EBERUNƆ 13

Lɛ́dammanaa

1À wɛ́ tã àgɔ̃ gbɛ̃kɛ vĩ kũ kɔ̃o. 2À laakari dɔ nibɔkũnaaa, zaakũ lɛn gbɛ̃kenɔ malaikanɔ yàrii kɛ̀ dɔ̃naa sari lɛ. 3À tó gbɛ̃ kũ ò ń ká kpɛ́sira gũnnɔ yã dɔágu, lákũ á kú kũńwo kpɛ́siran bà, kũ gbɛ̃ kũ òtɛn wɛ́ tãḿmanɔ, lákũ ákɔ̃nɔmɛ òtɛn wɛ́ tãáwa bà. 4Baadi gɔ̃ nɔsɛna da yã bɛ̀ɛrɛde ũ. Òsun ń wútɛki gbãsĩ kpáro, zaakũ Luda ni yãkpatɛ kɛ kũ zinakɛrinɔ kũ pãpãkɛrinɔo. 5Yena ɔgɔi sún doárɛ arɛro. À zɛ kũ pɔ́ kũ á vĩo, zaakũ Luda pì:

Mani n tónlo,

mani pã kpányĩ zikiro.

6Abire yãi odì kùgbãna kɛ ò pi:

Dikirimɛ ma kpanyĩri ũ,

vĩna ni ma kũro.

Bɔ́n bisãsiri ni fɔ̃ à kɛmɛnɛɛ?

Sa yãpura onaa

7À tó á don'arɛde kũ ò Luda yã òárɛnɔ yã dɔágu. À ń kunna tàasi ká ari a lɛ́a, á Luda náani kɛ lán ń bà. 8Yesu Kirisi dokɔ̃nɔ gĩa kũ gbãrao ari gɔrɔ sĩnda pínki. 9Àsun tó ò á sãtɛ kũ yã nibɔ dasi dannɛnanɔoro. À mana ó swɛ̃̀ gbãna le Luda gbɛ̃kɛ gũn, adi kɛ sa'opɔ́ble kũ àdi àre ke kɛ gbɛ̃ kũ ò zɛ̀onɔnɛronlo. 10Bizakuta sa'orinɔ zɛ́ vĩ ò sa'oki kũ ó vĩ pɔ́ble blero. 11Sa'oriki dì gɛ̃ Ludakukin kũ pɔ́kãde aruo durunnanɔ kɛ̃mmana yãi, akũ òdi a gɛ̀ kpata bùra kpɛ. 12Abire yãi Yesu gà wɛ̃tɛ kpɛ se, à gbã̀ bò gbɛ̃nɔnɛ kũ a zĩda aruo. 13Ò bo ò gɛ́ a kĩnaa bùra kpɛ, wé'i ó kũ kãao se. 14Zaakũ ó wɛ̃tɛ kũ anigɔ̃ kun vĩ laro, wɛ̃tɛ kũ àtɛn sun ó wɛ́ dɔi. 15Abire yãi ògɔ̃ Luda sáabu kpá lakanaa sari kũ Yesu gbãnao ó sa'ona ũ. Gba kũ a sìsirinɔ dì suon gwe. 16À laakari dɔ yãmanakɛna kũ kɔ̃gbɛ̃kɛnaaoa. Sa bire taka ona mɛ́ àdi ká Ludagu. 17À á don'arɛdenɔ yã ma, à mì natɛńnɛ, de ò le ò zĩ kɛ kũ pɔnnao, zaakũ ò de gbɛ̃ kũ oni ń zĩ yã baba Ludanɛnɔ ũ. Tó òtɛn zĩ kɛ kũ lɛ́suruo, ani àre kɛárɛro.

Lɛ́zammanaa

18À adua kɛwɛrɛ. Yãke tɛni ó swɛ̃̀ vĩro, odìgɔ̃ ye ògɔ̃ kú ó dɔ̀rɔɔa yã sĩnda pínki gũn. 19Ma wɛ́ kɛáwa à adua kɛmɛnɛ, atɛ̃nsa mà le mà su á kia likalika.

20Luda aafiade kũ ó Dikiri Yesu fùtɛ bona gan sãdãriki ũ a bàka kunna kũoo gɔrɔ sĩnda pínki aru gãi, 21à á kɛkɛ kũ mana pínkio, de à a pɔyenyĩna kɛ, à yã kũ à kàagu kɛ ó gũn Yesu Kirisi gãi. Àkũ mɛ́ à gakuri vĩ gɔrɔ sĩnda pínki, aami.

22Ma gbɛ̃nɔ, ma wɛ́ kɛ̀áwa, àgɔ̃ lɛ́damma yã pì kũna kũ mɛnao, zaakũ takada kũ ma kɛ̃̀árɛ zɔ̃kɔ̃ro. 23Àgɔ̃ dɔ̃ kũ ò ó gbɛ̃ do Timɔti gbàrɛ. Tó à kà la tera, óni su á gwa lɛɛlɛ. 24À fɔ kpá á don'arɛdenɔa ń pínki kũ Luda gbɛ̃nɔ pínki. Itali bùsudenɔ fɔ kpàáwa. 25Luda gbɛ̃kɛ kɛárɛ á pínki.

Currently Selected:

EBERUNƆ 13: BB2005

Highlight

Copy

Compare