EBERUNƆ 12

Luda a gbɛ̃nɔ totonaa

1Abire yãi ókɔ̃nɔ se, lákũ sèedadenɔ diwái nà lɛ, ò ɔ kpá pɔ́ kũ òdi kpáwɛrɛnɔi kũ durunna kũ àdi ó kakũn aragao pínki, ò bàkpakũsũna kũ Luda dìtɛwɛrɛ lɛ́ kũ mɛnao. 2Ò wɛ́ pɛ́ Yesua kũ à bò kũ ó ludanaanikɛna zɛ́o akũsɔ̃ à zɛ́ pìi kɛ̀ papana. À gana líaa fɔ̃̀, adi a wé'iyã daro pɔnna kũ à ditɛnanɛ lena yãi, akũ à gɛ̀ɛ à vùtɛ Luda kíblegba ɔplai. 3À laasun lɛ́ a yãa, lákũ à mɛna fɔ̃̀ kũ durunnakɛri kũ ò ibɛrɛ bire taka sɛ̀ kãaonɔo, de àsun kpasa á nɛ̀sɛɛ yakaro yãi. 4Zaakũ á ɔsikana kũ durunnaoo gũn, ádi zɛ a gi ari a gɛ a gaoro. 5Nɛ̀sɛyĩdakũna yã kũ ò òárɛ lán nɛ́nɔ bà sã̀águn yá? Ò pì:

Ma nɛ́, tó Dikiri tɛni n toto, ǹsun ditɛ pãro.

Tó à kpã̀kɛ̃nyĩ, ǹsun tó n kã garo.

6Zaakũ gbɛ̃ kũ Dikiri yeiin àdi toto,

àdi wɛ́ tã gbɛ̃ kũ à sì a nɛ́ ũa.

7À wɛ́tãmma ditɛ totona ũ. Luda mɛ́ àtɛn abirekũ kɛárɛ, kũ a nɛ́nɔn á ũ yãi. Nɛ́ ke kun kũ a de ni gí à a totoi yá? 8Tó adi á toto lán a nɛ́ kparanɔ bàro, á de a nɛ́nɔ ũro, yìgisarinɛnɔn á ũ. 9Ó denɔ vĩ andunia la kũ ò ó toto, akũ o ń yã mà. Lákũ à de lɛ nà, ò mì natɛ ó De kũ à kú musu de abirekũla ògɔ̃ kun. 10Ó denɔ ó toto gɔrɔ pla pɔ́ ũ ń ɔ̃ndɔ̃ lɛ́n. Luda dì ó toto ó karana yãimɛ, de ó kunna le àgɔ̃ adona lán a bà. 11Totona ke pɔnna vĩ a gɔrɔaro, sé pɔsira, ama gbɛ̃ kũ totonaa pì ń kɛ́kɛnɔ dì a gbɛ̀ le zã bona mana kũ aafiao ũ.

12Abire yãi à á ɔ kũ ò gɔ̃̀ dɔáinɔ kũ á gbá kũ ò gɔ̃̀ tererenɔ gba gbãna, 13à zɛ́ sɛ́ súsu, de ákɔ̃nɔ kũ átɛn tɔ̃ɔtɛnɔ sún kakũnlo, ò gɔ̃ kũ aafiaao.

14À wɛtɛ àgɔ̃ nna kũ gbɛ̃ sĩnda pínkio, á kunna gɔ̃ adona, zaakũ tó gbɛ̃ kunna adonaro, ani Dikiri ero. 15À laakari kɛ, á gbɛ̃ke sún kura Luda gbɛ̃kɛkɛnnɛnaai à gɔ̃ gɔ̃nna ũ á tɛ́, à wari dɔ gbɛ̃nɔa dasi à ń yakaro. 16Á gbɛ̃ke súngɔ̃ de pãpãkɛri ke ludayãdarisari ũ lán Isau bàro. À a daudukɛzɛ yìa pɔ́ gɛ̃̀n do blena yãi. 17Á dɔ̃ kũ à sa'olɛ wɛ̀tɛ a dea zã, akũ Luda gìnɛ. Bee kũ à wɛ̀tɛ kũ wɛ́'io, adi zɛ́ le à yã kũ à kɛ̀ litɛro.

Luda bàka kunna kũńwo zĩ kũ a dufuo

18Adi kɛ Sinai kpi kũ oni fɔ̃ ò ɔ naaan a nairo, kũ àtɛn tɛ́ kũ, à gusira vĩ kũ gu bùgubuguuo kũ zàga'ĩao 19kũ kãkãki yĩsãmpanaao kũ Luda kòto gbãnao. Kũ Isarailanɔ kòtoo pìi mà, ò kútɛ kɛ̀nɛ ò pì, àsun yãke ońnɛ doro, 20zaakũ oni yã kũ à dìtɛńnɛ díkĩna fɔ̃ro à pì: Bee pɔ́kãde mɛ́ à nà kpi pìia, ò pápa kũ gbɛ̀ɛo ò dɛ. 21Luda kipanaa pì bi vĩna yãmɛ manamana ari Musa pì, vĩna a kũ, átɛn lukaluka.

22Ama a na Zaiɔ̃ kpii kũ Luda Wɛ̃̀ndide wɛ́tɛ Yurusalɛmu kũ à kú musuo kũ a malaika dasidasi kũ ò kakarana gwenɔ 23kũ daudu kũ ń tɔ́ kɛ̃na gwenɔ kɔ̃kakaranaao kũ Luda kũ à de gbɛ̃ sĩnda pínki yãkpatɛkɛri ũo kũ gyãwãn gbɛ̃ mana kũ ò gɔ̃̀ papananɔ 24kũ Yesu kũ à de Luda bàka kunna kũńwo dufu yãkɛkɛri ũo kũ a aru fãfãna kũ àtɛn yã mana o de Habila pɔ́lao.

25À laakari kɛ, àsun gí yã'orii pì yã mairo. Lákũ gbɛ̃ kũ ò gì Luda lɛ́damma mai zĩtɛ lanɔ dí boro nà, ókɔ̃nɔ se, lákũ Luda tɛn lɛ́ dawá zaa musu, tó o kpɛ lìnɛ, oni ó pɔ́ o dɔ yá? 26A kòto zĩtɛ lùkaluka yã, akũ à lɛ́ sɛ̀ à pì, áni gu lukaluka gɛ̃̀n do dɔ, adi kɛ zĩtɛ adonlo, kũ musuomɛ sà. 27Kũ à pì, gɛ̃̀n do dɔ, abirekũ tɛn piwɛrɛ Luda pɔ́kɛna kũ ani lukaluka pìnɔ ni gɛ̃ zɛ́lamɛ, de pɔ́ kũ àdi lukaronɔ le àgɔ̃ kun. 28Abire yãi lákũ ótɛn kpata kũ àdi yĩgãro ble nà, ò Luda sáabu kpá, ògɔ̃ donyĩ kɛnɛ lákũ à yei nà, ògɔ̃ mì natɛnɛ vĩnakɛnanɛɛ gũn. 29Zaakũ ó Luda bi tɛ́ kũ àdi kũḿmamɛ.

Currently Selected:

EBERUNƆ 12: BB2005

Highlight

Copy

Compare