YAMISI 3

Lɛ́fɔ̃naa

1Ma gbɛ̃nɔ, àsun kɛ yãdannɛrinɔ ũ dasiro, zaakũ á dɔ̃ kũ Luda ni wɛ́ piti ókɔ̃nɔ yãdannɛrinɔa yãkpatɛkɛgɔrɔ zĩ de gbɛ̃ kparanɔla. 2Ó pínki odìgɔ̃ zã yãa baala'imɛ. Tó gbɛ̃ lɛ́ dì a ásaru kɛro, taarisaridemɛ, ani fɔ̃ à a mɛ̀ pínki gbãna fɔ̃. 3Odì sɔ̃mɔ ká sɔ̃nɛ de à ó yã ma yãimɛ, akũ odì a milɛ ble. 4Kesɔ̃ à gó'itɛ gwa ísirala. Bee kũ a zɔ̃kɔ̃kɛo kũ zàga'ĩa gbãna kũ àdi a yĩpao, a fĩbɔ de fítinlemɛ. Àkũ mɛ́ àdi a milɛ ble, akũ a fĩ̀rii dì a pɔyeina danɛ. 5Lɛmɛ sɔ̃, nɛ́nɛ bi mɛ̀gu fítinlemɛ, akũ àdi ĩa dã kũ yã zɔ̃kɔ̃ɔo.

À gwa lákũ tɛ́ fíti dì sɛ̃̀ dasi kpáta nà. 6Nɛ́nɛ de lán tɛ́ bàmɛ, àkũmɛ andunia vãni ũ ó mɛ̀ɛ gũn. Àdi tó gbãsĩ gɔ̃ kpá ó mɛ̀ɛa pínki. Gyãwãn tɛ́ mɛ́ àdi nakara nɛ́nɛa, akũ nɛ́nɛ dì tɛ́ kpá ó andunia kunan. 7Bisãsiri nɔ̀bɔsɛ̃ntɛnɔ tùtuu kɛ̀ pínki kũ bãnɔ kũ pɔ́ kũ òdi táa o kũ kùaonɔ kũ kpɔ̀nɔ, à kpɛ́ àtɛn kɛ ari tera, 8ama gbɛ̃ke dì fɔ̃ à a nɛ́nɛ tùtu kɛro. Àkũmɛ pɔ́ vãni kũ àdi zɛ tɛniro ũ. À pana kũ sɛwɛtɛ̃o, 9nɛ́nɛn odì Dikiri ó De sáabu kpáo, akũ odì ɛra ò bisãsiri kũ à a kɛ̀ lán a bà káo dɔ. 10Lɛ́dokɔ̃nɔ pìin sáabukpana kũ gbɛ̃kanaao dì bon. Ma gbɛ̃nɔ, àsungɔ̃ de lɛro. 11Íboki dì í nna kũ í kyã̀kyãao bo wɛ̀ɛ dokɔ̃nɔ gũn yá? 12Ma gbɛ̃nɔ, kaka lí ni nɛ́ i kù ũ yá? Geepi lí ni nɛ́ i kaka ũ yá? Lɛmɛ dɔ bia í sùkusukude ni í nna boro.

Ɔ̃ndɔ̃ kũ àdi bo musu

13Á tɛ́, dí mɛ́ à yãdɔ̃ri ɔ̃ndɔ̃de ũu? À mɔńnɛ a kunna mana gũn kũ a yãkɛnanɔ kũ zĩdabusana kũ àdi bo ɔ̃ndɔ̃ gũnwo. 14Tó á nɛ̀sɛgɔ̃ba pãsĩ kũ denlawɛtɛnaao vĩ á swɛ̃̀ɛ gũn sɔ̃, àsun ĩa dãro, àsun gí yãpurairo. 15Ɔ̃ndɔ̃ bire taka dì bo musuro, andunia pɔ́mɛ, á dà pɔ́mɛ, Ibilisi pɔ́mɛ. 16Zaakũ gu kũ nɛ̀sɛgɔ̃ba kũ denlawɛtɛnaao kún, gwen kɔ̃yãmasari kũ yã bɛ̃̀nɛ pínkio dìgɔ̃ kún. 17Tó gbɛ̃ ɔ̃ndɔ̃ kũ àdi bo musu vĩ, káaku àdigɔ̃ gbãsĩ vĩro, a gbɛra àdigɔ̃ yãkete vĩro, àdi a zĩda busańnɛ, àdi gbɛ̃ yã ma, à sùru papana kũ yãmanakɛnaao. Àdi gbɛ̃ tɛ̃̀ boro, akũsɔ̃ àdigɔ̃ manafiki vĩro. 18Ibɛrɛmidɛrii dì kɛna kũ kɔ̃o nna tɔ̃, akũ àdi yã mana kɛ̃.

Currently Selected:

YAMISI 3: BB2005

Highlight

Copy

Compare