EBERUNƆ 11

Gbɛ̃ káakunɔ ludanaanikɛnaa

1Ludanaanikɛnaamɛ tãmaa kunna Luda kĩnaa sikaa sari ũ, yã kũ òdi wɛ́ sialɛro sina yãpura ũ. 2Gbɛ̃ káakunɔ ludanaanikɛna mɛ́ à tò Luda ń sáabu kpà.

3Ó ludanaanikɛna mɛ́ à tò ó dɔ̃ kũ a yã'ona mɛ́ à andunia kàtɛ. Pɔ́ kũ òdi wɛ́ sialɛron à pɔ́ kũ òdi wɛ́ sialɛ kɛ̀o.

4Habila ludanaanikɛna mɛ́ à tò a sa'ona Ludaa mana de Kainu pɔ́la. A ludanaanikɛna yãin Luda a sáabu kpà, à a dìtɛ gbɛ̃ mana ũ, akũ à a gba sì. Bee kũ à gà, ó kpɛ́ ótɛni a yã ma Luda náani kũ à kɛ̀ɛ pì yãi.

5Ɛnɔku ludanaanikɛna mɛ́ à tò Luda a sɛ̀, de àsun garo yãi. Odi a e doro, kũ Luda a sɛ̀ bona andunia gũn yãi. Ari Luda gɔ̃ a sɛ́, à a sáabu kpà, à pì a yã kàagu. 6Gbɛ̃ke yã dì ká Ludagu a náanikɛnaa sariro. Séde gbɛ̃ kũ àtɛn nai sí kũ à kun akũsɔ̃ àdi fĩna bo a ki wɛtɛrinɔnɛ.

7Kũ Luda lɛ́ dà Nuhua yã kũ odi e yãro musu, akũ à Luda náani kɛ̀, à a yã mà, à gó'itɛ kɛ̀, à a ɔndenɔ sura bào. A ludanaanikɛna mɛ́ à tò yã vùtɛ andunia, akũsɔ̃ Luda tò yã bò kãao nna a náani kũ à kɛ̀ɛ pì yãi.

8Kũ Luda Ibrahĩ sìsi de à gɛ́ bùsu kũ áni kpáa àgɔ̃ vĩ gũn, akũ Ibrahĩ Luda náani kɛ̀, à Luda yã pìi mà. À bò bɛ, bee kũ à gu kũ àtɛn gɛ́n pì dɔ̃ro. 9À Luda náani kɛ̀, akũ à bɛ pɛ̀tɛ bizakuta ũ bùsu kũ Luda a lɛ́ sɛ̀nɛɛ pìi gũn nibɔ ũ. Lɛn Isaaku kũ Yakubuo dɔ, zaakũ Luda lɛ́sɛnaa pìi gɔ̃̀ ń pɔ́ ũmɛ. 10Zaakũ wɛ̃tɛ kũ Luda kàtɛ à bò a zĩni pɛtɛnaan Ibrahĩ wɛ́ dɔi.

11Sara ludanaanikɛna mɛ́ à tò à zɛ́ lè à nɔ̀ɔ sì, bee kũ paramɛ, akũsɔ̃ à zĩ kũ̀, zaakũ à dɔ̃ kũ Luda kũ à lɛ́ sɛ̀arɛ náani vĩ. 12Bee kũ à zĩ kũ̀, gɔ̃gbɛ̃ mɛ̀n do pì buri kɛ̀ dasi lán susunɛnɔ ke ísiralɛ bùsu'atɛ̃ bà, oni fɔ̃ ò a lɛ́ dɔ̃ro.

13Gbɛ̃ pìnɔ gàga ń pínki ń ludanaanikɛnaa gũn, pɔ́ kũ à a lɛ́ sɛ̀ńnɛnɔ lenaa sari. Ò è zã̀ dire ò gbãnakɛ kpài. Ò pì, nibɔ bòasunɔmɛ ń ũ zĩtɛa la. 14Gbɛ̃ kũ òdi o lɛnɔ tɛn mɔwɛrɛ kũ òtɛni ń zĩda bùsu ni dɛmɛ. 15Tó bùsu kũ ò bòn bɛgɛn òtɛn kɛ yã, de ò zɛ́ lè ò ɛ̀ra ò tà gwe. 16Ama bùsu kũ a mana de abirekũlan òtɛni a ni dɛ, àkũ ludambɛ pɔ́ ũ. Abire yãi tó ò Luda sìsi ń Luda ũ, àdi kɛnɛ wé'iyã ũro, zaakũ à wɛ́ra kàtɛ ń pɔ́ ũ.

