a Luda bàkaa bò. Ĩadãna bire taka buri manaro. 17Gbɛ̃ kũ à yãmanakɛna dɔ̃, akũ adi kɛro durunna kɛ̀.

Currently Selected:

YAMISI 4: BB2005

Highlight

Copy

Compare