17-18Kũ Luda Ibrahĩ yɔ̃̀ à gwà, akũ Ibrahĩ Luda náani kɛ̀, à Isaaku kpà sa'opɔ ũ. Luda lɛ́ sɛ̀nɛ yã à pì, Isaaku burinɔn onigɔ̃ pińnɛ a burinɔ ũ. Bee kũ abireo à zɛ̀ kũ a nɛ́ mɛ̀n do pì kpanaao. 19À sì kũ Luda gbãna ni fɔ̃ à gɛ̀nɔ vu bona gan, akũ à de lákũ ò pì à ɛ̀ra à Isaaku lè bona gan bà. 20Isaaku Luda náani kɛ̀, akũ à sa'olɛ kɛ̀ Yakubu kũ Isauonɛ. 21Kũ Yakubu kú ga lɛ́i, akũ à Luda náani kɛ̀, à sa'olɛ kɛ̀ Yusufu nɛ́nɔnɛ, akũ à gbãna lè a gòoa à donyĩ kɛ̀. 22Kũ Yusufu kà gana, akũ à Luda náani kɛ̀, à Isarailanɔ bona Misila yã ò kũ lákũ oni kɛ kũ a gɛ̀wao nà.

23Musa de kũ a dao Luda náani kɛ̀, akũ ò a ùtɛ ari mɔ aakɔ̃ a inaa gbɛra, kũ ò è a àlesi mana yãi. Odi vĩna kɛ doka kũ Firi'auna dìtɛnɛro. 24Kũ Musa kɛ̀ zɔ̃kɔ̃, akũ à Luda náani kɛ̀, à gì ò a sísi Firi'auna nɛ́nɔgbɛ̃ nɛ́ ũ. 25À sì ò a wɛ́ tã kũ Luda gbɛ̃nɔ de kunna kũ pɔnnao durunna gũn gɔrɔ plala. 26À dìtɛ kũ wé'i kũ òdi daḿma Kirisi yãi de Misila aruzɛkɛla, zaakũ ziakpɛzĩ láadan a wɛ́ kúa. 27A ludanaanikɛna mɛ́ à tò à bò Misila, adi vĩna kɛ Firi'auna pɔfɛ̃nɛro, à zɛ̀ gíngin lákũ à Luda kũ òdi e kũ wɛ́oro èe bà. 28A ludanaanikɛna mɛ́ à tò à Vĩnla dikpɛ dìtɛ kũ aru mamana kpɛ́ lɛ́ gbĩ̀iao, de gbɛ̃dɛri sún ɔ na ń daudunɔaro yãi. 29Isarailanɔ Luda náani kɛ̀, ò bikũ̀ Isira Tɛ̃raa lán zĩtɛ kori bà. Kũ Misilanɔ yɔ̃̀a lɛ, akũ í dàńla. 30Isarailanɔ Luda náani kɛ̀, ò táa ò ò lìka Yɛrikoi ari gɔrɔ suppla, akũ a bĩni kɔ̀tɛ. 31Karua Rahabu Luda náani kɛ̀, à gu'asirigwarinɔ dìtɛ à ń gwá manamana, akũ adi kakatɛ kũ ludayãdarisarinɔoro.

32Mani pi dera dɔɔ? Mani zɛ́ le mà Gidiɔn yã oro ke Baraki ke Samusi ke Yɛfɛta ke Dauda ke Samuɛli ke annabinɔ. 33Ò Luda náani kɛ̀, akũ ò zĩ̀i blè kínanɔa, ò yã gɔ̃̀gɔ̃ gbɛ̃nɔnɛ a zɛ́a, ò lɛ́ kũ Luda sɛ̀ńnɛ gbɛ̀ɛ lè, ò músunɔ lɛ́ nàkɔ̃a, 34ò tɛ́ pãsĩ dɛ̀, ò bò fɛ̃nɛda lɛ́i, ò gbãna lè ń gbãnasarikɛ gũn, ò pãsĩ kũ̀ zĩ̀i gũn, ò pɛ̀ buri pãnde zĩ̀karinɔa, 35ò nɔgbɛ̃nɔ nɛ́ gɛ̀nɔ fùtɛ bona gan ò kpàḿma. Ò mɛ̀ɛ ũ̀ ń gbɛ̃kenɔa, akũ ò gì ò ń gbarɛ, de ò vu bona gan ò bo mana yãi. 36Ò ń gbɛ̃kenɔ fobò, ò ń gbɛ̃ kũ flã̀ao. Ò mɔ̀ɔ kà ń gbɛ̃kenɔa, ò ń ká kpɛ́siran. 37Ò ń pápa kũ gbɛ̀ɛo ò ń dɛdɛ, ò ń zɔ̃kɔ̃rɛ pla kũ sàkasakaao, ò ń dɛdɛ kũ fɛ̃nɛdao. Ò kurè sã bára kũ blè bárao dana. Ò gɔ̃̀ kori, ò ń wɛ́ tã̀, ò wari dɔ̀ḿma. 38Andunia kunna dí kɔ̃ sí kũńworo. Ò lìkaralikara sɛ̃̀n kũ kpi musunɔo, ò kú gbɛ̀wɛɛnɔn kũ tɔ̃̀nɔwɛɛnɔ. 39Bee kũ Luda gbɛ̃ pìnɔ sáabu kpà ń pínki a náani kũ ò kɛ̀ yãi, odi pɔ́ kũ à a lɛ́ sɛ̀ńnɛ lero, 40Luda gĩnakɛ à dìtɛ, ò gwena mana le de ń pɔ́la, de òsungɔ̃ papana ó sariro.

Currently Selected:

EBERUNƆ 11: BB2005

Highlight

Copy

Compare